भांगरभूंय | प्रतिनिधी
गोंय कर्मचारी भरती आयोगाची जायरात
अर्ज करपाची निमाणी तारीख 8 ऑगस्ट
अर्ज ऑनलायन स्वरूपात सादर करप गरजेचें
सगल्या पदां खातीर कोंकणीचे गिन्यान सक्तीचें
भांगरभूंय । प्रतिनिधी
पणजी : अकावंटंट, सहाय्यक शुल्क अधिकारी, कनिश्ठ अभियंता मेळून तरेकवार 19 तरांच्या 439 पदां खातीर गोंय कर्मचारी भरती आयोगान जायरात दिल्या. ऑनलायन स्वरुपांत अर्ज भरपा खातीर 8 ऑगस्ट 2025 ही निमाणी तारीख आसा. अर्ज करपा खातीरच्यो सुचोवण्यो, शिक्षणीक पात्रताय तशेंच अटींची म्हायती https://gssc.goa.gov.in ह्या संकेतथळाचेर उपलब्ध आसा.
सगल्यां खात्यांनी कर्मचाऱ्यांची भरती आतां गोंय कर्मचारी भरती आयोगा वरवीं जाता. अंदूंच्या वर्सा बंपर भरती खातीरची ही दुसरी जायरात आसा. हे पयली मे म्हयन्यांत सहाय्यक शिक्षक, ग्रंथपाल, पीएसआय मेळून पदां भरपा खातीरची जायरात आयोगान दिल्ली. ह्या पदां खातीर अर्ज करपाची मुजत सोंपल्या. मात परिक्षा जावपाची आसा. आतां अंदूंच्या वर्साची दुसरी जायरात आयोगान जारी केल्या.
चडशीं पदां अभियंत्यांचीं
जायरात दिल्ल्या 439 पदांतलीं अर्द्यां परस चड म्हणल्यार 245 पदां कनिश्ठ अभियंत्यांचीं आसा. भौशीक बांदकाम, वीज खातें, ग्रामीण उदरगत, उदका पुरवण, शेतकी आनी पंचायत संचालनालया खातीर कनिश्ठ अभियंत्यांची भरती जातली.
भौशीक बांदकाम खात्यांत मेकॅनिकल आनी इलेक्ट्रिकल मेळून 25 कनिश्ठ अभियंत्यांची भरती जातली. संबंदीत (मेकॅनिकल/इलेक्ट्रीकल) फांट्यांत पदवी वा पदविका अभ्यासक्रमा सयत कोंकणीचें गिन्यान ह्या पदां खातीर गरजेचें आसा. एससी – 1, एसटी – 2, ओबीसी – 2, इडब्ल्यूएस- 5 पदां राखीव आसात. सामान्यां खातीर 15 पदां आसात. हाचे भितर 2 पदां दिव्यांगां खातीर आसात.
कनिश्ठ अभियंत्यांची (वीज) 88 पदां वीज आनी ग्रामीण उदरगत खात्यांत जाहीर जाल्यात. 88 तलीं 87 पदां वीज खात्यांत जाल्यार 1 पद ग्रामीण उदरगत खात्यांत आसा. 88 तलीं एसटी- 10, एससी- 1, ओबीसी- 23, ईडब्ल्यूएस- 8 जाल्यार सामान्यां खातीर 46 पदां आसात.
कनिश्ठ अभियंते (सिवील) 132 पदां आसात. भौशीक बांदकाम खात्यांत 77, शेतकी खात्यांत 2, वीज खात्यांत 1, पंचायत खात्यांत 10, उदका पुरवण 39 आनी ग्रामीण उदरगत खात्यांत 3 मेळून 132 पदां आसात. एसटी- 16, एससी- 1, ओबीसी- 33, ईडब्ल्यूएस- 15 आनी सामान्य गटांत 67 पदां आसात.
वेवसायीक शुल्क खात्यांत 43 पदां
वेवसायीक शुल्क खात्यांत (कमर्शियल टॅक्स) सहाय्यक शुल्क अधिकाऱ्यांचीं 9 जाल्यार शुल्क निरिक्षकांचीं 34 पदां भरपा खातीर जायरात दिल्या. दोनूय पदां खातीर वाणिज्य फांट्यांत पदवी गरजेची आसा. सहाय्यक शुल्क अधिकाऱ्यांच्या 9 पदांतलीं एसटी- 2, ओबीसी- 4, ईडब्ल्यूएस 1 जाल्यार सर्वसामान्यां खातीर 2 पदां आसात.
राज्य शुल्क निरिक्षकांचीं (टॅक्स इन्स्पेक्टर) एसटी- 4, एससी- 1, ओबीसी- 10, ईडब्ल्यूएस 2 जाल्यार सामान्य गटा खातीर 17 पदां आसात.
लायनमॅन 35 आनी मिटर रिडरांचीं 31 पदां
वीज खात्यांत लायनमॅनांचीं 35 जाल्यार मिटर रिडरांचीं 31 पदां भरपा खातीर जायरात दिल्या. तशेंच स्टेशन ऑपरेटराचीं 35 पदां भरपाचीं आसात. वायरमॅना खातीर एनसीव्हीटीचें इलेक्ट्रिशियन प्रमाणपत्र जाल्यार मिटर रिडरा खातीर आयटीआय इलेक्ट्रिशियन ट्रेड प्रमाणपत्र गरजेचें आसा. लायनमॅनांच्या 35 पदांतलीं सामान्यां खातीर 20, एसटी 3, ओबीसी 9 आनी ईडब्ल्यूएस खातीर 3 पदां राखीव आसात.
मिटर रिडरांच्या 31 तलीं एसटी 2, एससी 1, ओबीसी 7, इडब्ल्यूएस 3 जाल्यार सामान्यां खातीर 18 पदां आसात.
स्टेशन ऑपरेटरांच्या 35 पदांतलीं एसटी 3, एससी 1, ओबीसी 10, ईडब्ल्यूएस 3 जाल्यार सामान्य गटांत 18 पदां आसात.
लेखा संचालनालयांत अकावंटंटांचीं 22 पदां
लेखा संचालनालयांत अकावंटंटांच्या 22 पदां खातीर भरती जातली. ह्या 22 पदांतलीं सामान्यां खातीर 16 पदां जाल्यार एसटी 1, ओबीसी 4, ईडब्ल्यूएस 1 पद राखीव आसा. अकांवंटंट पदा खातीर वाणिज्य वा कला फांट्यांत इकोनॉमिक्स विशया सयत पदवी तशेंच कोंकणीचे गिन्यान सक्तीचें आसा. शेतकी खात्यांत एक्स्टेंशन ऑफिसरांचीं 12 पदां, पुलीस खात्यांत एएसआय (वायरलेस ऑपरेटर) 3 पदां, मेकॅनीक 1 (नुस्तेमारी खातें), शेती सहाय्यक 5 पदां (शेतकी आनी गोरवां सांबाळ खातें), इलेक्ट्रिशियन 1 पद, सहाय्यक इलेक्ट्रिशियन 1 पद, सहाय्यक मेकॅनीक 2 पदां, सहाय्यक लायट ऑपरेटर 2 पदां जाल्यार हेल्पर (इलेक्ट्रिशीयन) 1 पद भरपा खातीर जायरात दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
