बँक मॅनेजराचो जामीन अर्ज मारलो भायर

भांगरभूंय | प्रतिनिधी

समग्र शिक्षा अभियान 5.36 कोटी घोटाळो प्रकरण

म्हापशें : समग्र शिक्षा अभियानाच्या गोंय फांट्याच्या बँक खात्यांतल्यान 5.36 कोटी रुपया रक्कमेचो अर्थीक घोटाळो प्रकरणांत बँक ऑफ बरोडाच्या मॅनेजराचो अटकपुर्व जामीन अर्ज म्हापशें अतिरीक्त सत्र न्यायालयान भायर मारलो.
अफरातफर करून काडिल्ली पुराय रक्कम विम्यान पयलींच समग्र शिक्षा अभियानाच्या बँक खात्यांत जमा केली तरी गुन्यांवाची खराय उणी जायना. ह्या गुन्यांवांत आसपाव आशिल्ल्या सगल्या गुन्यांवकारांक धरपाक प्रकरणाच्या मुळाक वचप गरजेचें. अशे गुन्यांव वाडिल्ल्यान जातूंत ई-तंत्रांचो वापर करून लोकांच्या पुराय जिणेंतले जोडीची चोरी करतात, म्हणूनच हो एक गंभीर गुन्यांव जावन आसा, हाका लागूनच हो अर्ज नामंजूर करता अशें निरीक्षण न्यायाधीश अपूर्वा नागवेंकार हांणी नोंद केलां.
अर्जदार दुबावितान बँक ऑफ बरोडा, घोगळ फांट्यान धाडिल्ल्या ई मेलांक जाप कित्याक दिवंक ना. जातूंत योग्य तरेन व्हॅरिफिकेशन करिनासतना गिरायकांचो मोबायल कित्याक अपडेट केलो आनी डेबिटशी संबंदीत संदेश प्रत्यक्ष गिरायकां मेरेन कित्याक वचूंक ना, हो युव्ही सुरक्षा विशिश्टां विशीं दुबाव उक्तायलो. अर्जदाराक खबर आशिल्ली, हे सर्व शिक्षा अभियानाचे खातें आनी शिक्षकांक दिल्ले धनादेश हे इतल्या चड किंमतीचे नाशिल्ले. हाका लागूनच राजेश बेडिंग हांच्या नांवान काडिल्लो सुमार 45.67 लाख रूपयांचो धनादेश पळोवन अर्जदाराच्या मनांत शिटूकसाण निर्माण जावपाक जाय आशिल्ली. सर्व शिक्षा अभियानाच्या खात्यांतल्यान वट्ट 5 कोटी 36 लाख 3 हजार रूपया रक्कम काडली, जी एक सरकारी उपक्रम आसा आनी ते सार्वजनीक पयशे आशिल्ले, अशें निरिक्षण न्यायालयान आदेशपत्रात नोंद केलां.
मजगतीं, ह्या प्रकरणांत पर्वरी आनी गुन्यांव फांट्याच्या पुलिसांनी पश्‍चीम बंगालांतल्या वट्ट सात दुबावितांक अटक केल्या. हातूंत रबिन पॉल, पुर्णशीश साना उर्फ सुमन, अलामिन मोंडल उर्फ रॉकी, बिद्याधर मल्लिक उर्फ बाबू, उर्फ विकी, सुमंता मोंडल, म्रिगंका जोर्दर आनी सुभाशीश सिकदर हांचो आसपाव आसा. हे सगले दुबावीत जामीन मुक्त आसात.
चवकशेचो भाग म्हणून तपास अधिकार्‍यांनी ता. 9, 10 आनी 11 जुलयाक अर्जदार बँक मॅनेजराक चवकशे खातीर समन्स दिलो तेन्ना ता. 15 जुलयाक ते हाजीर जाले. मात तांणी तपासांत सहकार्य करूंक ना आनी आपल्या दाव्यांच्या समर्थनाक कागदपत्रां सादर करूंक नाशिल्ल्याचें न्यायालयाच्या निदर्शनाक सरकारी वकीलांनी हाडून दिलें. न्यायालयांत सरकारी पक्षा वतीन सरकारी वकील पी. नारूलकार हांणी अर्जदाराच्या वतीन ऍड. एस. सामंत हांणी युक्तीवाद केलो.
मजगतीं, ह्या प्रकरणांत समग्र शिक्षा अभियानाचे संचालक डॉ. शंभू घाडी हांणी पर्वरे पुलिशेञत कागाळ दाखल केल्ली. फाटल्या ता. 21 फेब्रुवारी ते 5 मार्च 2025 मजगतीं हो अर्थीक घोटाळ्याचो प्रकार घडिल्लो. अभियानाच्या गोवा फांट्याच्या बँक खात्यांतल्यान 5.36 कोटी रुपयांची अफरातफर जाल्ल्याचें निश्पन्न जाल्लें. ते प्रमाण पुलिसांनी पयले दुबावीत रबिन पॉल हाका अटक केली. ताच्या बँक खात्यांत 1.8 कोटी रूपया रक्कम जमा जाल्ले. उपरांत पर्वरी पुलिसांनी हें प्रकरण गुन्यांव फांट्या कडेन वर्ग केल्लें.