भांगरभूंय | प्रतिनिधी
तैत्तिरीय उपनिषदाच्या शिक्षावल्ली खंडांत मातृदेवो भवः, पितृदेवो भवः…. असो एक श्लोक आसा. तातूंत आवय, बापूय आनी गुरू हांकां देव मानल्यात. तांकां देवा भशेन मान दिवप हें कर्तव्य अशें सांगलां. हातूंत आनीक एके व्यक्तीक स्थान दिलां, ती म्हणल्यार अतिथी. सोयरे- पावणे हेवूय आमचे देव. राष्ट्रीय पर्यटन मळाचें घोशवाक्यूय हेंच आसा. अतिथी देवो भवः. आमचें गोंय हें पर्यटनाचेर पोट भरता, म्हणटकच राज्यांत येवपी पर्यटकांक आमी देवाचो दर्जो दिवन तांची सेवा करपाक जाय. (ती आमी करतात काय नात, ह्या प्रस्नाची जाप दरेकल्यान रातीं न्हिदचे पयलीं सोदची.) गोंय पळोवपाक येवपी पर्यटक उणेच 5- 10 हजार रुपया मोडटाच. वर्साक लाखांनी पर्यटक येतात. म्हणटकच ही भांगराचीं तांतयां दिवपी कोंबी आमी जिवा पलतडी जपूंक जाय. सध्या गोंयचें पर्यटन बदनाम जायत आसा. सरकाराच्या मतान, कांय घटक मुद्दाम बदनामी करपाक लागल्यात. हाचेर सरकारान बेगोबेग पावलां उबारूंक फावो. कांय निर्णय जाल्यात, ते बेगीन चालीक लागल्यार गोंयचें पर्यटन सावरतलें.
पर्यटन मळ कित्याक घाणावलां, ताचीं साबार कारणां आसात. हाॅटेलां आनी गेस्ट हावस धनी संघटणेक दिसता सोरो आनी कोयर हें मुखेल कारण. थोड्यांचें मत सोशल मिडियाचेर बदनामी चल्ल्या म्हूण पर्यटक दुसऱ्या राज्यांनी, देशांनी वचपाक लागल्यात. मुख्यमंत्री, पर्यटन मंत्री, सरकारी अधिकारी, पर्यटन मळाचेर वावुरपी हांचे बसकेंत हेडगीं गोरवां, रस्ताद सुणीं, टावट्स, कोयर, टॅक्सी हे मुद्दे आयले. गोंयच्या पर्यटनाक बादिकार हाडपी सगल्यो गजाली जाग्यार घालपाक कृती येवजणेची गरज आसा. ते विशींय बसकेंत भासाभास जाल्या. कांय लोकांक गोंयांत हेर राज्यां परस चड म्हारगाय आसा तें दिसता. ताचोय परिणाम पर्यटनाक भोगचो पडटा. थोडे देशी पर्यटक स्वताच्यो गाडयो घेवन येतात, रस्त्या कुशीक रांदतात, थंयच न्हिदतात… पर्यटन मळा वयली म्हारगाय हें हाचें फाटलें एक कारण.
सोंपेपणान मेळपी सोऱ्याक लागून गोंयची बदनामी जाल्या, अशें हाॅटेल संघटणेचें मत. गेस्ट हावस आनी होम स्टे धनयां कडेन पर्यटकांनी समस्या मांडल्यात, त्यो संघटणेन सरकाराच्या कानार घाल्यात. ताचेर उपाय काडप सगल्यांचीच लागणूक. मध्यानरातीं मेरेन सोऱ्याच्यो पार्ट्यो (हातूंत चिमटीभर पसून ड्रग्स आसना, अशें म्हणपाचें धाडस एकलोय तटस्थ गोंयकार करचो ना.) चलतात, दर्यादेगांचेर पर्यटक किजिलां करतात, दर्यावेळ घाण करतात, अशें संघटणेच्या वांगड्यांचें मत. संवसारांत खंयूच कोणूच असो सोरो पियेवन पडना, असो दावोय तांणी केलो. सगलो संवसार पळोवपी ह्या वेवसायिकांच्या दाव्यांत तथ्य आसतलेंच. पर्यटकांची दादागिरी वाडल्या. ताका लागून शॅक्सधनी आनी तांचे मदीं वाद जातात…. आनी खंयूय खट, खूट जाल्यार ताचो आवाज अर्दवरा भितर संवसारभर पावता. सोशल मिडियाचो हो प्रभाव. मागीर जांकां वायट अणभव आयला ते कमेंट करतात. बरो अणभव घेतिल्ले ह्या रेब्यांत कित्याक फातर मारुया म्हूण ओगी रावतात. हालीं मारामारीच्यो, दुर्घटणेच्यो घडणुको जाल्यो, त्योय गोंयाक मारक पडल्यो. गोंयची बदनामी करपी सगलेच विशिश्ट हेतू मनांत दवरून ती करतात अशें ना. थोडे आसतलेय वड्याचें तेल वांयंग्यार काडपी. पूण, ते नेमके कसली टिका करतात, तातूंत सत्य आसा काय ना तें पळोवपाक जाय. राजकी पक्षांच्या आयटी सेला प्रमाण, ते कित्या कितेंय बरयतात, उलयतात, अर्धसत्य सांगतात जाल्यार तांकां एंडेल दिवपाची गरज आसा! सोऱ्याक लागून खूब येणावळ मेळटा. तरीय उक्तडार तो पियेवप, मस्ती करप, गुन्यांव करप समा न्हय. पुलिसांक बारीक नदर दवरची पडटली. तांकां चड अधिकार दिल्यार ते आपलें काम वेवस्थीत करतले. जादा सुरक्षा रक्षक दवरल्यारूय बऱ्याक पडटलें. घुंवळे वखदां विकपी, कायदो पाळिनासतना साबार तरांचे वेव्हार करपी, खंडणी घेवपी, मागीर हप्ते दिवपी… हांचेरूय नियंत्रण जाय. सरकारी यंत्रणांनी थळाव्या लोकां कडल्यान उपाय मागयल्यार चड बरें. हेडगीं गोरवां, सुणीं, कोयर हांचो रोखडोच बंदोबस्त करूं येता. म्हयन्या भितर तें काम जावपाकूच जाय, अशें निर्देश पंचायती, पालिकांक दिवचे. टॅक्सीकारांचेर बरेच पर्यटक सोशल मिडियाचेर खर प्रतिक्रिया दीत आसतात. कदंब म्हामंडळान पसून प्रवाशां खातीर आतां कार्डां केल्यांत. आमचे टॅक्सीकार केन्ना तंत्रज्ञान स्विकारतले?
मौज, मजा मार्गाचेर भरकटिल्लें गोंय पर्यटन कुटुंबीक मळाचेर हाडपाचोय यत्न जावचो. संस्कृतीक, धर्मीक, वैजकी, सैम पर्यटनाकूय गती मेळची. सोशल मिडियाचेर गोंय पर्यटनाचेर टिका जाता. ती बंद जावपाक पावलां उबारचीं. अर्थांत सुदारणा घडोवन, चुकीच्यो गजाली काबार करून… सगल्यांत चड ताचीच गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
