भांगरभूंय | प्रतिनिधी
बंगळुरू, खबरां संस्था: देशभरांत सध्या गणेशोत्सव व्हडा उमेदीन आनी भक्तीभावान मनयतना दिसता. चवथीक कांय घरांनी देड दिसांचो, जाल्यार कांय कडेन पांच, सात, णव, इकरा आनी एकवीस अशे श्री गणेशाची मुर्ती हाडून पुजतात. गणेशाची पुजा केले उपरांत ताचें विसर्जन करतात. पयरूच पांच दिसांच्या गणपती बाप्पाचें विसर्जन जालें. विसर्जन करतना बंगळुरूक एक वेगळीच घडणूक घडली. गणपती बाप्पाचें विसर्जन करतना वट्ट चार लाख रुपयांची ६० ग्रॅम भांगराचे सरपळेचेंय विसर्जन जालें.
नेमकें कितें घडलें?
बंगळुरूक एका कुटूंबान व्हडा उमेदीन पांच दिसांचो गणपती पुजलो. ह्या वेळार गणपतीचे सजावटी खातीर ह्या कुटुंबान वट्ट चार लाख रुपयांची ६० ग्रॅम भांगराची सरपळी हाडिल्ली. हेच भांगराचे सरपळेन गणेशाची सजावट तांणी केल्ली. पांच दिसांनी गणपतीचें विसर्जन ह्या कुटुंबान केलें. मात, गणपतीचें विसर्जन करतना हें कुटूंब श्रींच्या गळ्यांतली सरपळी काडपाक विसरलें. गणेश मुर्तीचें ती सरपळी गळ्यांत आसतनाच विसर्जन केलें. गणपतीचें विसर्जन केले उपरांत गळ्यांतली चार लाखांची भांगराची सरपळी काडपाक विसरिल्ल्याचें तांच्या लक्षांत आयलें आनी तांकां धक्को बसलो.
हे विशीं लक्षांत आयले उपरांत रोखडीच ती भांगराची सरपळी सोदपाक सुरू केलें. गणपतीचें विसर्जन केल्लें थंय सोद घेतलो. मात संबंदीत ठेकेदारान उदक उसपपाक न्हायकार दिलो. उपरांत तें कुटूंब पुलिशेंत पावलें. मागीर प्रशासनाचे मजतीन सरपळेचो सोद घेतलो. वट्ट १० वरां लागलीं त्या कुटुंबाक ती सरपळी सदपाक. ही सरपळी सोदपा खातीर १० हजार लिटर उदक भायर काडलें. हे खातीर कंत्राटदारान आपल्या भुरग्यांक सरपळी सोदपाच्या कामाक लायले. निमाणें सरपळी सांपडली आनी बंगळुरूचें हें गोविंदराजनगर हांगचें कुटूंब समाधानी जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
