बंदी यशस्वी जातली ??

भांगरभूंय | प्रतिनिधी

सरकाराच्या निर्णया उपरांत थंयच्या पालकांचेर व्हडली जापसालदारकी येतली. कारण, चडशा भुरग्यांक सोशल मिडियाचें वेसन लागलां.

खंयचीय बंदी केन्नाच यशस्वी जायना. ती घालतकच ते गजाली विशीं लोकांक चड उमळशीक लागता आनी तिचे वाटेक वचपाची शक्यताय नाशिल्लोय ते वाटेर चलपाची भिरांत आसता वा दुसऱ्या रुपान ती गजाल चालू उरपाक शकता. बुरश्या वॅबसायटीचेर सरकारान बंदी घाल्या, तरीय तांचो वापर वाडला. सोऱ्याचेंच उदाहरण घेयात. ज्या राज्यांनी ताचेर बंदी आसा थंयच विखारी सोरो पियेवन लोक मरपाच्यो चड घडणुको घडटात. भावना दुखोवपी सिनेमांचेर बंदी घालून वा ते पळोवचे न्हय म्हूण देशव्यापी मोहीम चलोवनूय ते सुपरहीट थारिल्ल्याच्यो देखी आसात. म्हणटकच बंदी हो तसो रामबाण उपाय न्हय. पूण ते गजालीच्या नांकांत दावें घालपाक जाय, ताचे वायट परिणाम समाजाक सांगपाक जाय. लोक ते बाबतींत शिक्षीत जाले, स्वताचो मेंदू वापरूंक लागले जाल्यार मानसीक भलायकी, लुकसाण वाटायतले. बऱ्या वांगडा वायटूय परिणाम करपी एक माध्यम म्हणल्यार सोशल मिडिया. भुरग्यांक तिचे पसून पयस दवरपाचो विचार आतां आॅस्ट्रेलिया करता!!
16 वर्सां सकयले पिरायेच्या भुरग्यांक सोशल मिडिया बंद करपाचो विचार आॅस्ट्रेलियेन चलयला. ल्हान भुरग्यांक जाय तितलो इंटरनेट, वॅबसायटी पळोवपाक मेळटल्यो, मात फेसबूक, इन्स्टाग्राम सारक्यो कांय माचयांचें दार उक्तें जावचें ना. जर कोणे तशें करतना सांपडलोच जाल्यार ताका ख्यास्त दितले काय ना, तें अजून कळूंक ना. रंग, कुडी वयल्यान थोमणें मारिल्ल्यान ताचो वायट परिणाम भुरग्यांचेर जाता, समाजीक हुस्को, डिजीटल वेसन लागता, सायबर धमकी मेळटा, मानसीक धपको बसता… ज्या डिजीटल माचयांचेर हें जाता, थंय आतां भुरग्यांक वचपाक मेळचें ना. मात हो यत्न यशस्वी जातलोच हाची खात्री ना. कारण घरांतल्या वा इश्टांच्या अकांवटाचेर भुरगीं आपणाक जाय तें धवळीत बसपाक शकतात. 2021 त फेसबुकान संशोधन केल्लें, तातूंत जुंवानपणाच्या हुंबऱ्यार आशिल्ल्या चलयांचेर सोशल मिडियाचो व्हडलो मानसीक परिणाम जाता, अशें दिसून आयिल्लें. खास करून इन्स्टाग्रामाचेर. इश्टांचें चेपण, ते चलयेचें एकंदर व्यक्तीमत्व, नाका जाल्ल्यो अपेक्षा हाका त्यो चलयो बळी पडटात, अशें जाणवल्लें. तांकांच न्हय, तर बऱ्याच जाण्ट्यांकूय सोशल मिडियाचेर कितें घालचें तें कळना. स्वताचे खाजगी अणभव, ताचे फोटो, व्हिडियो, घरांत कितें रांदलां, कितें विकत घेतलां, आपूण खंय आसा, चलपाचो, हांसपाचो व्हिडियो, दर्जो नाशिल्ली कला… अशें जायतें फक्त लायक्स, शॅर मेळोवपाक खूब जाण घालतात. तातूंतल्या खंय म्हयन्याक लाख, दोन लाख रुपया मेळपाक शकतात, अशें तांच्या मेंदवांत कोणे तरी भरिल्लें आसता. यू ट्यूबा सारकी एखादी माची पयशे दिताय बी. मात ते खातीर तुमचे लाखा वयर फाॅलोव्हर आसूंक जाय…. आनी तांणी चडांत चड शॅर, रिट्विट करूंक जाय….! लाखांनी रुपया मेळटात ते फिल्मस्टार, खेळगडे वा लोकप्रीय राजकी फुडाऱ्यांक. जांचे लाख, कोटी फाॅलोव्हर आसतात!! (थोडे सामान्य मनिसूय हातूंत आसात.) जेन्ना सादारण मनशाक हे पयशे मेळनात, तेन्ना मागीर निरशेणी येता आनी ताचो परिणाम ताचे भलायकेचेर जाता.
सोशल मिडियाचे भुरग्यांचेर कितें परिणाम जातात? जाणकारांच्या मतान, हेरां सारकें आपणाक जमना, ह्या विचारान निरशेणी येता, अभ्यासाचेर, वर्गांत लक्ष लागना, दिसाचींच तीं सपनां पळोवपाक लागतात. रातची झेम येना, दोळे इबाडटात, तकली फोडपाक लागता. मेंदवाचेर परिणाम जाल्ल्यान भावनीक बदल जातात. अपघात जावन जीव पसून गेल्ले आसात. नेण्ट्या भुरग्यांक खोलायेन विचार करपाची तांक आसना. तातूंत चलयांचो कोणूय गैरवापर करपाक शकतात. भुरगीं आतां घरांत पसून आवय- बापायक मॅसेजी धाडपाक लागल्यात. एकमेकांक मेळप उणें जालां, मैदानाचेर खेळप बंद जालां. कोण कार्यावळींक वचपाक सोदिनात. आॅस्ट्रलियेचें सरकार पूर्ण बंदी घालचें ना, हें बरें जालें. कारण इंटरनेटाचे खूब फायदे आसात. तुमी ताचे वरवीं शिक्षणीक आनी हेर गिन्यान मेळोवंक शकतात, भाशा सुदारूंक, शिकूंक शकतात. कुशळटाय वाडोवंक शकतात. छंद बाळगूंक शकतात. दरेके गजालीचे फायदे आसात, तशें लुकसाणूय. वॅबसायटीं वरवीं बरें तेंच घेवन व्यक्तीमत्व सुदारूंक जाय, करियर घडोवपाचो यत्न करूंक जाय.
सरकाराच्या निर्णया उपरांत थंयच्या पालकांचेर व्हडली जापसालदारकी येतली. कारण, चडशा भुरग्यांक सोशल मिडियाचें वेसन लागलां. तें बंद जाल्यार तांचे मानसिकतायेचेर परिणाम जावं येता, तांकां हातूंतल्यान नकळटां भायर काडपाचें काम आतां कुशळटायेन करचें पडटलें. दुखयनासतना चिमटो काडपाची कला आतां तांकांच न्हय, तर फुडाराक हेर देशांतल्या पालकांकूय घडये शिकची पडत.