बदलत्या हवामानाचो सगल्या मळार फटको

भांगरभूंय | प्रतिनिधी

गरमेच्या दिसांनी आनी खर वतांत आडवेळो पावस पडप ही फाटल्या कांय वर्सां सावन सदचीच गजाल जाल्या. खर वत, आडवेळो पावस, वारें अश्यो घडणुको वर्सभर घडत आसतात.

बदलत्या हवामानाचो सगल्या मळार फटको बसत आसा.तातूंतय कृशी मळार ताचो चडूच परिणाम जातना दिसून येता.
सद्या एप्रील म्हयनो सुरू आसा. सगली कडेन गरमेचें ल्हार पातळ्ळां. पारो वाडतूच आसा. शारांचें तापमान 35 ते 38 अंशाच्या घरांत. घरा भायर सरतकूच वताचो हुलोप जाणवता. खिणा खिणाक तान लागता. ह्या दिसांनी उदक पियेवप खूब गरजेचें. तापमानाचो परिणाम लोकांचे भलायकेचेर परिणाम जायत आसा. खर वताक लागून खूबशीं दुयेंसां जायत आसात. खर वतांत घुंवळ येवप, काळजाचो आताक येवप, रक्तदाब वाडप, कुडींतलें उदक उणें जावप. दोळ्यांचो विकार जावप. ल्हान भुरग्यांक तर वता पसून खूब सांबाळूंक जाय. गरमेक लागून भुरग्यांचे भलायकेचेर परिणाम जावंक शकता. तांची प्रतिकार शक्त खूब उणी ताका लागून तांकां जाता तितले सांबाळप हें पालकांचें कर्तव्य.
हे गरमेक लागून उष्माघात जावपाचें प्रकार घडटात. उष्माघातान कांय जाणांचो जीव लेगीत वचूंक शकता. फाटल्या वर्सा खारघर हांगा घडिल्ली घडणूक अजून लेगीत ताजीच आसा. तशेंच महाराष्ट्रांतल्या एका सुवाळ्यांत उष्माघाताक लागून महाराष्ट्र भूषण सुवाळ्यांत 15 श्री सेवेकारांक आपलो जीव व्हगडावचो पडिल्लो. खर वतांत चडांत चड उदक पियेवपाचो सल्लो दोतोर दितात. तशेंच फळांचो ज्यूस पियेवपाचो सल्लो दितात. दोतोरां कडल्यान दनपारां 11 ते 4 घरा भायर सरचें न्हय असो सल्लो दितात. पूण पोटापाणया खातीर लोकांक घरा भायर सरचेंच पडटा.
एके वटेन खर वत आसतना वाऱ्या सयत आडवेळ्या पावसान हाजेरी लायली. फुडले कांय दीस कांय वाठारांनी आडवेळो पावस पडपाची शक्यताय हवामान खात्यान उक्तायल्या. आडवेळ्या पावसाक लागून शेतकारांचें मात सुमारा भायर लुकसाण जाता. काजीचें पीक जाल्यार ह्या दिसांनी सामकेंच उणें जालां. फळांची बाग मातयेभरवण जातना दिसून येता. हाता तोंडा कडेन आयिल्लो घांस खिणा भितर हिरावन घेतना दिश्टी पडटा. खिणा भितार जें आसा तें नाच्च जाता. वर्सभराच्या कश्टाचेर उदक पडटा. पावस पडत जाल्यार शेतकारांक खूब लुकसाण सोंसचें पडटा. ह्या गरमेच्या दिसांनी आनी खर वतांत आडवेळो पावस पडप ही फाटल्या कांय वर्सां सावन सदचीच गजाल जाल्या. खर वत, आडवेळो पावस, वारें अश्यो घडणुको वर्सभर घडत आसतात.
पयलीं गोंयांत सगल्या ऋतूंचें आगमन वेळार जातालें. फाटल्या कांय वर्सांत ऋतुमानांत व्हड बदल जातना पळोवंक मेळटा. ऋतुमानूच बदल्लां. पयलीं पावस फक्त पावसाच्या दिसांनीच पडटालो. पूण आतां वर्सूयभर खंय ना खंय पावस पडटना दिसून येता, आनी जेन्ना पावसाचे दीस सुरू जातात तेन्ना दोन-दोन म्हयने पावसूच पडना. केन्ना केन्ना दोन दीस इतलो पावस पडटा की दोन दिसांत दोन म्हयन्याची सरासरी भरून काडटा. ताका लागून खंयच्या ऋतूंत खंयचें पीक घेवप हे विशीं शेतकार गोंदळांत पडटा. बदलत्या हवामानाक लागून कांय जाणांनी शेती वेवसाय करपूच सोडून दिलां.
फाटल्या कांय वर्सांनी रानां मारपाचें काम वाडलां. काँक्रिटीकरण वाडलां. शारां सिमेंटाचीं रानां जाल्यांत. पर्यावरणाचो ऱ्हास जाला. ताका लागून वातावरणांत बदल जायत आसा. वातावरणांतल्या बदलाक लागून ह्यो घडणुको घडत आसात. सैमाच्या ह्या बदलत्या चक्राचो मनीसजातीचेरूच न्हय जालयार पुराय जिवसृश्टीचेर परिणाम जायत आसा. लोकांनी हातूंतल्यान धडो घेवन आतां सावनूच सैम नेमाक जगप सुरू करूंक जाय. झाडां मारपाची थांबोवंक जाय. रानां मारपाचीं थांबोवंक जाय. झाडां लावन ती जगोवंक जाय. मनशान सैमाचेर केल्लें आक्रमण थांबोवंक जाय. जर मनीस सैम नेमां आड गेलो जाल्यार ताचें व्हड मोल फुडले पिळगेक मेजचें पडटलें.

श्याम ठाणेदार
9922546295