भांगरभूंय | प्रतिनिधी
उजो पालोवपी दळान काडलो भायर; 10 हजारांचें लुकसाण
मडगांव: बड्डें फातोड्ड्यां सेंट ज्योकीं कपेला कुशीक आशिल्ल्या घराचेर गुलमोहराचें मोटें झाड पडलें. ह्या वेळार घराची फुडली आनी फाटली वाट बंद जाल्ल्यान एक जाण्टो मनीस घरांत आडकून पडिल्लो. मडगांव उजो पालोवपी दळान झाड कुशीक काडून जाण्ट्या मनशाक घरा भायर काडलो. हे घडणुकेंत धा हजारांचें लुकसाण जालें जाल्यार 50 हजारांची मालमत्ता वाटावपाक येस आयलें. तशेंच विवीध सुवातांनी घरांचेर झाडां पडिल्ल्यान आनीक 15 हजारांचें लुकसाण जाल्ल्याची नोंद आसा.
मडगांव उजो पालोवपी दळान बिरेस्तारा दीसभरांत झाडां पडिल्ल्यान सुमार स कॉल्स आयिल्ले. हातूंत घरांचेर झाडां पडून 25 हजारांचें लुकसाण जालें जाल्यार 3.30 लाखांची मालमत्ता वाटावपाक उजो पालोवपी दळाक येस आयलें.
दळा कडल्यान मेळिल्ले म्हायती प्रमाण, रुमडामळ मडगांवां सकाळीं आठ वरांचेर सीमा गावडे हांच्या घराचेर वडाचें झाड पडिल्ल्यान घराचें सुमार 15 हजारांचें लुकसाण जालें. जाल्यार दळान दोन लाखांची मालमत्ता वाटायली. माजोड्डें वाठारांत लुईसवाडो हांगासरल्या दामोदर देवळा कुशीच्या भितरल्या रस्त्यार झाड पडलें. हातूंत उजो पालोवपी दळान 30 हजारांची मालमत्ता वाटायली.
णव वरांच्या सुमाराक नावेली कुडचडकार हॉस्पिटलाचे फाटले वटेन घराचेर माड पडिल्ल्यान लुकसाण जालें. हातूंत दळान 50 हजारांची मालमत्ता वाटायली.
साडेणव वरांच्या सुमाराक मडगांव विशांत थिएटरा कुशीक रस्त्यार पणसाचें झाड हुमटून पडलें. तशेंच घोगळ जंक्शना कुशीक एक रानवटी झाड पडिल्ल्यान येरादारीक आडखळ निर्माण जाल्ली.
सवाय इकरा वरांच्या सुमाराक मडगांव मोहिद्दीन पेत्रोलपंपा कुशीक रानवटी झाड लायटीच्या सरयांचेर पडलें. हातूंत थोडो वेळ विजेचो प्रवाह खंडीत जाल्लो आनी येरादारीय आडखळून उरिल्ली. तशेंच सांजवेळा पाझरखणी कुंकळ्ळे रस्त्यार झाड पडून येरादारीक आडखळ निर्माण जाल्ली. कुंकळ्ळी उजो पालोवपी दळान झाड कुशीक काडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.