भांगरभूंय | प्रतिनिधी
वर्सावळीचें बजेट जालें. तशें बजेट म्हणटात तो एक अदमास, पयशे खंयच्यान आनी कशे येतले आनी ताचो विनियोग खंय आनी कसो करपाचो हाचो अदमास मांडपाचो. तशें बजेटान सांगतात तसोच खर्च जाता अशें ना. बजेटान थारायता ते प्रमाण पयशे येतात अशेंय ना. पूण सरकार खंयचे वाटेन आनी कसो प्रवास करूंक सोदता हाचो अदमास बजेटा वेल्यान कळटा. तर अर्थ मंत्र्यान बजेट मांडलें. आतां ताचेर चर्चा जातली आनी जे अर्थीं सरकारी पक्षा कडेन मेजोरिटी आसा ताचो अर्थ बजेट सहज पास जातलें. म्हणटकूच बजेट जालें म्हणपाक हरकत ना. म्हजे सारक्याक ह्या बजेटांत कितें आसतलें काय? आनी हांतल्यान आमच्या बोल्साक कितली कातर लागतली काय हें जाणून घेवपाची एक उमळशीक आसताच. आतां बजेट जालें म्हणटकूच कोणाक कितें मेळ्ळें तें पळोवप गरजेचें काय दिसता.
आमची नदर आसता ती आयकरांत कितली सूट मेळटा काय ना हाचेर. पूण ह्या बजेटांत आयकर स्लेबाक मातूय हात लावंक ना म्हणटकूच आमकां कांय मेळ्ळें ना असोच ताचो अर्थ. पूण दुसरे वटेन आयकरांत कर वाडोवपाचोय बदल केलो ना आनी आयकर वाडयलो ना हाची खोशी आसाच. ते खातीर अर्थ मंत्र्यांचे उपकार मानचेच पडटले. आमकां कांय मेळ्ळें ना तें बरें आसा पूण आमच्या राज्याक तरी कितें मेळ्ळें? ना! गोंयच्या तोंडाक पानांच पुसलीं म्हणचें पडटलें. सत्ताधारी आमकां इतले कोटी मेळटले आनी तितले कोटी मेळटले म्हूण सांगून आमच्या दोळ्यांक उदक लावपाचो कितलोय येत्न करूं पूण गोंय सुकेंच उरलें हें सत मानून घेवचेंच पडटलें. ज्या नव्या जिल्ह्याक चारशीं कोटी मेळटले म्हणपाचें सरकार सांगतालें तेंय वजें आतां गोंयकारांच्याच माथ्यार पडपाचें म्हणपाचें स्पश्ट जाता. कालूच मुख्यमंत्र्यान सांगलां ते प्रमाण नव्या जिल्ह्याक पांचशें कोटी रीण मेळटलें. रीण काडून आमचें सरकार सण करतलें असोच हाचो अर्थ. फकत ह्या रिणाक ज्यूर दिवचें पडचें ना इतलेंच समाधान. पूण मुदल फारीक करचीच पडटली मूं? गोंयकारांच्याच माथ्यार मूं हें रीण?
नासल्यार शेजारच्या राज्यांक पळे कशे हात सोडून दिलां तें. महाराष्ट्राक फकत रेल्वे सुदारणा करपाक चोवीस हजार कोटी. रेल्वे ही महाराष्ट्राची जिवनरेशा हातूंत दुबावूच ना. सुदारणेची गरज आसाच पूण एक नवो जिल्हो जाता ताका पांचशें कोटी ना आनी हांगा तर चोवीस हजार कोटी. ल्हान राज्यांचोय विचार जावंक जाय न्ही? एकल्याक हजारांनी कोटी आनी दुसऱ्याक शेंकडोय ना अशें कशें? तशेंच ज्या राज्यांनी वेंचणुको तोंडार आसा तांकांय भरपूर मेळ्ळां. हें बजेट म्हणल्यार वेंचणुकांची तयारी बी न्हय मूं? असो दुबाव येवंक येता. सगले प्रकल्प त्याच वाठाराक गेल्यात. आतां ते खऱ्यांनीच पुराय जातले काय वेंचणुकेंत मना सारकें जैत मेळ्ळें ना जाल्यार फायलिंतूच उरतले हेंय पळोवचें पडटलें. हेर राज्यांनीय बेकारी आसा, तांकांय काम दिवंक जाय म्हणून थंयूय एखादो प्रकल्प व्हरचो हें अर्थ मंत्र्यांक सुचूं नाका आसलें?
कोणे तरी एकल्यान फेसबुकार एक पोस्ट घाला. तातूंत ताणें अर्थ मंत्र्यांक टॅक्स की रानी म्हणलां. तशें पळोवंक गेल्यार अशें म्हणटल्याची चूक म्हणूंक जावची ना. अर्थ मंत्री बजेट मांडटा तेन्ना सगल्यांचें लक्ष शेर मार्केटाचेर लागिल्लें आसता. बजेटाचें पडबिम्ब शेर मार्केटांत सारकें बरें दिसता. म्हणून तर आयतार आसुनूय शेर मार्केट उक्तें आसलें आनी अर्थ मंत्र्यांचे एकेच घोशणेन चारशें पॉयंट वयर आशिल्लें मार्केट बाराशें पॉयंट देंवलें. कित्याक जालो इतलो बोवाळ? मार्केट कोसळपाक अशें कितें घडलें? तर अर्थ मंत्र्यांनी एसटीटी (सेक्युरिटी ट्रांन्सेक्शन टॅक्स) देडशें प्रतिशें वाडयलो. पयलीं 0.2 प्रतिशें आशिल्लो तो 0.5 प्रतिशें केलो. हांतल्यान सरकाराक धा हजार कोटी चड येणावळ मेळटली असो अदमास आसा. पूण हाचो परिणाम वेगळोच जालो. वेपऱ्यांक तो जड दिसलो आनी परिणाम शेर मार्केटांत रोखडोच दिसलो. खिणांत लोकांचे धा लाख कोटी गेले. खरें म्हणल्यार हो टॅक्स लायिल्लो कॅपिटल गेन टॅक्स उणो करचो वा काडून उडोवचो म्हणून. पूण केपिटल गेन परतो चालू केलो पूण हो एसटीटी मात तसोच उरलो. डबल इंजीन आसता तशें डबल टॅक्सेशन. आनी वेल्यान आतां तो वाडयला. खंयचोय टॅक्स लायतना तात्पुरतो म्हणून लायतात पूण एकदां लागलो म्हणजे तो उरलोच. बांगला झुजा वेळार रेव्हन्यू स्टँप आयलो. झूज सोंपलें म्हणजे हो स्टँप बंद जावंक जाय आसलो. पूण तो अजून आसा फकत पांच पयश्यां जाग्यार एक रुपया जाला.
ज्या कारणाक लागून एसटीटी लायिल्लो त्यो सगल्यो सवलती सरकारान काडून उडयल्यात. तरिपूण टॅक्स चालूच आसा. सरकाराक मेळटा तितली येणावळ उणीच दिसता. डिव्हिडंडाचेर टॅक्स लागता. लाँगडर्म केपिटल गेनाचेर टॅक्स लागता आनी सद्याक तर सरकार दोट्टी टॅक्स वसूल करता. उपाय नासून लोकांक तो भरचोच पडटा. विमो म्हणटा तो जाणटेपणांतली तशेंच अकस्मात जावपी दुर्घटणे खातीर केल्ली तजवीज. घरांतल्या जोडकाराक कितेंय जाल्यार ताचेर अवलंबून फामिलीक जगपाक त्रास जावचे न्ही म्हणून केल्ली तरतूद. सद्याचें सरकार त्याच पयश्यांचेर कर घेता. तोय दोट्टी. सुरवेक विमो काडटना जिएसटी आनी पयशे परत घेतना आयकर. जगपाचेरूय कर आनी मरपाचेरूय कर. सामान्य मनशाक जगप नाका करून उडयलां म्हणल्यार जाता. तातूंत एकूच बरें केलां तें म्हणल्यार अपघाती विम्या वेलो टॅक्स काडून उडयला. फायदो केला तो फॉरेन टूर करतल्यांक आनी विदेशांत शिक्षण घेतल्यांक. अर्थ कळ्ळो? दुडवांकारांक सवलती आनी सामान्यांच्या बोल्साक कातर.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
