भांगरभूंय | प्रतिनिधी
वडोदराच्या मोतीबाग क्रिकेट मैदानाचेर कालच्यान सुरू जाल्ले 19 वर्सां पिराये सकयले कुचबिहार क्रिकेट मॅचीच्या पयल्याच दिसा येजमान बडोदा पंगडान योंगा आड 6 विकेटी वगडावन 410 धांवड्यांचो दोंगर उबारलो.
टॉस जिखून गोंयान पयलीं बॉलींग करपाचो निर्णय घेतलो. ताचो हो निर्णय लेगीत योग्य थारिल्लो. गोंयान प्रतिस्पर्धी पंगडाचे 69 धांवड्यांचेर चार बॅट्समनांक तंबूत धाडिल्ले. गोंयचो मध्यमगतीचो बॉलर फरदीन खानान चारूय विकेटी घेतल्यो.
उपरांत जारवीरसिंग जाधवान एक बाजू सांबाळून धरतना नाबाद 177 धांवड्यांची खेळी करपा खेरीत भोयते आनी ध्रूव पटेल हांच्या वांगडा शेंकड्यांच्यो भागिदाऱ्यो करून बडोदाक मॅचींत हाडलो. जाधवान 264 बॉलांनी 20 चवके आनी दोन सके मारले. जाल्यार भोयतेन 55 बॉलांनी 83 धांवड्यांची खेळी केली. हातूंत णव चवक्यांचो आनी चार सक्यांचो आस्पाव आशिल्लो. ताचे खेरीत पटेलान 79 बॉलांनी 73 धांवड्यो केल्यो. ताणें 10 चवके मारले. राजवीरसिंगान पयलीं भोयते वांगडा पांचवे विकेटी खातीर 155 धांवड्यांची भागिदारी केली, ते उपरांत सवे विकेटी खातीर ध्रुव पटेला वांगडा मेळून 144 धांवड्यांची भागिदारी केली.
थोडे भितर धांवतकटोः बडोदा, (पयलो डाव) 90 ओव्हरींनी 6 बाद 410 धांवड्यो (नित्या पांड्या 29, भविश्य पटेल 14, प्रियांशू मोलिया 18, राजवीरसिंग जाधव खेळटा 177, भोयते 83, ध्रुव पटेल 73, पवन पटेल खेळटा 16 धांवड्यांचेर, फरदीन खान 4-63, यश कसवणकार 1-75).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
