भांगरभूंय | प्रतिनिधी
पावसान आडखळ हाडिल्ले मॅचींत पंजाब किंग्सान रॉयल चॅलेंजर्स बंगळुरूक 5 विकेटींनी हारायलो. पावसाक लागून मॅच दोन वरां उसरा सुरू करची पडली आनी ताका लागून मॅच 14-14 ओव्हरींची केली. बंगळुरून पयलीं बॅटींग करतना 14 ओव्हरींनी 9 विकेटी व्हगडावन 95 धांवड्यो केल्यो. पंजाबान 12.1 ओव्हरींनी 5 विकेटी व्हगडावन गरजेच्यो धांवड्यो करून जैत जोडलें. नेहाल वढेरान नाबाद 33 धांवड्यांची खेळी केली. जाल्यार प्रियांश आर्यान 16 आनी जोस इंग्लीसान 14 धांवड्यांचें योगदान दिलें.
ते आदीं पंजाब किंग्साच्या बॉलरांनी मुखेली श्रेयस अय्यरान टॉस जिखून घेतिल्ले बॉलिंग करपाचो निर्णय योग्य थारायलो. पयल्याच बॉलाचेर चवको खाल्ल्या उपरांत अर्शदीप सिंगान जबरदस्त पुनरागमन करतना फिल सॉल्टाक (4) बाद केलो. ते उपरांत फुडले ओव्हरींत ताणें विराट कोहलीक (1) बाद करून रॉयल चॅलेंजर्स बंगळुरूक खर धपको दिलो. अर्शदीप सिंग हो पंजाब किंग्सा वतीन सगल्यांत चड 86 विकेटी घेवपी बॉलर थारलो. ताणें पियुष चावलाक (84) फाटीं घालो.
लिएम लिव्हिंगस्टोनाक (4) व्हड खेळी करपाची संद आशिल्ली. पूण, इम्पॅक्ट प्लेयर म्हणून आयिल्ल्या लिएमाक पंजाबाच्या झेव्हियर बार्टलेट्ट हाणें बाद केलो.
14 ओव्हरींचे मॅचींत बंगळुरूचे बॅट्समन वेगान धांवड्यो करपाच्या नादांत नाकाशिल्ले शॉर्ट मारपाक लागले. ताचोच फटको पंगडाक बसलो. एका वेळार बंगळुरू वतीन खेळटना चिन्नास्वामी स्टेडियम गाजोवपी युजवेंद्र चहलान धपके दिले.
चहलान ताचे पयले ओव्हरींत जितेश शर्माक (2) कॅच बाद केलो. कृणाल पांड्याक बॅटिंगेंत बडती दिली. पूण, मार्को यान्सेनाच्या बावन्सराचेर तो गडबडलो. बॉल बॅटाक लागून पंजाबाच्या फिल्डराच्या हातांत गेलो.
बंगळुरूचे पांच बॅट्समन 33 धांवड्यांचेर तंबूंत परतून गेल्ले आसतना मुखेली रजत पाटीदारान एक बाजू सांबाळून धरिल्ली. पूण, ताका लेगीत चहलान तंबूंत धाडलो. पाटीदारान 18 बॉलांनी 1 सक्याचे मजतीन 23 धांवड्यो केल्यो.
यान्सेनान 9वे ओव्हरींत बंगळुरूक सातवो धपको दिलो. मनोज भंडागे एक धांवडी करून बाद जालो. अंदूं पयली मॅच खेळपी हरप्रीत ब्रारान ताचे पयलेच ओव्हरींत चार धांवड्यो दिवन 2 विकेटी घेतल्यो. ताणें भुवनेश्वर कुमार (8) आनी यश दयाल (0) हाका बाद केले.
टीम डॅव्हिड खेळपट्टीचेर तग धरून रावलो. ताणें 26 बॉलांनी पांच चवके आनी तीन सके मारून नाबाद 50 धांवड्यो करून पंगडाक 9 बाद 95 धांवड्यां मेरेन पावयलो. ब्रारच्या पयल्या तीन बॉलांचेर एकूय धांवडी मेळूंक नाशिल्ल्या डॅव्हिडान सेगीत तीन सके मारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
