बंगळुरून जैताचो दुकळ सोंपयलो

भांगरभूंय | प्रतिनिधी

इंडियन प्रिमियर लिगेचे आठवे मॅचींत रॉयल चॅलेंजर्स बंगळुरून येजमान चेन्नय सुपरकिंग्साक 50 धांवड्यांनी हारयलो. ह्या जैता सयत रॉयल चॅलेंजर्स बंगळुरून चेपॉक मैदानाचेर 17 वर्सां सावन चालू आशिल्लो जैताचो दुकळ सोंपयलो.
बंगळुरून 2008त निमाणे खेपे चेपॉक मैदानाचेर जैत जोडिल्लें. ते उपरांत तो हांगा आठ मॅची खेळिल्लो आनी सगल्या मॅचींनी हार घेवची पडिल्ली. पूण, रजत पाटीदाराच्या फुडारपणाखाला बंगळुरून जैताचो दुकळ सोंपयलो.
रजत पाटीदाराच्या अर्द शेंकड्याच्या नेटार रॉयल चॅलेंजर्स बंगळुरून निर्धारीत 20 ओव्हरींनी 7 विकेटी व्हगडावन 196 धांवड्यो केल्यो. फिल सॉल्टान 16 बॉलांनी 32 धांवड्यो करून आक्रमक सुरवात करून दिली. नूर अहमदान मदल्या ओव्हरींनी बरी बॉलींग घालून तीन विकेटी घेत चेन्नय सुपरकिंग्साक पुनरागमन करून दिलें. पूण, मुखेली पाटीदाराक मेळिल्लें जीवनदान चेन्नयक म्हारग पडलें. ताणें 32 बॉलांनी चार चवके आनी तीन सक्यांचे मजतीन 51 धांवड्यो केल्यो. देवदत्त पडिक्कलान 14 बॉलांनी 27 धांवड्यांचें योगदान दिलें. टीम डॅव्हिडान 8 बॉलांनी नाबाद 22 धांवड्यो केल्यो.
मोखीचो फाटलाव चेन्नय सुपरकिंग्साची सुरवात बरी जाली ना. जोश हेझलवुडान दुसरे ओव्हरींत राहुल त्रिपाठी (4) आनी मुखेली ऋतुराज गायकवाडाक (0) तंबूंत धाडले. दीपक हुडा (4) हाका भुवनेश्वर कुमारान बाद केलो. सॅम करनाकूय (8) व्हड खेळी करपाक जमली ना. ताका लिएम लिव्हिंगस्टोनाक बाद केलो. रचीन रवींद्र मैदानांत उबो आशिल्लो. पूण, ताका लेगीत खाशेलें अशें प्रदर्शन करपाक जमलें ना. 13वे ओव्हरींत यश दयालान ताका बोल्ड केलो. रचीन रवींद्रान 31 बॉलांनी 41 धांवड्यो केल्यो. ते उपरांत यशान शिवम दुबेक (19) बोल्ड केलो.
पंगडाची स्थिती कठीण आसून लेगीत महेंद्रसिंग धोनी मैदानांत देंवूंक नाशिल्ल्यान चेन्नयचे चाहते बेजारले. धोनी पयलीं आर आश्विन बॅटिंगेक आयलो. आश्विन 11 धांवड्यो करून बाद जालो. त्या वेळार चेन्नयक 28 बॉलांनी 98 धांवड्यो जाय आशिल्ल्यो. ही कठीण मोख चेन्नय जड गेली आनी अखेरेक ताका 20 ओव्हरींनी 8 विकेटी व्हगडावन 146 धांवड्यो करप शक्य जालें.