भांगरभूंय | प्रतिनिधी
बंगळुरू, खबरां संस्था : बंगळुरूक एके वैजकी चाचणेंत एका मनशाक मरण आयिल्ल्याचें नोंद जालां. पुलिसांनी सांगलें, नागेश वीरण्णा (३३) हो एका संशोधन आनी विकास कंपनीच्या क्लिनिकल ट्रायल्सांत वांटेकार आशिल्लो. चाचणे मजगतीं दिल्ल्या वखदांच्या वायट परिणामांक लागून ताका मरण आयलें. पुलिसांनी मरण आयिल्ल्याचे भावाचे कागाळीवेल्यान बीएनएस कलम १९४ (३) खाला असैमीक मरणाची नोंद केल्या. संशोधन कंपनीक तपासात सहकार्य करपाक सांगलां.
मरण आयिल्ल्याचो भाव रेवन सिद्धप्पा हांणी सांगलें, डिसेंबर २०२४ वर्सा नागेशाक भलायकेच्या समस्यांक लागून खाजगी हॉस्पिटलाच्या आयसीयूंत दाखल केल्लो. उपरांत सिंजन इंटरनॅशनल नांवाचे एके संशोधन कंपनीन तांच्या क्लिनिकल ट्रायलचो भाग जावचे खातीर तांचे कडेन संपर्क केलो.
कंपनीन तांकां कांय गुळयो आनी इंजेक्शनां दिल्लीं. ताणें सांगलें, ताचो भाव गुळयो आनी इंजेक्शनां घेतले उपरांत पोटान दुखता म्हणून सांगतालो. मात, उपरांत ही समस्या जाणवूंक ना. भलायकी तपासणे खातीर तो कंपनींत नेमान वतालो. तशेंच २१ जानेवारीकूय तो तपासणे खातीर गेल्लो. परत आयले उपरांत रातचो जेवन न्हिदलो. सकाळीं जेन्ना तो उठूंक ना तेन्ना आमी कंपनीच्या डॉक्टरां कडेन संपर्क केलो. तांणी नागेशाचे ज्या हॉस्पिटलांत पयलीं उपचार केल्ले तातूञतच व्हरपाक सांगलें. थंय पावतांच दोतोरांनी नागेशाक मरण आयिल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
