बदलांक येवकार, आनीक जाय

भांगरभूंय | प्रतिनिधी

दोगाय मंत्र्यांक राज्याच्या विंगड विंगड वाठारांनी गेल्यार दीस रात झुजा पावंड्यार वावर करचो दिसतलो. गोंयच्या बदलाची ती वाट.

अंदूची चवथ आनंदाची, गोंयकारांच्या खोशेची, दडकांच्या पावसांची. आयतारच्या ‘ज्येश्ठनितीं’तल्यान दोन सप्तकां आदीं भांगरभूंयेंतली चवथ पावसांत जातली अशें सांगिल्लें. कशें शक्य जालें हें एके अस्तुरी स्तंभलेखिकेक? पावसाळ्या पर्वांतली निमणी उमास चवथीआदींची. उमास काळखी आसली तरी ते उमासेंतय लिकलिकपी नखेत्रां उजवाड दितात. मागीर तो दिवलेचो, पण्टेचो, काजुल्यांचो आसूंये. मुख्यमंत्री डाॅ.प्रमोद सावंत हांकां सप्तकाक पत्रांर पत्रां बरयलीं नात. एक गजाल खरी भांगरभूंयेतल्या पत्रांत मांडिल्ल्या विचारांक म्हत्व येता. वजें उणें करुंक जाय ह्या स्तंभांतल्या माथाळ्याक मान दिवन मुख्यमंत्र्यांनी निर्णय घेतले. वजें उणें करुन चवथीचो नितळ आनंद परगटायतना, घेतना मुख्यमंत्र्यांचो फोटो पळयलो. रागार जावंचे न्हय, आनंद दिवपी.
कशी गेली चवथ? कोण, कोण मेळ्ळे चवथीक? पावसाची आडमेळीं आसलीं तरी जनता, मंत्री मोडून लागसल्ल्या देवळांत गेल्या आसतलेच. वचूंक मेळ्ळें नाजल्यार घरांत येवपी, वचप्यांक चवथीचीं परबीं सगल्यांनी हातांक हात लावन, हात जोडून दिल्यां आसतलींच. गोंय राज्योत्सव 2025 दिसाचे एके पत्रकार परिषदेंत मुख्यमंत्र्यांनी स्वमूत्रपथी पुस्तकाचें प्रकाशन केलें तेन्नाच ते बदलतले अशें म्हाका दिशिल्लें. फाटल्या सप्तकांत केरळ गेल्लें तेन्ना तूं गोवा, गोवा म्हणपी देसांतले ज्येश्ठ, वरिश्ठ पत्रकार म्हऱ्यांत आयले. हांवें तांकां नमस्ते केलें, तशें हांव ल्हानशा गोंयांतलें.
आमची चवथ ल्हानशा गांवांतलीं, पावसांतली, चार चौक्यांच्या घरांतली, आंगणातली. चवथीक जेन्ना उटंगारांचो पावस पडलो तेन्ना आनंदाचे वझरे व्हांवतले हें म्हाका कळिल्लें. पावसाच्या थेंब्यांतली आशा, अनुशा, प्राजक्ता, उषा, प्रभा सगलीं आमच्या घरांतलीं. कित्याक जाय आशिल्लो चवथीक पावस? गोंयची म्हादय, मांडवी उपाट भरपाक, म्हादय गे, म्हादय गे म्हणून नाचपाक. पावसाळो सोंपचे आदींच गोंयांत पावसाचो शेंकडो भरला, उदक उणें जावचें ना. जेन्ना भुजां वयलें वजें उणें जाता तेन्ना सैम, देवय व्हड खोस दिता. अंदू पावसांतल्यान ती मेळ्ळी, मेळत रावतली हातूंत दुबाव ना. आनीकय दिवपाचे येत्न मुख्यमंत्र्यांनी, मंत्र्यांनी केल्यार गोंय उदरगतीचे नवे वाटेन कित्याक वचचेंना ?
चवथीच्यो नेवऱ्यो, मोदक खातना मुख्यमंत्र्यांनी खातींय वाटलीं. कितलें ल्हव दिसता आसतलें तांकां भुजां वयलें वजें देंविल्ल्यान. चवथ म्हणल्यार फकत गणपती, गणपतीची पूजा न्हय ती अक्षरांची, रंगधारेची, तीं फुलांची, बेल आनी तुळशीची, हरयाळी आनी पंचामृताची, फुडें वचपाची, नवे दिकेची.
मुख्यमंत्र्यांनी नव्या मंत्र्यांक उदक दिलें, खेळयलें, ल्हानाक व्हड केले, व्हडाक ल्हान केलें ना, थंयच ते मोलादिक जाले. मंत्रीपद मेळळें तेन्ना खातीं मेळूक नाशिल्लीं तरी दिगंबरबाब खोशी आशिल्ले, ते ज्येश्ठच न्हय वरिश्ठय. शिक्षणान, पिरायेन, अणभवान. याद जाता दिगंबरबाब नगरसेवक आशिल्ले तेन्ना तांची मुलाखत घेतिल्ली त्या दिसाची. तांचो आवाज ल्हान, आकांक्षाय ल्हान, आजय तांचो आवाज तोच आसा, तांचे वांगडा आशाय आसा. दिगंबरबाब चलपी, खातरी आसा ते देव देव चड करचे नात, राज्याचे पडून आशिल्ले प्रस्न सुटावे करतले. तांकां भौशीक बांदकाम मेळ्ळां, बांदावळ जातलीच, रस्ते सुदारतले, पूल जातले. अनुसुचित जमाती वेव्हार मंत्री रमेश तवडकार आनी दिगंबरबाब मेळ्ळे. तांच्या तोंडार उल्हासाचीं ल्हारां आशिल्लीं. दिगंबरबाबान मुख्यमंत्र्यांच्या खांद्यार हात घालून, भुजाक भूज लावन शाबासकी दिली तेन्ना तेच न्हय मुख्यमंत्रीय व्हड जाले, गोंय म्हान जातलें. हो बदल खोस दिवपी उत्तर, दक्षिणेक, पूर्व, पश्चिमेक गोंयच्याच न्हय देसाच्याय. चार दिको ल्हानशा बदलांतल्यान जेन्ना खोशी जातात तेन्ना उजोय पालवता, अस्तंतय उजवाडाची जाता.
गोंयचें भौशीक बांदकाम खातें उदका मेकळें जालां, उदकाक स्वातंत्र्य मेळ्ळां. भौशीक बांदकाम खातें आतां नितळ जातलें, कार्यालयां वयल्यो ताडपत्र्यो उडटल्यो. बांदकाम खात्यांत आतां उरल्यात बिल्डिंगो, रस्ते, पूल, म्हामार्ग. पयलीं मतदारसंघातल्यो कचेऱ्यो, बांदकाम खात्याची मुखेल कचेरी पळयल्यार दिगंबरबाबांक वेगळो अणभव येतलो. मजल्यार मजल्यां परस आतां बांदूया ल्हानशो घरांवरी कचेऱ्यो अशें तांकां दिसतलें. गांवांगांवानी त्यो पावल्यार 2027 मेरेन आम आदमी धादोशी जाल्लो दिगंबरबाबांक दिसतलो. कांय वेळार दिगंबरबाब मार्केटिंगान कमी पडिल्ले आयज तें मडगांवचे आमदार करतले ही आस्त आसा. 2027 वर्साची वेंचणूक लागीं पावतना दिगंबरबाबांक मेळिल्लें भौशीक बांदकाम खातें 2027 वर्सा 27 चे वाटेर वचपाक उपेगी.
खेळांमंत्री रमेशबाब तवडकार हांकां तांच्या आवडींची खातीं मेळ्ळ्यात. तेय ज्येश्ठ, मुळावे. पक्षाचे गरजे वेळार ते सभापती जाले, आडमेळ्यांतल्यान मुखार वतना तेय व्हड, अणभवी जाल्यात. ते आमदार गोविंद गावडे हांकां बराबर घेवन वतले, बराबरीन माची मेळोवन दितले, ते तांचे भाव. बंदखणीतलें तांचें नातें साथीदाराचे. बंदखणींतल्यान भायर सरतना दोगांयच्या दोळ्यांत, कपलार आशिल्ल्यो वेदना, संवेदना पळोवपी पत्रकारांतलें एक हांव. गोविंदबाबांनी केल्लो वावरय ते फुडें व्हरतलेच, मोडिल्ले, पडिल्ले पत्रे सारके करतले तेन्ना कचेऱ्योय मोडिल्ल्यो तांकां दिसतल्यो. खेळांमंत्री म्हणून रमेशबाब पणजेतलो दयानंद बांदोडकर ग्रावंड पळेतले तेन्ना तांच्या पायांक माती लागतली, तीच तर गोंयची माती, गोंयचे मातयेंतले भूंयपूत. बेगीन वावरांत घुस्पावन घेतल्यार, रात दीस काम केल्यार खात्यांत बदल जातले, रमेशबाबय बदलांचे शिल्पी जावंक शकतात. वांगडच्यांक वांगडा घेवन गेल्यार तेय व्हड जावंक शकतात.
एकले परतून घरा आयिल्ले, दुसरे घराक धरून राविल्ले मंत्री जेन्ना गोंय मंत्रीमंडळात पावल्यात. दोगूय शिकिल्ले, गिन्यान तर आसाच अणभव, ल्हानांतल्यान ते व्हड जाल्यात. मंत्री जाल्ल्यान तांकांय मेळिल्लें दुसऱ्यांक दिवचें दिसतलें, तांचे घराबेय त्रासांतले.
एक व्हड गणीत मुख्यमंत्री डाॅ. सावंत हांणी सोडयलां, त्या गणितांत लिपल्यात 2027 त 27 च्यो शिमो. भौशीक बांदकाम तशें म्हत्वाचें खातें, कित्याक दिवचें दिसलें तेंच खातें मुख्यमंत्र्यांक दिगंबरबाबांक? म्हत्वाच्या खात्यांत मुख्यमंत्र्यांक आडमेळीं दिसल्या आसतलींच, कुस्कुटां, फोंडकुलां दिश्टी पडटलीं. राज्यांत रस्त्यांतल्या फोंडकुलांत देंवतना दिगंबरबाब खासावीस जातले, नितळसाणय हाडटले स म्हयन्या भितर. एकादरे चवथीक खेळां सामान भुरग्यांक मेळिल्लें नासत, आदींचें आसतलेंच. दिवाळेक गरजवंतांक रमेशबाब पावतले, दुपेटीन खोस दिवपाची तांक तांकां येतली. दोगाय मंत्र्यांक राज्याच्या विंगड विंगड वाठारांनी गेल्यार दीस रात झुजा पावंड्यार वावर करचो दिसतलो. गोंयच्या बदलाची ती वाट.

सुहासिनी प्रभुगांवकार
9881099260