भांगरभूंय | प्रतिनिधी
भांगरभूंय । प्रतिनिधी
फोंडेंः फोंडें तालुक्यांतल्या बेतोडें हांगा सध्या पियेवपाच्या उदकाचो उणाव जाला. सरकारान व्हो प्रश्न प्राधान्य दिवंन सुटावो करपाची मागणी गोंय प्रदेश युवक काँग्रेसान केल्या. युवक काँग्रेशीचे दक्षीण गोंय अध्यक्ष महेश नाडर हाणे गोंय युवक काँग्रेसचे मीडिया संयोजक देवसुरभी यदुवंशी हिच्या वांगडा बेतोडें वाठाराक भेट दिवंन परिस्थितीची पळोवणी केली.
फाटल्या कांय दिसां सावन बेतोडें वाठारांत उदका पुरवण जायना अशें थळाव्या लोकांनी नाडर हाका सांगलें. नळांक उदक येनाशिल्ल्यान लोकांक सामके त्रास काडचे पडटात. उदक ना तरी उदका बिलां भरचीं पडटात. उदका पुरवणेत सुदारणा जाली ना जाल्यार मोर्चा काडपाचे तयारेंत लोक आसात अशें नाडरान सांगले. दाब नाशिल्ल्यान नळांक उदक येना असें बांदकाम खात्याचे अधिकारी सांगतात. बेतोडें वाठारांत खात्या वतीत उदकाचो फकत एक टॅन्कर धाडटात. 150 घरांक ह्या उदकाची पुरवण करतात. लोकांनी घरां सामकार बॅरलां दवोरल्यांत. उदकाचो टॅन्कर खंय तरी उबो करतात. लोकांक सारकें उदक मेळटा कांय ना हें पळोवपाक कोणूय आसना अशें लोकांनी सांगलें.
सरकार फकत पूल आनी रस्ते बांदता. उदरगत दाखोवपाचो व्हो मार्ग न्हय. 2024चे लोकसभा वेंचणुकेंत भाजपाक सत्ते वयल्यान सकल देंवोवप होच देशाक वाटावपाचो एकूच मार्ग आसा अशें नाडर हाणे सांगलें. भाजपा लोकांक आभासी मळार दवोरता. सत्याक सामकार वचपाची सरकाराची तयारी ना अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
