भांगरभूंय | प्रतिनिधी
उटंगराच्या पावसांत स्मार्ट सिटी पणजेंतल्या कॅफे प्रकाश ह्या ल्हानशा रॅस्टोरंण्टाचो कोनसो मातयेभरवण जालो. त्या
कोनशाचें सूत धरून गोंयचो तरणाटो सुयश कामत हाणें ल्हानशा सिनेमाची निर्मणी केल्ली.
51 व्या इफ्फींत (भारताचो आंतरराष्ट्रीय चित्रपट महोत्सव) कॅफे प्रकाशाचो पडपी कोनसो माकनीझ पॅलेसाच्या व्हड स्क्रिनीचेर दिसलो. फक्त एका कोनशाचेर न्हय कॅफे प्रकाशाचोर मोग करपी सुटकेझुजारी, कवी नागेश करमली आनी हेरांच्या विचारांची जोड सिनेमाक मेळिल्ली. उपरांत सुयशा कडेन उलयतना तो गोंयच्या सिनेमाचो फुडार हें होलमलें. बाॅलिवुडांतले नामनेचे सिनेमा दिग्दर्शक, कलाकार जंय शिकले त्या महाराष्ट्र राज्यांतल्या पुणें शारांतल्यान सुयशूय सिने शिक्षण शिकलो. 54 व्या इफ्फींत सदाबहार ह्या सिनेमातल्यान इंडियन (भारतीय) पॅनोरमा मेरेन पावला. फुडल्या दोन ते पांच वर्सां भितर इफ्फींत सुयश उंचेल्या पावंड्यार पावतलो.
सिनेमा म्हळ्यार काणयो, मनीस आनी मनीसपणाच्या आधारान बांदिल्ल्यो. इफ्फीचे माचयेर एकठांय बांदिल्लो संवसारांतलो सिनेमा पळोवपाक मेळटा. इफ्फीन सुयशा वरी तरणाट्यांक माची मेळ्ळ्या, आतां तो फक्त गोंयचो उरूंक ना भारतीय, वैश्वीक जाला. इफ्फी गोंयांत हाडपी आदले मुख्यमंत्री मनोहर पर्रीकार हांणी तेंच सपन पळयिल्लें आसुये. इफ्फींतल्यान गोंयाक कितें मेळ्ळां हाचो हिशोब फाटल्यां 20 वर्सांचेर नदर मारल्यार मेळटलो. इफ्फींतल्यान गोंय संवसारांतल्या नव्या कोनशांनी पावलां, गोंयच्या पर्यटनाकय तातूंतल्यान उर्बा मेळ्ळ्या हें सत.
इफ्फी चो गोवा ब्रँड तयार जावपाक जाय ही मोख तो गोंयांत हाडपी पर्रीकार हांचे मुखार आशिल्ली. इफ्फीक गोंयांत ल्हानशें घर दिवपाची घोशणा तांणी केल्लीं. घर मेळ्ळें ना तरी इफ्फी व्हड जायत आसा, भारतीय सिनेमाक आॅस्कर इनामां मेरेनय पावोवपांत इफ्फीचे माचयेचो वांटो आसा.
इफ्फी गोंयांत आयिल्लो तेन्ना व्हड संख्येन सिनेमा बांदपाचे दीस आशिल्ले. संख्ये परस सिनेमाचें खाशेलेंपण, तंत्रज्ञान, विशयाक म्हत्व आसा. इतिहास सिनेमांतल्यान नवे तरेन सांगपाचो वावर भारतांतले सिने दिग्दर्शक, निर्माते करपाक लागल्यात. 53 व्या इफ्फींत काश्मीर फायल्स आयल्यो 54 वो इफ्फी द केरळ स्टोरी येता. धर्मीक आकांतवाद नांव केरळाचें आसलें तरी सिनेमा विश्वाचो आसा. बांदपी बंगाली दिग्दर्शक सुदिप्तो सेन, आधाराक गुजराती निर्मातो, ओडिशाचो सिनेमाटोग्राफर.
तंत्रगिन्यानान विदेशांतल्यो मनरिजवणेच्यो कार्यावळी गोंयांतय घरा मेरेन पावल्यात. मनरिजवण घरांत बसूनय जाता तेन्ना कोट्यांनी रुपया खर्च करून इफ्फी कित्याक? अशे विचारपी आसतले. अंदूं मडगांव रवींद्र भवनांतले इफ्फींतले सिनेमाचे माचयेर साश्ट ते काणकोण मेरेनचे लोकप्रतिनिधी आयल्यार तांकां आपसूक जाप मेळटली.
इफ्फी म्हळ्यार फक्त मनरिजवणेचे साधन, जागो न्हय जाल्यार फिल्म बाजार सिनेमांतल्या अर्थशास्त्राची माचीय इफ्फी वांगडा गोंयांत येता. हेच माचये वेल्यान सिनेमाची बांदावळ करपाची नवी दिका दिसता, सिनेमातलें नवें तंत्रज्ञान शिकपाक मेळटा. देखूनच संवसारांतले जाण्टे, नेण्टे तरणाटे दिग्दर्शक, निर्माते, लेखक, गायक, कवी, तंत्रज्ञ इफ्फींत येतात.
गोंयांत येतकूच इफ्फींतल्यान मनरिजवणेच्यो नव्यो माचयो तयार जाल्यो हें फाटल्या वीस वर्सांचो नियाळ करतकूच कळटलें. प्रादेशीक सिनेमा खातीर वेगळे टीव्ही चॅनेल्स, मोबायल सिनेमा येवपाची भासाभास इफ्फीचे माचयेंतल्यान गोंयांत सुरू जाली. ते भासाभाशेंतल्यान ओ टी टी वरी नवी माची संवसारीक सिनेमाक मेळ्ळ्या. भारतीय सिनेमा विदेशांतल्या निर्माते, दिग्दर्शकांच्या जोड पालवान जावपा खातीर इफ्फीचे माचये वेल्यान केल्ले येत्न फळादीक जाल्यात.
इफ्फीन मल्टीप्लेक्स गोंयांत हाडले, मल्टीप्लेक्सांचे नवें रुप सम्राट, अशोक थिएटरांतल्यान दिसतलें. गोंयच्या इफ्फींत जावपी कार्यावळी, मास्टरक्लास खिणा भितर संवसारात पावोवपा पासत संवसारांतल्या मिडियान गोंयांत येवपाकच जाय अशें ना. तंत्रज्ञानांतल्यान गोंयांत कितें जाता तें केंद्रीय म्हायती आनी प्रसारण मंत्रालय खिणांत संवसारांत पावयता. इफ्फींतल्यान केंद्रीय म्हायती मंत्रालयाक नवे दिकेन व्हेलें, नवे विभाग खासगी कंपनीं, संघटणा वरवीं मंत्रालय इफ्फींत हाडटा. चडशे सिनेमा इंटरनॅट, मोबायल, टीव्हीर पळयल्यात मागीर इफ्फी कित्याक? इफ्फींत कांय सिनेमाचे प्रिमिअर्सय जातात, फक्त बाॅलिवुडांतले न्हय हाॅलिवुडांतले नामनेचे दिग्दर्शक, निर्माते, कलाकार इफ्फीचे माचयेर एकठांय येतात.
मनीस होच इफ्फीचो मध्यबिंदू आसा, इफ्फींतल्यान इतिहासा परस फुडारांत कितें घडूं येता? झुजाचे परिणाम कितें? कोविडा उपरांत नवो व्हायरस कसलो येतलो? बदलपी जिणेशैलींतल्यान जो ताण वाडटा तो पयसावपा पासत भारतीय योग साधना विश्वाक मजत करता? स्त्रीशक्ती, भुरग्यांचें विश्व बदलता? आदीं प्रस्नांच्यो जापो मेळूंक शकतात. इफ्फींतल्यान प्रादेशीक सिनेमाची माची व्हड जाल्या, भारतीय कथा वैश्वीक जातना बाॅलिवूड, काॅलिवूड एक जातात. दक्षीण, पश्चिमेच्या सिनेमांचीच न्हय जाल्यार टीव्ही सिरियलांच्यो काणयो एकामेकांत भरसून गेल्यात.
इफ्फी गोंयांत येवन 20 वर्सां जातना फिल्मनगरीची, फिल्मसिटीची भास गोंय राज्य करता तेन्ना तियात्र, नाटकां सिनेमांतल्यान मुखार वतलीं अशी आस्त बाळगुया. गोंयच्या संगीता इतलेंच नाटकूय संवसारभर भोंवपाक लागलां. इफ्फींतले माचयेर भारतांतली लोककला, संस्कृताय गोंयांत येतकीच आयली. 54 व्या इफ्फींतलो सिनेमा फक्त मडगांव रवींद्र भवनांतच न्हय जाल्यार फुडारांत सांखळी, सांकवाळे, काणकोण रवींद्र, कला भवनांत दिसतलो. 21 वर्सा वयल्या तरणाट्यांक इफ्फींतलो सिनेमा पळोवपाक मेळटा, शिक्षणाच्यो नव्यो वाटोय इफ्फी गोंयकारांक दाखयता.
इफ्फी गोंयांत येतकीच गोंयच्या एका तरी दिग्दर्शक, निर्मात्याचो सिनेमा इफ्फींतल्यान संवसारांतल्या सिने उत्सवांत गेला. सरकारी अर्थीक येवजणेचेर निंबून रावनासतना आमचे भुंयेतले प्रस्न मांडपी सिनेमाची निर्मणी राजेंद्र तालक, राजेश पेडणेंकार, डाॅ. प्रमोद साळगांवकर हांणी केली. गोंयांत इफ्फी हाडपाक तेंको दिवपी दिग्दर्शक 54 व्या इफ्फीचे आंतरराष्ट्रीय ज्युरी मंडळाचे अध्यक्ष जाल्यात. इफ्फी ही आशियांतल्या सिनेमा उत्सवाची सगल्यांत मुखेल माची. इफ्फी गोंयांत येतकीच जैतवंत सिनेमाक चड रकमेची इनामां मेळूंक लागलीं. इफ्फीक प्रायोजकय खूब मेळटात, इनामांची वळेरीय वाडटा. शांती, अहिंसेची तत्वां सांगपी सिनेमाक गोंय इफ्फींतल्यान इनाम दितात.
इफ्फी ही संवसारांतल्या सिनेमाची माची आशिल्ल्यान संवसारांतल्या महोत्सवांत जैत मेळोवपी सिनेमा, प्रादेशीक सिनेमा, प्रतिनिधी राज्यांत येतात. इफ्फींतल्यान फक्त पर्यटनच न्हय गोंय सिनेमा थळ म्हणूनय प्रसिद्ध जाता. तंत्रगिन्यानांतल्यान इफ्फीचें प्रतिनिधित्व, सिनेमा तिकेट आॅनलायन जाल्या. पयलींचे सिनेमा नव्या रुपांत फुडारांत इफ्फीत येवंक शकतात.
सुहासिनी प्रभुगावकर
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
