भांगरभूंय | प्रतिनिधी
नवी दिल्ली, खबरां संस्था ः देशांतल्या वट्ट बँक खात्यांत बायलांचो वांटो 39.2% आसा. इतलेंच न्हय तर बँक खात्यांतल्या वट्ट डॅपॉझीटा मदीं बायलांचोय वांटो 39.7% आसा. गांवगिऱ्या वाठारांनी 42% खातें धारक बायलां आसात. सांख्यिकी मंत्रालयान आयतारा ‘भारतांतली बायलां आनी दादले 2024’ हो अहवाल जाहीर केला. तातूंत ही आंकडेवारी दिल्या.
शेअर बाजारांत बायलांचोय वांटो नेटान वाडत आसा. 31 मार्च 2021 ते 30 नोव्हेंबर 2024 ह्या काळांत डिमॅट खात्यांचो आंकडो 3.32 कोटींतल्यान 14.3 कोटी मेरेन वाडला. ही वाड चार पटींनी चड आसा. 2021 वर्सा डिमाट खात्यांतल्या बायलांचो आंकडो फकत 6.67 लाख आशिल्लो. 2024 वर्सा तो आंकडो वाडून 2.77 कोटी जालो.
पंचायतींनी बायलांचो चड वांटो
पंचायतींनी बायलांचो चड वांटो आसा. सगळ्यांत चड 56% उत्तराखंडांत, उपरांत आंध्र प्रदेश 55.5 टक्के, छत्तीसगडांत 55%, आसामांत 54.7%, केरळ 54.5, महाराष्ट्र 54.3% आसा. पंचायतींनी बायलांचें प्रमाण सगळ्यांत उणें लडाख 31.8%, दादरा-नगर हवेली 32%, जम्मू-काश्मीर 33.2%, आनी उत्तर प्रदेशांत 33.3% आसा.
स्टार्टअपांत बायलां संचालकांचे प्रमाण वाडले. फाटल्या कांय वर्सांत अशें स्टार्टअप वाडलें जातूंत एक तरी बायल संचालक आसा. अशा स्टार्टअपांची वट्ट संख्या 2017 वर्सा 1,943 आशिल्ली, जी 2024 वर्सा 17,405 जाल्या.
बायलां मतदारांच्या भागींदारींत वाड
1952 वर्सा वट्ट मतदारांची संख्या 17.32 कोटी आशिल्ली, जी 2024 वर्सा 97.8 कोटी जाल्या. बायलां मतदारांची संख्या आनी तांच्या भागीदारीत उल्लेखनीय वाड जाल्या. 2024 वर्सा बायलांचें मतदान दादल्यां परस चड उरलें. हाचे वयल्यान आतां लोकशाय प्रक्रियेंत बायलांचो चड सक्रीय वांटो आसा अशें दिसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
