भांगरभूंय | प्रतिनिधी
लायनमॅन मरण प्रकरण : पांच अभियंत्यांचो पंगड करता तपास
भांगरभूंय । प्रतिनिधी
पणजी : लायनमॅनाक शॉक आयलो तेन्ना बंद लायनी वयल्या ट्रान्सफॉर्मरांत वीज प्रवाह कसो आयलो, हाचो खात्याच्या पांच अभियंत्यांचो पंगड तपास करतात. काम चालू आशिल्ल्या ट्रान्सफॉर्मरांतल्यान वीज पुरवण जावपी घरांचे मिटर तशेंच उपकरणांची तपासणी जातली. संबंदीत ट्रान्सफॉर्मराचेर एक वरा परस चड वेळ काम केल्या उपरांत लायनमॅनाक शॉक आयला. शटडावना उपरांत काम सुरू जालें तेन्ना खंयचेच सरये भितर वीज प्रवाह (करंट) नाशिल्लो, अशी म्हायती तपास करपी अभियंत्यांनी दिली.
मडगांवच्या एमआरटी (मिटर रिले अॅण्ड टेस्टींग) पंगडाचे मजतीन अभियंते मिटरांची तपासणी करतले. कांय मिटरांची तपासणी जाल्या. जी तपासणी जाल्या तातूंत फॉल्ट मेळूंक ना. पावसाक लागून काम करपाक आडखळी येतात, अशी म्हायती खात्याचे अधिक्षक अभियंते शैलेश बुर्ये हांणी दिली.
खात्याचे मुखेल अभियंते स्टीफन फर्नांडीस हांणी तपासणी करपा खातीर अभियंत्यांचो पंगड स्थापन केला. हो पंगड दर दिसा तपासणेच्या कामाचो अहवाल मुखेल अभियंत्याक सादर करता. मिटरांचें रिडींग, विजेचो वापर हाचे आंकडे घेवन विश्लेशण सुरू आसा. विजेचे मिटर बसोवपा सयत तांचे तपासणीचो वावर खात्याचो एमआरटी फांटो करता. हाका लागून आयज शुक्रारा एमआरटी फांट्याचे अधिकारी मिटरांची तपासणी करतले, अशी म्हायती तपासणी करपी अभियंत्यां कडल्यान मेळ्ळी. शॉक आयलो त्या वेळार ट्रान्सफॉर्मरांत वीज प्रवाह येवपाचो उगम (सोर्स) कळपाक जाय. हाचे उपरांत दोश कळपाक मजत जातली, अशें तांणी सांगलें.
होंडा – सत्तरी वाठारांत मंगळारा दनपारां शॉक येवन चंद्रू गांवकार ह्या लायनमॅनाक मरण आयलें. शॉक लागून आनीक एक लायनमॅन गंभीर जखमी जालो. शटडावन केले उपरांत ट्रान्सफॉर्मर तशेंच लायनींत वीज प्रवाह येता काय ना, हाची तपासणी जाल्ली. खंयच वीज प्रवाह ये नाशिल्ल्यान लायनमॅनानी दुरुस्तीचो वावर सुरू केल्लो. बरोच वेळ ट्रान्सफॉर्मराचेर तीन लायनमॅन काम करताले जाल्यार हेर लायनमॅन हेच लायनीचेर दुसरी कडेन काम करताले. हे स्थितींत एका ट्रान्सफॉर्मरांत अचकीत वीज आयली आनी लायनमॅनाक शॉक आयलो. ट्रान्सफॉर्मराचें वायडींग तशेंच सरयो तपासून दुरुस्त करतना कांय वेळार हॅण्ड ग्लोवज काडचेच पडटात, अशी म्हायती अभियंत्यांनी दिली.
एमआरटीचे अधिकारी करतले तपासणी
वीज खात्याचो मडगांवां आशिल्लो एमआरटी (मिटर रिले अॅण्ड टेस्टींग) फांटो मिटरांची तपासणी करता. ह्या फांट्याचे अधिकारी मिटरांची तपासणी करपाक मजत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
