भांगरभूंय | प्रतिनिधी
पणजी : पुलीस खात्यांतल्यान बडतर्फ केल्लो आयआरबी कॉन्स्टेबल निकेश च्यारी हाणें पोरणें गोंय वाठारांतल्यान दुचाकी चोरिल्ल्याचें मुखार आयलां. ह्या प्रकरणांत पोरणें गोंय पुलिसांनी ताचे आड गुन्यांव दाखल केला.
पोरणें गोंय पुलिसांनी दिल्ले म्हायती प्रमाण, ह्या प्रकरणांत जिनो सेबेस्टीन हाणें कागाळ दाखल केल्या. ते प्रमाण, ताणें सदां भशेन ताची हिरो मेस्ट्रो दुचाकी 15 मेक रातीं 11.30 वरांच्या सुमाराक कदंब बायपासा लागसार आशिल्ले अक्षत रेसिडेन्सींत घरा कडेन पार्क केल्ली. ते उपरांत सकाळीं दुचाकी चोरयेक गेल्ल्याचें कळ्ळें. ते प्रमाण, ताणें पोरणें गोंय पुलीस स्टेशनार कागाळ दाखल केली.
हे मजगतीं, पेडणें म्हालांतल्या तोरशे गांवांत बिरेस्तारा 17 जुलयाक सकाळीं वासंती रामा शेट्ये हिच्या गळ्यांतलें मंगळसुत्र कोंचून काडून फारायल्लें. ह्या प्रकरणांत मोपा पुलिसांनी अटक केल्लो निकेश च्यारी हाणें वयले दुचाकीचो वापर केल्ल्याचें मुखार आयलें. तशेंच ताणें दुचाकी रस्त्यार उडोवन रानांत पळ काडिल्ली. पुलिसांनी ती जप्त केल्ली. ह्या प्रकरणांत चवकशी केली तेन्ना दुचाकी पोरणें गोंय पुलीस स्टेशनाचे हद्दींतल्यान चोरी केल्ल्याचें कळ्ळें. ते प्रमाण मोपा पुलिसांनी पोरणें गोंय पुलिसां कडेन संपर्क करून वयली म्हायती दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
