भांगरभूंय | प्रतिनिधी
रॉयल चॅलेंजर्स बंगळुरून इंडियन प्रिमीयर लिगेचे (आयपीएल) 27वे मॅचींत येजमान पंजाब किंग्साक 24 धांवड्यांनी हारयलो. बंगळुरून दिल्ले 175 धांवड्यांचे मोखीचो फाटलाव करतना पंजाबाक 150 मेरेन मजल मारप शक्य जालें. हे मॅचींत विराट कोहलीन बंगळुरूचें फुडारपण केलें. ह्या सप्तकांत पांचव्या पंगडान घरच्या मैदानाचेर खेळटना मॅच वगडायली.
पंजाबा आदीं ह्या सप्तकांत बुधवारा जयपूरांत राजस्थानान, मंगळारा हैदराबादांत सनरायझर्सान, सोमारा बंगळुरूंत रॉयल चॅलेंजर्स बंगळुरून आनी आयतारा अहमदाबादांत सध्याचो वस्ताद गुजरात टायटन्सान हार घेतल्या.
मॅचींत फास्ट बॉलर मोहम्मद सिराज पर्जळ्ळो. पयले ओव्हरींत ताणें अथर्व तावडेक (4) एलबीडब्ल्यू बाद केलो. मॅथ्यू शॉर्टाक आठ धांवड्यांचेर बोल्ड केलो. लायम लिव्हिंगस्टोन लेगीत सिराजाच्या बॉलाचेर एलबीडब्लू बाद जालो. अजापाची गजाल म्हणल्यार सिराजाक दोनूय विकेटी डीआरएसाक लागून मेळ्ळ्यो. सिराजान बॉलिंगेंतूच न्हय जाल्यार फिल्डिंगेंत लेगीत बरें प्रदर्शन केलें. हरप्रीत सिंगाक (13) थेट थ्रोचेर धांवबाद केलो.
मुखेली सॅम करन आनी प्रभसिमरन सिंग हांणी 33 धांवड्यांची भागिदारी करून पंजाबाचो डाव सांबाळपाचो यत्न केलो. पूण, करनाक अतिआत्मविस्वास नडलो. विजय कुमार वैशाचे ओव्हरींत चवको मारल्या उपरांत एक धांवडी घेतना सुशेगात धांवतना दिसलो. वनिंदून अचूक थ्रो मारून करनाक (10) बाद केलो. पंजाबाचो अर्द पंगड 76 धांवड्यांचेर तंबूंत परतून गेल्लो.
प्रभसिमरना कडल्यान पंजाबाक आस्त आशिल्ली. ताणें चार सके आनी तीन चवके मारून बंगळुरूक हुस्क्यांत घालो. अखेरेक तो 30 बॉलांनी 46 धांवड्यो करून बोल्ड जालो.
शाहरुख खान मॅच सोंपयतलो अशें दिशिल्लें. पूण, वनिंदून आपले स्पिन बॉलिंगेचेर ताका नाचयलो. दिनेश कार्तिकान उत्कृश्ट रितीन स्टम्पींग केलें.
24 बॉलांनी 37 धांवड्यांची मोख पंजाबा मुखार आशिल्ली. पूण, ताचे सात बॅट्समन तंबूंत गेल्ले. हरप्रीत ब्रार आनी जितेश शर्मा हीच अखेरची आस्त पंजाब किंग्सा कडेन आशिल्ली. हर्षल पटेलान 17वे ओव्हरींत सात धांवड्यो दिल्यो. विराटान जितेशाची कॅच सोडली.
18वे ओव्हरींत सिराजान ब्राराक (12) बोल्ड केलो आनी मॅच बंगळुरू वटेन घुंवडायली. पंजाबाक 13 बॉलांनी 26 धांवड्यांची गरज आशिल्ली आनी पंजाबाची सगली भिस्त जितेशाचेर आशिल्ली. तेच ओव्हरींत सिराजान नॅथन एलिसाक बोल्ड केलो. हर्षल पटेलान निमाणी विकेट घेवन मॅच सोंपयली. जितेशान 27 बॉलांनी 41 धांवड्यो केल्यो. पंजाबाचो डाव 150चेर सोंपलो आनी बंगळुरूक 24 धांवड्यांनी जैत फावो जालें.
ते पयलीं फाफ ड्यु प्लेसीस आनी विराट कोहली हांणी बंगळुरूक आक्रमक सुरवात करून दिली. दोगांयनी 98 बॉलांनी 137 धांवड्यांची भागिदारी केली. कोहली 47 बॉलांनी 59 धांवड्यो करून बाद जालो. फुडल्या बॉलाचेर ग्लॅन मॅक्सवेल शुन्याचेर बाद जालो. प्लेसीस 56 बॉलांनी 84 धांवड्यो करून बाद जालो. ताणें पांच चवके आनी पांच सके मारले. दिनेश कार्तिक (7) हे मॅचींत लेगीत अपेशी थारलो. बंगळुरूक 4 बाद 174चेर समाधान मानचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
