बंगळुरू प्ले ऑफाच्या हुमऱ्यार

भांगरभूंय | प्रतिनिधी

उमळशीक वाडोवपी मॅचींत रॉयल चॅलेंजर्स बंगळुरून चेन्नय सुपर किंग्साक 2 धांवड्यांनी हारोवन प्ले ऑफा खातीर आपली स्थिती घटमूट केली. ह्या जैता उपरांत बंगळुरूचे 16 गूण जाल्यात आनी तो गुणतकट्यांत पयले सुवातेर पावलो.

दुसरे वटेन चेन्नय सुपर किंग्साक णवे हारीक तोंड दिवचें पडलें. तो निमाणे सुवातेर आसा. बंगळुरून दिल्ले 214 धांवड्यांचो फाटलाव करपी चेन्नय सुपर किंग्सान निर्धारीत ओव्हरींनी 5 विकेटी व्हगडावन 211 धांवड्यो केल्यो. आयुष म्हात्रेन 94 आनी रवींद्र जडेजान नाबाद 77 धांवड्यांची खेळी. ह्या दोगांक सोडले जाल्यार चेन्नयच्या एकाय बॅट्समनाक व्हड खेळी करपाक जमली ना.

ते आदीं चेन्नय सुपर किंग्सान टॉस जिखून रॉयल चॅलेंजर्स बंगळुरूक पयलीं बॅटींग करपाचें आमंत्रण दिलें. ते उपरांत बंगळुरू वतीन जेकॉब बेथल आनी विराट कोहली हांणी डावाची सुरवात केली. तांणी आक्रमक सुरवात केली. पावर प्लेंत व्हड शॉर्ट मारले. हे मजगतीं, 28 धांवड्यांचेर बेथलाक जीवनदान मेळ्ळें. हाचो ताणें योग्य रितीन फायदो करून घेतलो. ताणें अर्द शेंकडो पुर्ण केलो. अखेरेक ही जोडी फुटली. बेथलाक मथिशा पाथिरानान बाद केलो. ताणें 33 बॉलांनी 8 चवके आनी दोन सक्यांचे मजतीन 55 धांवड्यांची खेळी केली. बाद जावचे पयलीं ताणें कोहली वांगडा पयले विकेटी खातीर 97 धांवड्यांची भागिदारी केली.

ते उपरांत विराटान लेगीत आपलो अर्द शेंकडो पूर्ण केलो. अंदूंच्या हंगामांतलो ताचो हो सातवो अर्द शेंकडो थारलो. जाल्यार सेगीत चवथो अर्द शेंकडो थारलो. 12वे ओव्हरींत सॅम करनान ताका बाद केलो. विराटान 33 बॉलांनी पांच चवके आनी पांच सक्यांचे मजतीन 62 धांवड्यो केल्यो. देवदत्त पडिक्कल 17 आनी रजत पाटिदार 11 धांवड्यो करून बाद जालो. जितेश शर्माकूय (7) व्हड खेळी करपाक जमली ना. 19वी ओव्हर मात वादळी थारली. रोमारिओ शेफर्डान चार सके आनी दोन चवके मारले. ताका लागून बंगळुरूक व्हड धांवसंख्या उबारपाक येस आयलें. ताणें 14 बॉलांनी अर्द शेंकडो पूर्ण करीत बंगळुरूक 5 बाद 213 धांवड्यां मेरेन पावयलो. आयपीएलांत जलद अर्द शेंकडो पूर्ण करपी दुसऱ्या क्रमाकांचो बॅट्समन थारलो.

चेन्नय वतीन मथिशा पाथिरानान 3 विकेटी घेतल्यो, जाल्यार नूर अहमद आनी सॅम करन हांकां एकेक विकेट फावो जाली.