भांगरभूंय | प्रतिनिधी
नवी दिल्ली, खबरां संस्था ः केंद्रीय अर्थमंत्री निर्मला सीतारामन 2025-2026 वर्साचो अर्थसंकल्प संसदेंत सादर केलो. सकाळीं 11 वरांचेर केंद्रीय अर्थमंत्री निर्मला सीतारमण हांच्या अर्थसंकल्पीय भाशणान अर्थसंकल्पाची सुरवात जाली. निर्मला सीतारामन हांणी सेगीत आठवें फावटी अर्थसंकल्प सादर केलो. ह्या वेळार अर्थमंत्री सीतारामन हांणी वेगवेगळ्यो घोशणा केल्यो. तांतूत किसान क्रेडीट कार्डा संबंदीं एक घोशणा जाली. शेतकारांक आतां शेतकी आनी पूरक साहित्य खरेदी करपा खातीर व्हड प्रमाणांत पयशे मेळटले.
किसान क्रेडीट कार्डांत व्हड बदल
केंद्र सरकारान किसान क्रेडीट कार्डाची मर्यादा 3 लाखां वयल्यान 5 लाखां मेरेन वाडोवपाचो निर्णय जाहीर केला. निर्मला सीतारामन हांणी प्रधानमंत्री धनधान्य येवजणेचीय घोशणा केल्या. देखून शेतकी मळार आतां आत्मनिर्भर भारताचो नारो दिला.
येवजणेचो व्हडलो फायदो
किसान क्रेडीट कार्ड येवजण सुमार 26 वर्सां आदीं सुरू जाल्ली. ही येवजण 1998 वर्सा सुरू जाली. हे येवजणे खाला शेतकी कामां खातीर शेतकारांक 9 टक्के व्याजदरान अल्पकाळ रीण दितात. तशेंच सरकार रिणावयल्या व्याजाचेर 2 टक्के सवलत दिता. वेळार रीण फारीक करपी शेतकारांक प्रोत्साहन म्हणून 3 टक्के सवलत दितात. हाचो अर्थ थारायिल्ल्या वेळा भितर रीण फारीक करपी शेतकारांक वर्सुकी फकत 4 टक्के व्याज दरान हें रीण दितात. 30 जून 2023 मेरेन अशें रीण घेवपी शेतकारांचो आंकडो 7.4 कोटी परस चड आशिल्लो. तांचेर 8.9 लाख कोटी रुपयां परस चड रिण आशिल्लें.
फाटल्या वर्सा इतले क्रेडीट कार्ड वांटले
बँको आनी गांवगिऱ्या अर्थीक संस्थांवरवीं क्रेडीट कार्डां वांटप जाता. नाबार्डाच्या डेटा प्रमाण, ऑक्टोबर 2024 मेरेन सहकारी बँकांनी आनी विभागीय गांवगिऱ्या बँकांनी देशभरांत 167.53 लाख किसान क्रेडीट कार्डां वांटली. तांची वट्ट क्रेडिट मर्यादा 1.73 लाख कोटी रुपया आशिल्ली. दुद डेअरी संबंदीत शेतकारांक 11.24 लाख कार्डां जारी केल्यांत. मजगतीं, तुर दाळ, उडीद दाळ आनी मसूर दाळ हांच्या उत्पादनाचेर खासा लक्ष दितली अशी घोशणा अर्थमंत्री निर्मला सीतारामन हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
