बंगळुरूची आकर्शक जैतान सुरवात

भांगरभूंय | प्रतिनिधी

रॉयल चॅलेंजर्स बंगळुरून जैत जोडून इंडीयन प्रिमियर लिगेच्या (आयपीएल) अंदूंच्या हंगामाक सुरवात केली. ताणें सध्याचो वस्ताद कोलकाता नायट रायडर्साक 7 विकेटींनी हारयलो. ह्या जैता सयत रॉयल चॅलेंजर्स बंगळुरून 17 वर्सां पयलीं मेळिल्ले हारीचो बदलो घेतलो. आयपीएलाच्या पयल्या हंगामाचे उक्तावणाची मॅच ह्या पंगडां मदीं जाल्ली. त्या वेळार कोलकाता नायट रायडर्सान जैत जोडिल्लें.

विराट कोहली आनी फिल सॉल्ट हांणी बंगळुरूक आक्रमक सुरवात करून दिली. फाटल्या हंगामांत कोलकाताचो वांगडी आशिल्ल्या सॉल्टान येना फुडें बॉलरांची बॉलींग फोडून काडली. स ओव्हरी उपरांत बंगळुरून 80 धांवड्यो केल्ल्यो. सॉल्टान फकत 25 बॉलांनी अर्द शेंकडो पुर्ण केलो. ताणें चवथे ओव्हरींत ट्रम्प कार्ड वरुण चक्रवर्तीक तीन चवके आनी एक सको मारून कोलकाता बॅकफुटाचेर धुकल्लो. कोहलीन ताका बरी साथ दिली. कोहलीन 30 बॉलांनी अर्द शेंकडो पुर्ण केलो. 17वे ओव्हरीच्या दुसऱ्या बॉलाचेर लियाम लिव्हिंगस्टोनान चवको मारून बंगळुरूचें जैत निश्चीत केलें. कोहलीन 36 बॉलांनी चार चवके आनी तीन सक्यां सयत नाबाद 59 धांवड्यो केल्यो.

मजगतीं, कोलकाता नायट रायडर्सान पयलीं बॅटींग करतना निर्धारीत ओव्हरींनी 8 विकेटी व्हगडावन 174 धांवड्यो केल्ल्यो. बंगळुरून 17वे ओव्हरींत फकत 3 विकेटी व्हगडावन जैत जोडलें.

कोलकाता नायट रायडर्साचो मुखेली अजिंक्य रहाणेन उत्कृश्ट बॅटींग करून फकत 25 बॉलांनी अर्द शेंकडो पुर्ण केलो. सुनील नारायणान 26 बॉलांनी 44 धांवड्यांचें योगदान दिलें. दोगांयनी दुसरे विकेटी खातीर 10 धांवड्यो प्रती ओव्हरी परस अदीक गतीन धांवड्यो केल्यो. तांणी 55 बॉलांनी 103 धांवड्यांची भागिदारी करून व्हड धांवसंख्येचें मुळावण घालें. 10 ओव्हरी उपरांत तांचो स्कोर 2 बाद 107 धांवड्यो आशिल्ल्यो.

ते उपरांत कृणाल पंड्यान तीन विकेटी घेवन कोलकाताक 200 आंकड्या पसून बरोच पयस दवरलो. भारता वतीन आपली निमाणी टी-20 2016त खेळपी 36 वर्सां पिरायेच्या रहाणेक श्रेयस अय्यराचे सुवातेर कोलकाताचो मुखेली केला. ताणें आक्रमक बॅटींग करतना 31 बॉलांनी 56 धांवड्यो केल्यो. कृणाल पंड्यान मदल्या ओव्हरींनी 29 धांवड्यो दिवन 3 विकेटी घेवन कोलकाताचे रणनितीचेर अंकूश दवरलो. रहाणे बाद जाल्या उपरांत वेंकटेश अय्यर (6) आनी रिंकू सिंग(12) रोखडेच बाद जाले.

कोलकाताचे सकयले सुवाते वयल्या बॅट्समनांनी निर्शेणी हाडली. हातूंत म्हारगो खेळगडो वेंकटेश अय्यर, रिंकू सिंग आनी आंद्रे रसेल हांचो आस्पाव आसा. तांच्या अपेसाक लागून निमाण्या चार ओव्हरींनी 2 विकेटी व्हगडावन फकत 23 धांवड्यो करप शक्य जाल्यो.