बंगळुरून घरच्या मैदानाचेर उगडलें जैताचें खातें

भांगरभूंय | प्रतिनिधी

इंडियन प्रिमियर लिगेचे (आयपीएल) 42वे मॅचींत रॉयल चॅलेंजर्स बंगळुरून राजस्थान रॉयल्साक 11 धांवड्यांनी हारायलो. बंगळुरून जैता खातीर दिल्ले 206 धांवड्यांचो फाटलाव करपी राजस्थानाक 9 विकेटी व्हगडावन 194 धांवड्यो करप शक्य जाल्यो.

बंगळुरून अंदूंच्या हंगामांत घरचें मैदान एम चिन्नास्वामी स्टेडियमाचेर पयलें जैत जोडलें. ह्या हंगामांत हे मॅची पयलीं बंगळुरू घरच्या मैदानाचेर तीन मॅची खेळिल्लो आनी तिनूय मॅचींनी ताका हार घेवची पडिल्ली. बंगळुरून वट्ट सवें जैत जोडलें. ह्या जैतान ताचे 12 गूण जाल्यात आनी ताणें गुणतकट्यांत तिसरे सुवातेर उडी घेतल्या.

मोखीचो फाटलाव करपी राजस्थानाच्या डावाची सुरवात यशस्वी जयस्वाल आनी 14 वर्सां पिरायेच्या वैभव सूर्यवंशीन केली. जयस्वालान डावाच्या पयल्याच बॉलाचेर सको मारलो. ताणें वैभवा वांगडा मेळून पयले विकेटी खातीर अर्द शेंकड्याची भागिदारी केली. पूण, पांचवे ओव्हरींत भुवनेश्वर कुमाराचे बॉलिंगेचेर वैभव बाद जालो. वैभवान 12 बॉलांनी दोन सक्यांचे मजतीन 16 धांवड्यो केल्यो. तो बाद जाल्या उपरांत जयस्वालान नितीश राणा वांगडा मेळून डाव मुखार व्हेलो. पूण, ताका अर्द शेंकडो पूर्ण करपाक एके धांवडेची गरज आसतना जोश हेझलवूडाचे बॉलिंगेचेर रोमरियो शेफर्डाक कॅच दिवन तंबूंत परतलो. जयस्वालान 19 बॉलांनी 49 धांवड्यांची खेळी केली. हातूंत सात चवक्यांचो आनी तीन सक्यांचो आस्पाव आशिल्लो. राजस्थानाचो मुखेली रियान परागान चवथे सुवातेर बॅटिंगेक येवन आक्रमक खेळी करून पंगडाची धांवगती आनीक वाडयिल्ली. पूण, ताका कृणाल पांड्यान चड वगत खेळपट्टीचेर तिगूंक दिवंक ना. कृणालान 10वे ओव्हरींत ताका बाद केलो. ते उपरांत नितीश राणा बाद जाल्ल्यान मॅच बंगळुरून वटेन घुंवता अशें दिसपाक लागिल्लें. पूण ध्रुव जुरेल आनी शिमरोन हॅटमायर हांणी आक्रमक बॅटींग करून राजस्थानाक जैताच्या लागसार हाडलो. पूण, अखेरेक ही जोडी फुडली आनी राजस्थानाची आस्त सोंपली.

ते आदीं राजस्थान रॉयल्साचो मुखेली रियान परागान टॉस जिखून रॉयल चॅलेंजर्स बंगळुरूक पयलीं बॅटींग करपाचें आमंत्रण दिलें. फिल सॉल्ट आनी विराट कोहली हांणी डावाची सुरवात केली.

सॉल्ट आनी कोहली हांणी एकामेक बरी साथ दीत सुरवातीक 10ची धांवगती राखिल्ली. तांणी अर्द शेंकड्याची भागिदारी लेगीत केली. पूण, 61 धांवड्यांचे भागिदारी उपरांत सॉल्ट सातवे ओव्हरींत वनिंदू हसरंगाचे बॉलिंगेचेर बाद जालो. शिमरॉन हेटमायरान ताची कॅच धरली. सॉल्टान 23 बॉलांनी 26 धांवड्यो केल्यो.

तो बाद जाल्या उपरांत देवदत्त पडिक्कलान फाटले मॅची भशेन हे मॅचींत लेगीत कोहलीक बरी साथ दिली. दोगांयनी 95 धांवड्यांची भागिदारी करून 15वे ओव्हरींत पंगडाक 150चो टप्पो हुपून दिलो.

हे भागिदारी वेळार पडिक्कल आनी कोहली हांणी आपलोआपलो अर्द शेंकडो पूर्ण केलो. कोहलीन अंदूंच्या हंगामांतलो पांचवो, सर्तींतलो वट्ट 60वो अर्द शेंकडो पूर्ण केलो. पडिक्कलान सेगीत दुसरो अर्द शेंकडो नोंदयलो.

कोहलीन अर्द शेंकड्या उपरांत लेगीत आक्रमक बॅटींग कायम दवरली. अखेरेक 16वे ओव्हरींत जोफ्रा आर्चरान ताका बाद केलो. नितीश राणान कोहलीची कॅच धरली. कोहलीन 42 बॉलांनी आठ चवके आनी दोन सक्यांचे मजतीन 70 धांवड्यो केल्यो.

कोहली बाद जाल्या उपरांत फुडलेच ओव्हरींत पडिक्कल लेगीत तंबूंत परतलो. ताणें 27 बॉलांनी चार चवके आनी तीन सके मारून 50 धांवड्यो केल्यो. संदीप शर्माचे बॉलिंगेचेर नितीश राणान ताची कॅच धरली. संदीपान हेच ओव्हरींत बंगळुरूचो मुखेली रजत पाटिदाराक (1) बाद केलो. पूण, उपरांत टीम डॅव्हिड आनी जितेश शर्मा हांणी डाव सांबाळ्ळो. अखेरेच्या बॉलाचेर डॅव्हिड धांवबाद जालो. पूण, ते मेरेन बंगळुरून 200चो आंकडो हुपिल्लो. बंगळुरून 20 ओव्हरींनी 5 विकेटी व्हगडावन 205 धांवड्यो केल्यो. डॅव्हिडान 15 बॉलांनी 23 धांवड्यो केल्यो. जितेश शर्मान 10 बॉलांनी 20 धांवड्यो केल्यो.

राजस्थाना वतीन संदीप शर्मान 2, जोफ्रा आर्चर आनी वनिंदू हसरंगा हाणें एकेक विकेट घेतली.