बडोद्याची तरन्नूम, मध्यप्रदेशाची प्रियंका खेळटलीं गोंया वतीन

भांगरभूंय | प्रतिनिधी

बडोदा क्रिकेट संघटना सोडून तरन्नूम पठाण हे 29 वर्सां पिरायेचे क्रिकेट खेळगडयेन प्रॉफेशनल क्रिकेटर म्हणून गोंय क्रिकेट संघटने वतीन खेळपाक पसंती दिल्या. तिच्या वांगडा फाटल्या दोन हंगामा सावन बडोद्याच्या 9 क्रिकेट खेळगडयांनी आपलो राज्य पंगड सोडला. 2023-24 क्रिकेट हंगामांत तरन्नूम पठाण गोंय बायलांच्या सिनीयर क्रिकेट पंगडाचें प्रतिनिधित्व करतली.

तरन्नूम पठाणा खेरीत गोंया वतीन अंदूंच्या हंगामांत मध्यप्रदेशाची दावखुरी स्पिनर प्रियंका कौशल ही लेगीत प्रॉफेशनल क्रिकेटर म्हणून खेळटली. गोंय क्रिकेट संघटनेचे मानद सचीव रोहन गांवस देसाय हाणें तरन्नूम पठाण आनी प्रियंका कौशल हीं दोगूंय अंदूंच्या हंगामांत गोंया वतीन खेळटले अशें सांगलें. ह्या दोगांयनी गोंय क्रिकेट संघटनेक ना हरकत दाखलो लेगीत सादर केल्ल्याचें देसाय हांणी म्हणलें.

एका सप्तका आदीं तरन्नूम पठाण हिची बडोदा क्रिकेट असोसिएशनान बडोद्या वतीन बीसीसीआयचे सर्तींत 100 विकेटी घेवपी बायल क्रिकेट खेळगडी म्हणून भोवमान केल्लो. अश्टतासांची तरन्नूम पठाण क्रिकेटीच्या सगल्या फॉर्मेटांत 200 विकेटी घेवपी बडोद्याची पयली बायल क्रिकेट खेळगडी आशिल्ली. उजव्या हातान बॅटींग आनी ऑफ ब्रेक बॉलींग करपी तरन्नूम पठाणाक बरी कामगिरी करून लेगीत सिनीयर पंगडांत सुवात मेळनाशिल्ली. अखेरेक बेजारून तिणें बडोदा पंगड सोडपाचो निर्णय घेतलो.

आपल्याक राज्य क्रिकेट संघटनेन क्रिकेटींत फुडार सरपाक केन्नाच मजत करूंक ना अशी खंत तरन्नूम पठाणान उक्तायली. ह्याच कारणाक लागून आपणेन बडोदा पंगड सोडपाचो निर्णय घेतलो अशें तिणें म्हणलें. बरे संदी खातीर आपणेन हो निर्णय घेतला अशें तिणें मुखार म्हणलें.

गोंया वतीन खेळपा खातीर ना हरकत दाखलो दिवपा केल्लो अर्ज केल्लो. पूण, बडोदा क्रिकेट संघटनेन दुसऱ्या दिसा दिलो. आतां मेरेन तरन्नूम पठाणा खेरीत पलक पटेल, ऋत्विशा पटेल, बिनायशा सुर्ती, जेनिता फर्नांडीस, हिमानी त्यागी, तनिष्का चौक्सी, चार्मी शहा आनी रिचा पटेल ह्या णव बायल क्रिकेट खेळगडयांनी फाटल्या दोन हंगामा खातीर बडोद्याचो पंगड सोडला.