भांगरभूंय | प्रतिनिधी
पणजी : फाटल्या कांय वर्सांनी राज्य सहकारी बँक लुकसाणांतल्यान परत फायद्यांत आयली. सध्या ही बँक हेर खाजगी बँकां कडेन सर्त करपाची तयारी करता. हे खातीर यूपीआय, मोबायल आनी इंटरनॅट बँकींग सुविधा बेगीनूच बँके कडल्यान मेळटली अशी म्हायती बँकेचे अध्यक्ष उल्हास फळदेसाय हांणी दिली. बिरेस्तारा पणजे जाल्ले पत्रकार परिशदेंत ते उलयताले. ह्या वेळार पांडुरंग कुर्टीकार, अनंत चोडणकार आनी हेर पदाधिकारी हजर आशिल्ले.
२०१२ वर्साचे निमाणे कडेन बँक ६८.३६ कोटी रुपयांनी फुकसाणांत आशिल्ली. उपरांत सरकारान दिल्ल्या आदारान आनी आमच्या यत्नांनी लुकसाण उणें जायत गेलें. मार्च २०२४चे निमाणे कडेन बँक ४.२८ कोटी रुपयांनी फायद्यांत आसा.फाटल्या एका वर्सान बँकेची अनुत्पादीत मालमत्ता (एनपीए) १०.३ वेल्यान ४.१७ टक्के इतकी उणी जाल्या. ह्या अर्थीक वर्सा बँकेचो वेवसाय सुमार २१ कोटी रुपयांनी वाडला. सध्या बँकेची स्थिती बरी आसा. ताका लागून १४ वर्सां उपरांत पयलेच फावट बँकेन अंदूं ३ टक्के लाव जाहीर केला, अशें फळदेसाय हांणी सांगलें.
बँकेची स्थापना २ फेब्रुवारी १९६४ दिसा जाल्ली. अंदूं बँकेन ६० वर्सां पुराय केल्यांत. सर्गेस्त भाऊसायब बांदोडकर हांणी गोंयांत सहकार क्षेत्र येवचे खातीर बँकेची स्थापना केल्ली. फाटल्या साठ वर्सांनी बँकेन कदंब, ईडिसी, संजीवनी साखर कारखानो अशा जायत्या प्रकल्पांक मजत केल्या. १९९७-९८ उपरांत कांय कारणां खातीर बँकेची स्थिती हाल्ली. मात मुखार सरून आमी ती स्थिती बदल्ली आनी बँकेक परत फायद्यांत हाडली, अशेंय तांणी मुखार सांगलें.
फळदेसाय हांणी, बँकेच्या ६० व्या वर्धापन दिसा निमतान फाल्यां पाट्यार मुख्यालयांत दनपरां तीन वरांचेर कार्यावळीचें आयोजन केलां. कार्यावळीक मुखेल सोयरे म्हणून मुख्यमंत्री डॉ. प्रमोद सावंत तशेंच सहकार मंत्री सुभाष शिरोडकार हाजीर रावतले. ह्या वेळार बँके खातीर काम केल्ल्या आदल्या अध्यक्षांचो तशेंच हेर सहकारी संस्थांचो भोवमान जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
