भांगरभूंय | प्रतिनिधी
संवसारांत तोपी घालपी (दुसऱ्यांक फटोवपी) लोकांचो उणाव ना. सोशल मिडियाचो गैरवापर करून लोकांक काय न्हय करून फटोवपी ठकसेन आमच्या देशांत तयार जाल्यात. ते अशे तरेन उलयतात की तांचें आयकून सुशिक्षीत, शिटूक मनीस पसून खीणभर भारावन वता आनी हे फटींगाचे पाय सांगतात ते करता. थोडे मॅसेजी धाडून फटयतात. ती मॅसेज बँकेचो वा सरकारी खात्याचो ज्युस्ता जुस्त लोगो तयार करून धाडटात. म्हणटकच वाचपी घुस्पागोंदळांत सांपडटा. ह्या सायबर गुन्यांवकारांनी लाखांनी भारतीयांचीं बँक खातीं रिकामी केल्यांत. विशेश म्हणल्यार फटवल्ले सगले चड पयश्यांचे आशेन त्रासांत पडल्यात. तांचे प्रमाणूच थोडे ठकसेन लोकांक प्रत्यक्ष मेळून तांचेर मोनेळ घालतात आनी उश्णे वा नोकरी, जमीन दितां म्हूण तांचे कडल्यान पयशे घेतात. हालींच दिवचले असोच एक प्रकार लोकां सामकार आयला.
रेल्वेंत आनी हेर कडेन सरकारी नोकरी दिवपाचें हांयस दाखोवन दिवचले बऱ्याच बायलांक नागोवपाची घडणूक घडल्या. दुनिया झुकती है, झुकानेवाला चाहीए, तसलो हो प्रकार. हें करपी एक बायल आनी तिच्या वांगडा आसा एक पुलीस कॉन्स्टेबल. दोगूय जाणां लोकां कडल्यान पयशे मागून हाडटालीं, अशें मुळावे चवकशेंत उक्तडार आयलां. ही बायल दिवचले एका फ्लॅटांत बिराडाक रावता. आपली कोल्हापूरची जमीन रेल्वे म्हामंडळ संपादन करता. ताका लागून आमकां पांच नोकर्यो मेळटल्यो. तुमकां त्यो नोकऱ्यो आपूण दिवपाक शकतां, अशें सांगून तिणें दरेका पोस्टा खातीर 10 लाख रुपयांची मागणी केली. ते प्रमाण एकल्यान तिका 10 लाख रुपया दिले. कर्नाटक आनी पुणें- महाराष्ट्रांतल्या (हो पुणेंकार कसो फटवलो, हो गूढ प्रस्न) दोगांनी तिका 5- 5 लाख रुपया दिले. कांय दिसांनी नोकरे खातीर कागदां तयार जाल्ल्याचें सांगून तिणें उरिल्ली रक्कम दिवपाक सांगली. हीं कागदां तिणें हुबेहुब रेल्वे म्हामंडळा सारकींच तयार केल्लीं आसतलीं. थोड्या लोकांनी उरिल्ली थोडी रक्कम तिका दिली, थोडी पुलीस कॉन्स्टेबलाच्या खात्याचेर जमा केली. स्वता फटवल्ल्या लोकांनी दिवचल पुलिशेंत ही म्हायती दिल्या. हो पुलीस आपलो भाव अशें तिणें सगल्यांक सांगलां. हे बंटी आनी बबली जोडयेन आनिकूय खूब लोकांक रेल्वेचेंच नांव सांगून फटयल्यात जाल्यार पुलिसांक सोदचें पडटलें. पूण लोकांक तांचे घामा कश्टाचे पयशे मेळटा म्हणसर वर्सभर तरी वतलेंच…. आनी ते मेळटलेच हाची खात्री ना. पुलिसांनी वेगान तपास करून तांचे पयशे बेगीन परतून मेळोवन दिवपाचो यत्न करचो. हातूंतलो एक दुबावीत पुलीस आसा, म्हणून तरी तांणी धडाधड कामाक लागचें.
बऱ्योच बायलो पुलिसां मुखार, खबरां चॅनलां मुखार उलयल्यात. एके बायले कडेन गोड उलोवन बबलीन दोन कांकणां, सरपळी व्हेल्या. ती वर्स जालें तरी दिवंक ना. वास्कोंतले एके बायलेन देड कोटी वयर रुपया तिका दिल्यात खंय. नोकरी मेळटली हे आशेन. काय आनीक कितें कारण सांगून तिचे कडल्यान ते घेतल्यात काय? कागाळ केल्ल्या लोकांच्या म्हणण्या प्रमाण, तांचे सगल्यांचे मेळून उणेच पांच कोटी तरी रुपया बंटी, बबली जोडयेन नागयल्यात. दिवचले प्रमाण, ते बायलेन आनी तिच्या कॉन्स्टेबल जोडिदारान हेर कडेनूय हो पराक्रम केला आसतलोच. आतां पुलीस तपासा उपरांत सगलें भायर सरतलें, अशी अपेक्षा लोक बाळगून आसात. थळाव्या आमदारानूय तपास वेगान जावचो म्हूण पुलीस अधिकार्यांक सुचोवण्यो दिल्यात. ह्या प्रकरणांतलो बंटी कोलवाळ पुलीस स्टेशना कडेन संबंदीत आसा. ताचेर आरोप जाल्यात म्हणटकच ताका निलंबीत करतले काय गुन्यांव सिद्ध जाले उपरांतूच घरा धाडटले, तें पळोवपाचें. आमदारानूय नोकरे खातीर कोणूच पयशे घेनात, अशें कॅमेऱ्या मुखार सांगलें. आपले आमदार पदाचे कारकिर्दीच्या काळांत आपणें तरी तसलें कांय आयकूंक ना, अशेंय तांणी म्हणलें.
लोकूय म्हूण नोकरे खातीर 10- 20 लाख सहज दिवपाक तयार जातात, हें अजापूच म्हणचें पडटलें. तितल्या पयशांनी एखादो वेवसाय सहज करूं येता. तातूंत बेरोजगारां खातीर सरकाराच्यो घे म्हूण सवलती, अनुदानां मेळटात. लोक सरकारी नोकरे खातीर कितेंय करपाक तयार आसतात, तें हे घडणुके वयल्यान सगल्यांक कळून चुकलें. लोकांनी भिडस्त सभाव सोडपाक जाय. कितलोय लागींचो मनीस लाख, दोन लाख रुपया मागपाक लागलो जाल्यार ताचो आदलो इतिहास तपासून पळोवपाक जाय. ताणें मागले, हाणें रोखडेच दिले, अशें जावंक फावना. सायबर गुन्यांव वाडल्यात. अजून चड व्याजाचे आशेन 50, 75 लाख रुपया गुंतोवपी आनी मागीर तकलेर हात मारपी लोक गोंयांत आसात. सोशल मिडियाक लागूनय बरेच जाण फटवल्यात. उरिल्ले तरी शाणे जातले??
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
