भांगरभूंय | प्रतिनिधी
मोर्लेच्या उबो गुणो न्हंयेंत न्हांवपाक लोकांची गर्दी
भांगरभूंय । प्रतिनिधी
कोरी- सत्तरीः मोर्ले आनी केरी- सत्तरी पंचायतींतल्या मोर्ले- पेळावदा वाठारांतले उबो गुणो हे व्हाळवाट न्हंयेंत न्हांवपा खातीर येवपी लोकांची संख्या वाडत आसा. सरकारान न्हंयो, घसघशे, चिऱ्यां खणीं, कानालांनी न्हांवपाक बंदी घातल्या. पूण ही बंदी मोडून लोक बिनधास्त न्हंयेंत न्हातात. कांय दिसां आदीं नानोड्यां कानालांत बुडून दोग तरणाट्यांक बुडून मरण आयिल्लें. ते उपरांत सरकारान वयलो आदेश काडिल्लो. पूण हो आदेश कोनशान मारिल्ल्याचें चित्र न्हंयांनी पळोवपाक मेळटा.
विशेश म्हणल्यार बंदीचो आदेश मोडून न्हंयेचेर न्हांवपाक आयिल्ल्यां मदीं सोरो पियेवन न्हांवप्यांचो आंकडो चड आशिल्लो. सोऱ्याचे घुंवळेंत आनी व्हड आवाजान संगीत लावन मस्ती करपी हे न्हंयेचेर गर्दी आसता. ताका लागून हे न्हंयेंत बुडपाची शक्यताय वाडल्या. हे न्हंयेचेर गोंयच्या विवीध वाटारांतल्यान तरणाट्यांचे पंगड, तशेंच कांय जाण कुटुंबा सयत येतात. ताका लागून पुलिसांनी ह्या वाठारांत पाळत दवरून ह्या प्रकाराचेर आळाबंद घालचो आनी हो वाठार सुरक्षीत दवरचो, अशी मागणी थळाव्या लोकांनी केल्या. मजगतीं, हे न्हंयेच्या दोनूय देगांचेर तरणाट्यांनी सोरो पियेवन उडयिल्लो सोऱ्याच्यो बाटल्यो, प्लास्टीक आनी हेर कोयराची रास जाल्या. ह्या कोयराक लागून हो वाठार खुबूच बुरसो जाला. थंय कंवचेच्यो बाटल्यो फोडिल्ल्यान कंवच्योय पडल्यात. हो वाठार नितळ करपाची गरज आसा.
व्हाळवाट जाता प्रदुशीत
उबो गुणो आनी व्हाळवाट न्हंयेंत टाकावू अन्न पदार्थ, प्लास्टीक आनी सोऱ्याच्यो वाटल्यो उडोवपाचे प्रकार वाडल्यात. न्हंयेच्या पात्रांतूय फोडिल्ल्या बाटल्यांच्यो कवच्यो आसात. व्हाळवाट न्हंयेचें हेंच उदक व्हांवून सकयल सांखळी आनी पोडोशे उदक शुद्दीकरण प्रकल्पांत वता. न्हंयेदेगेर सांचिल्लो कोयर आतां पावसांत व्हांवून हेच न्हंयेंत वतलो आनी उदक प्रदुशीत जातलें. हे न्हंयेचे एके वटेन मोर्लें जाल्यार दुसरे वटेन केरी पंचायत वाठार आसा. ताका लागून केरी आनी मोर्ले पंचायतीन हो कोयर काडून वाटारांत नितळ करचो, अशी मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
