भांगरभूंय | प्रतिनिधी
भारताचो स्टार मल्ल बजरंग पुनियान जबरदस्त प्रदर्शन करून 65 कील वजन गटांत भांगरा पदक जिखलें. ताणें कॅनडाच्या 21 वर्सां पिरायेच्या लॅचलीन मक्नेलाक हारयलो.
बजरंगान मॅक्नेलाक 9-2 फरकान हारयलो. बजरंगाचें हें राष्ट्रकूल खेळां सर्तींतलें सेगीत तिसरें पदक थारलें. ताणें 2018तले गोल्ड कोस्ट राष्ट्रकूल खेळां सर्तींत लेगीत 65 कील वजन गटांत खेळटना भांगरा पदक जिखिल्लें. जाल्यार 2014तले ग्लास्गो राष्ट्रकूल खेळां सर्तींत ताणें रुप्या पदक जिखिल्लें.
बजरंगाच्या ह्या भांगरा पदकाक लागून भारताचें पदक तकट्यांत आतां सात भांगरा पदकां जालीं.
65 कील वजन गटांत भांगरा पदकाचो मुख्य दावेदार आशिल्ल्या बजरंगान पयले फेरये पसून आपलो शेक दवरलो. ताणें पयल्या सत्रांत 4 गूण मेळयत व्हड आघाडी घेतली. ते उपरांत मॅक्नेलान दुसऱ्या डावांत आक्रमक खेळी करीत दोन गूण मेळयले.
ते उपरांत बजरंगान मॅक्लेनाक रिंगच्या भायर धुकलून दोन गूण मेळयत परत चार गुणांची आघाडी घेतली. बजरंगान प्रतिस्पर्धी खेळगड्याच्या पांयाचेर सेगीत आक्रमण केलें. ताणें परतून रिंगेंतल्यान भायर धुकलीत एक गूण मेळयलो. मॅच सोंपता सोंपता बजरंगान आनीक दोन गूण मेळयत मॅच 9-2 फरकान जिखली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
