भांगरभूंय | प्रतिनिधी
अखेरेक भुरग्यांक सोशल मिडिया वापराचेर बंदी घालपी आॅस्ट्रेलिया पयलो देश थारला. 16 वर्सां सकयल्या भुरग्यांक फेसबूक, इन्स्टाग्राम, एक्स, टिकटाॅक, स्नेपचॅट, रेडिट आनी हेर सोशल मिडिया वापरपाक मेळचेनात. ही बंदी चालीक लावपाक कंपनींक एक वर्साची मुजत दिल्या. उपरांत भुरग्यांनी खातें उक्ते केलां अशें दिसलें जाल्यार सोशल मिडिया कंपनीक उणोच 3 कोटी 20 लाख अमेरिकन डाॅलर दंड दितले. भारतीय चलनांत ही रक्कम 2 अब्ज 70 कोटी रुपयां वयर वता. कंपनींक हातूंत फटको बसपाचो आशिल्ल्यान त्यो बंदीक पाळो दितल्यो, अशें दिसता. पूण खंयतरी पळवाट ही आसतलीच!
भुरग्यांक सोशल मिडिया बंद करपाच्या विधेयकाक बालहक्क संघटणांनी विरोध केला. पालकांनी मात येवकार दिला. सिनेटांत हें ‘सोशल मिडिया मिनिमम एज बिल’ 34 आड 19 मतांनी मंजूर जालें. हावस आॅफ रिप्रेझेंटेटिव्हसान तें 102 आड 13 मतांनी मानून घेतलें. हाचो अर्थ चडशे बंदी घालपाचे वटेन आसात. हेर देशांनी अजून प्रतिक्रिया दिवंक नात. मात, संवसारांतल्या कडव्या देशांचो हाका येवकारूच आसतलो. थोड्यांनी सोशल मिडियाचेर खूब निर्बंध घाल्यात. तर चीनांत तांचे स्वताचे वेगळे सोशल मिडिया प्लॅटफाॅर्म आसात. फ्लोरिडांतूय 14 वर्सां सकयल्या भुरग्यांक बंदी केल्ली. मात तें प्रकरण सध्या न्यायालयांत आडकलां. फ्रान्स, अमेरिकेंतल्या कांय राज्यांनी पालकांचे परवानगीन सोशल मिडिया खातें उक्तें करूंक मेळटा. पूण हें आॅस्ट्रेलियन विधेयक सगल्या देशां परस खर आसा.
सोशल मिडिया वापरतात, त्या भोवतेक नागरिकांक तांचें वेसन लागलां. 2019 वर्सा भारतांत 3 कोटी 51 लाख लोक सोशल मिडिया वापरताले, आतां आंकडो 5 कोटींक तेंकला. आमच्या देशांत फेसबूक ही सगल्यांत लोकप्रीय सायट. चीनांत सोशल मिडिया वापरप्यांचो आंकडो सध्या 1 अब्ज 07 कोटी इतलो आसा. हातूंत आंतरराष्ट्रीय आनी तांच्या स्वताच्या सायटींचो आस्पाव आसा. फुडल्या पांच वर्सांत हो आंकडो 1 अब्ज 30 कोटींक तेंकपाचो दुबाव आसा. चीन नंबर वन. उपरांत भारत, अमेरिका आनी इंडोनेशिया. हाचे वयल्यान सोशल मिडियान संवसाराक कशें पिशें लायलां ताचो अदमास येतलो.
सोशल मिडियाक लागून भुरग्यांचेर शारिरीक, मानसीक परिणाम जाता, हाचेर फक्त भारतांतूच न्हय, तर पुराय संवसारांत चर्चा जाता. कांय भुरगीं रातदीस मोबायलाचेर कितें तरी धवळीत आसतात. चडशे मनोरंजनाचे व्हिडियो. गिन्यान, म्हायती दिवपी व्हिडियो वा मजकुराचे मोगी उणेच. तातूंत बुरश्या डेटाचो शिंवर. गुन्यांवकारी गजाली जातात, ताका लागून आॅस्ट्रेलियेंतले पालक भियेल्यात. ह्या विधेयकांत भुरग्यांक वेवसाय वा सेवे विशींच्यो “पेजी” पळोवपाक मेळटल्यो. पालकांक दंड आसचो ना. संदेश धाडपाचे अॅप, भलायकी शिक्षणा खातीरच्यो सायटी भुरग्यांक वापरूंक मेळटल्यो. जाणकारांच्या मतान ह्या बंदीचो व्हडलोसो फायदो जावचो ना. कारण भुरगीं चड हुशार आसतात. सध्या कांय भुरगीं गुगल डाॅक्सचो वापर सोशल मिडिया प्रमाण करतात अशें दिसून आयलां. म्हणटकच पालकांक तीं कितें करतात, ताचेर नदर दवरची पडली. भारतांत बरींच भुरगीं पालकांचो फोन वापरतात. स्वताचो फोन आसल्यार पालकांचो डेटा घेतात. थोड्याच भुरग्यांक पालक डेटा घेवपाक पयशे दितात.
भुरगीं सोशल मि़डिया खातें उक्तें करतना खरी पिराय घालतलीं कित्या वेल्यान? कंपनींनी आयडी प्रूफ मागल्यार तें खाजगी म्हायती एकठांय करपा सारकें जालें. ताका कायदो परवानगी दिना. भुरगीं बोगस नांवान अकावंट उक्तो करचींच ना, हाची खात्री कोण दितलो? तरीय भुरग्यांक सोशल मिडिया वापरपाक निर्बंध येवंक जाय. कारण फायद्या परस लुकसाणूच चड आसा. इंटरनेट वापरून बरें- बरें पळोवं येता, वाचूं येता. शिक्षण, करियर, वेवसाया खातीर वापरूं येता. पूण, वायट गजालीं खातीर ताचो चड वापर जावं येता. बरी गजाल पळोवंक ना, वाचूंक ना जाल्यार कोणाकूच घातक थारूं येता अशें लुकसाण जावचें ना, मात एक वायट गजाल तुमचें करियर, जिवीत इबाडपाक शकता. तुमी जोडिल्लें सगलें (पयशे न्हय) व्हगडावन बसपाक शकतात. तेन्ना इंटरनेट वा सोशल मिडियाचो वापर करतना आपणाक ताचें वेसन लागचें ना, ताचे भकीक पडचो ना, हाचें भान दरेकल्यान दवरपाक जाय. 16 वर्सा सकयल्या भुरग्यांनी सोशल मिडिया पळोवंक मेळना, ह्या निर्णयान निरशेवंक जायना. उरफाटें जालें तें बरेंच जालें अशें समजून मैदानी खेळ खेळपाक जाय, छंद पुराय करपाक जाय. वाचन, संगितांत लक्ष घालपाक जाय. नव्यो कला, कुशळटायो शिकपाक जाय…. सोशल मिडियाचेरूच बंदी घाल्या, इंटरनेट वापरूंक न्हय. ताचेर शिक्षणीक सायटी पळयल्यार, फायदोच जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
