बंधनां फक्त बायलांचेरूच कित्याक?

भांगरभूंय | प्रतिनिधी

आ यज 21 व्या शेंकड्यांत दादलो आनी बायल असो कसलोच भेद उरिल्लो ना. आयज बायलांय दादल्यांचे बराबरीन सगल्या मळार मुखार आसात. अशें खंयचेंच मळ ना जंय बायलां दादल्यांची बराबरी करूंक शकनात. कला, खेळ, राजकारण, समाजकारण, अर्थकारण, विज्ञान, तंत्रज्ञान, शिक्षण, साहित्य अशा सगल्याच मळार बायलां दादल्यांच्या खांदाक खांदो लावन काम करतात. पूण समाजांत आयजूय असो एक घटक आसा जांकां बायलांची जाल्ली उदरगत खटकत आसा. आयजूय तो घटक बायलांक फक्त ‘चूल आनी मूल’ हाचे पुरतोच मर्यादीत दवरूंक सोदतात, म्हणूनच हे सनातनी विचारांचे प्रतिगामी लोक बायलांक सेगीत ह्या ना त्या कारणा वेल्यान ट्रोल करीत आसतात. केन्ना ते बायलांच्या केंसाचे भुशे वेल्यान ट्रोल करतात जाल्यार केन्ना ते बायलांक तांच्या वेशभुशे वेल्यान ट्रोल करतात.
आयच्यो चलयो चल्या प्रमाण कपडे घालतात. जिन्स पॅण्ट, टी शर्ट घालतात. तांची जिन्स पॅण्ट धोंपराचेर पिंजिल्ली आसता. हाची तिडक तांकां येता. जाल्यार केन्ना चलयेच्या नटपा वेल्यान मुरगडपा वेल्यान तांकां तिडक येता. बायलांक ट्रोल करपाक समाजांतले प्रतिश्ठीत घटकूय फाटीं नासतात. बायलां धोंपराचेर पिंजिल्ली जिन्स घालतात हे कसले संस्कार? असो प्रस्न मदेकाद उत्तरांचलच्या मुख्यमंत्र्यांनी जाहीर सभेंत विचारिल्लो. फक्त हेच महाशय न्हय जाल्यार खूबशे जाण बायलांचे वेशभुशे वेल्यान तांकां टार्गेट करीत आसतात. तशें पळोवंक गेल्यार कोणे कसले कपडे वापरचे हो जाचो ताचो प्रस्न. भौशीक सुवातेर धोंपराचेर पिंजिल्ली जिन्स पॅण्ट फक्त बायलांच घालतात? दादलेय पिंजिल्ली जिन्स घालतात. बरमुडा वा शॉर्ट पॅण्ट घालून गांवभर भोंवतात. पूण तांच्या कपड्याचेर कोणूच आक्षेप घेनात. म्हणल्यार दादल्यांनी कसलेय कपडे वापरत जाल्यार तें चलता. पूण बायलांक तें स्वातंत्र्य ना. बायलांक मात तांचे आवडीचे कपडे घालपाक बंदी.
मागीर प्रस्न येता तो असो की बंधनां फक्त बायलांचेरूच कित्याक? बायलांनी कसले कपडे घालचे हें थारावपाचो अधिकार दादल्यांक कोणे दिलो? बायलांनी कसले आनी कशे कपडे घालचे, बायलांनी खंय भोंवचें, कितें खावचें, कितें पियेवचें हें दादल्यांनी थारावचें ही तर अठराव्या शेंकड्यांतली मानसिकताय जाली. 21 व्या शेंकड्यांतूय बायलांक समान अधिकार मेळनात, तांकां तांच्या अधिकारा खातीर झगडचें पडटा ही दुर्दैवी गजाल आसा. बायल, दादलो समानता ही फक्त उलोवपा पुरतीच आसा. हेंच ह्या मानसिकतेंतल्यान दिसून येता. संवसारांत एके वटेन बायलांक समान अधिकार मेळचे हे खातीर चळवळ उबी करतात, जाल्यार आमचे कडेन बायलांनी कशें रावचें, तिणें कसले कपडे आनी कशे घालचे हाचेर चर्चा करतात. प्रस्न बायलांनी कशे आनी कसले कपडे घालपाचो हो नासून प्रस्न तांच्या निवडीच्या स्वातंत्र्याचो आनी बायलांच्या मानवी हक्काचो आसा. हे कोण कोणेच हिरावन घेवचे न्हय.
बायलां धोंपराचेर पिंजिल्ली जिन्स घालतात, मोटवे कपडे घालतात म्हणून तांचेर लैंगीक अत्याचार जातात असो तर्क काडटात. बायलां सांजवेळा भोंवपाक वतात म्हणून तांचेर बलात्कार जातात असोय दावो तथाकथीत संस्कृती रक्षक करतात. पूण ते सोयिस्करपणान हें विसरतात की आमच्या देशांत आंगभर कपडे घाल्ले साठ सत्तर वर्सा पिरायेचे जाण्टेलेचेर लेगीत बलात्कार जाता. विकृत मानसिकताय आशिल्ले लोक आंगभर कपडे घाल्ल्या बायलां कडेन लेगीत विकृत नदरेन पळयतात. आंगभर कपडे आसूं वा मोटवे कपडे आसूं जांची मानसिकताय विकृत आसा त्या नराधमांक बायलां फक्त भोगवस्तू अशेंच दिसता. बायलांच्या कपड्यांचेर उलोवचे बदला ही दादल्यांची मानसिकताय बदल्ली जाल्यार देशांत बायलांचेर जावपी अत्याचाराच्यो घडणुको घडच्यो नात.

श्याम ठाणेदार
9922546295