भांगरभूंय | प्रतिनिधी
पंचनाम्यांत म्हायती उक्ती; शेनवाराय धाड घालून पळोवणी
म्हापशें: कोलवाळ बंदखणींत कैद्यांच्या टोळी झुजा वेळार दवाखान्याचे जाल्ले मोडतोडीचो पंचनामो तशेंच कैंद्यांची जबानी बंदखण प्रशासनान घेतली. ह्या टोळी झुजांत दवाखान्याचें सुमार देड लाखाचें लुकसाण जालां. बंदखण म्हानिरिक्षकान ह्या टोळी झुजा उपरांत बंदखणींत सद्दां धाड सत्र चलयलां.
मंगळारा 30 मेक बंदखणींक कैदी विजय कारबोटकार आनी टारझन पार्सेकार हांच्या गँगा मदीं टोळी झूज जाल्लें. ह्या वेळार टारझन आनी ताच्या एका सांगात्यान दवाखान्यांत आलाशिरो घेतिल्लो. त्या दोगांक मारचे खातीर कारबोटकारा सयत 50 कैद्यांचे टोळटेन दवाखान्याचेर हल्लो केल्लो आनी दोगूय कैद्यांक आपले सुवादीन करपाची तांणी मागणी केल्ली. पूण परिस्थिती पळोवन दोतोरांनी दवाखान्याचीं दारां धांपलीं. त्या वेळार दवाखान्याच्या सुरक्षा रक्षकाक धमकावन आनी धक्काबुक्की करून ते टोळयेन दवाखान्यांत घुसखोरी करून मोडतोड केल्ली. तशेंच जखमी दोगा कैद्यांक घेवन दवाखान्याचे दोतोर, सहाय्यक जेलर आनी एक कैदी अशे स जाण लिपिल्ली कुडूय फोडपाचो यत्न हे टोळयेन केल्लो. पूण दोतोरांचे म्हायती वयल्यान बंदखण कर्मचाऱ्यांनी घडणुकेचे सुवातेर येवन परिस्थितीचेर नियंत्रण मेळयिल्लें.
ह्या हल्ल्यांत दवाखान्याच्या रुपांत सरकारी मालमत्तेची मोडतोड जाल्या. शेनवारा हे लुकसाणेचो पंचनामो केलो. तशेंच कारबोटकार आनी टारझन हाचे सयत हेर कैद्यांची जबानी बंदखण प्रशासनान पुलिसां वतीन नोंद केल्या. मजगतीं, हेह टोळये उपरांत बंदखण म्हानिरिक्षक ओमवीर सिंग बिश्नोई हांणी बिरेस्तारा, शुक्रारा तशेंच शेनवारा बंदखणीचेर धाड घातिल्ली. बिरेस्तारा 30 मोबायल फोन, मोबायल फोना संबंदांत संलग्न वस्तू तशेंच तंबाकू आनी गुटखा जप्त केल्ले. शुक्रारा घाल्ले धाडींत तीन जाणांच्या कारबोटकार गटा कडेन एक मोबायल जाल्यार टारझन गटा कडेन तीन अशें वट्ट चार मोबायल फोन सांपडिल्ले. तशेंच बंदखण म्हानिरिक्षकान शेनवाराय बंदखणीचेर धाड घालून पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
