भांगरभूंय | प्रतिनिधी
खबरां संस्था
बंगळुरूः आयपीएलाच्या आयतारचे डबल हेडर मॅचीच्या चिन्नास्वामी स्टेडियमाचेर जाल्ले पयले मॅचींत रॉयल चॅलेंजर्स बंगळुरून राजस्थान रॉयल्याक 7 धांवड्यांनी हारोवन आपूण खरो रॉयल आसा हें तांच्या चाहत्यांक दाखोवन दिलें. हे मॅचींत विराट कोहली परत एक फावट आरसीबीचें फुडारपण करता. दोन वर्सां आदीं कॅप्टन म्हणून आपली भूमिका सोपोवपी विराट ह्या सिझनांत दुसरे फावट पंगडाचें फुडारपण करता आनी ह्या सिझनांतलो ताच्या पंगडाचें हें दुसरें जैत.
आरसीबीन आयतारच्या जैतान अंदूच्या आयपीएलांत आठ गुणांनी गुण क्रमवारींत पयले सुवातेर आशिल्ल्या राजस्थाना कडेन बोरोबोरी केल्या. फकत धांवगतीच्या आदारान राजस्थान पंगड अव्वल सुवातेर आसा. बंगळुरून दिल्ल्या 190 धांवड्याच्या आव्हानाचो फाटलाव करतना राजस्थानाची सुरवात बाबत जाली. मोहम्मद सिराजान पयलेच ओव्हरींत राजस्थानाचो ओपनर जॉस बटलराक क्लीन बोल्ड केलें. मात येसस्वी जयस्वाल आनी देवदत्त पडिक्कल हांणी दुसरे विकेटी खातीर अर्द शेंकड्याची भागिदारी करून आरसीबीचेर चेंपण हाडपाक येस मेळयलें. राजस्थानाचो पंगड 20 ओव्हरींत 6 गडी वोगडावन फकत 182 धांवड्यो करपाक शकलो. देवदत्त पडिक्ललान 52 जाल्यार जयस्वालान 47 धांवड्यो केल्यो. ध्रुव जुरेलान 16 बॉलांत 34 धांवड्यांची खेळी केली माततो पंगडाक जैत मेळोवन दिवपाक शकलो ना. आरसीबी वतीन हर्षल पटेलान तीन विकेटी घेतल्यो.
राजस्थानात टॉस जिखून पयली बॉलींग करपाचो निर्णय घेतलो. ट्रेंट बोल्टान ताची परंपरा तिगोवन दवोरतना पयल्याच बॉलर विराट कोहलीक एलबीडब्ल्यू केलें. आयपीएलांतली ताची ही 100वी विकेट थारली. संदीप शर्माच्या दुसरे ओव्हरीत आरसीबीन 10 धांवड्यो केल्यो मात तिसरे ओव्हरीच्या पयल्या बॉलार बोल्टान आनी एक धपको दितना शाहबाज अहमदाक 2 धांवड्याचेर कॅच आवट केलें. तेन्ना आरसीबीच्या नांवार 12 धांवड्यो आशिल्ल्यो.
फॅफ आनी मॅक्सवेल जोडयेन राजस्थानाच्या बॉलरांचो बरोच समाचार घेतलो. तांणी तिसरे विकेटी खातीर केल्ले 126 धांवड्याचे भागिदारीक लागून बंगळुरून मॅचींत बरे पुनरागमन केल्लें. मात ते एका फाटोफाट पॅव्हेलियनांत परत आयल्या उपरांत बंगळुरूच्या हेर बॅट्समनांक व्हड भागिदारी करपाक मेळ्ळी ना. राजस्थानाच्या बॉलरांनी तांका दोनशेचो आंकडो हुबपाक दिलो ना. राजस्थाना वतीन संदीप शर्मा आनी ट्रेंट बोल्टान दरेकी दोन विकेटी घेतल्यो. आश्वीन आनी चहलाक दरेकी एक विकेट मेळ्ळी.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
