भांगरभूंय | प्रतिनिधी
म्हजें मत
आयज- काल सायबर विश्वांत वावुरतना बरेच खेपे सायबर ठकसेन आमची म्हायती नकळटां चोरतात. पूण आमकां तें कळना. कांय दिसांनी अर्थीक फटवणुकेचो प्रकार घडलो काय, ‘आरे हें कशें जालें’, ह्या प्रस्नाची जाप सोदीत आमी बसतात. पूण, आमी केल्ले चुकीक लागूनच हो प्रकार घडिल्लो आसता.
कार्ड वापराक लागून वेव्हार करप सोंपें जाल्लें आसलें तरी आपली कार्डा वयली म्हायती कशी सुरळीत उरतली, हाचे कडेन विशेश लक्ष दिवप गरजेचें. बँकेतल्यान येवपी फोनाचेर आमचो खूब विस्वास आसता. फोनाचेर उलोवपी व्यक्ती आपूण बँकेंतल्यान उलयतां अशें सांगून आपलें नांव सांगलें काय आमी ताचेर विस्वास दवरतात. मागीर ताका म्हायती सांगून आपली फटवणूक करून घेतात.
क्रेडीट कार्ड तोपीमास्टर तर सामके हुशार आसतात. ते ताचे वयली म्हायती चोरतातूच पण फटवणुकीचे वेव्हार करचे पयलीं कितें तरी निमित्त करून आमच्या कडल्यान क्रेडिट कार्डाची म्हायती खरी आसा काय ना, ताची पडताळणी आमचे कडल्यानूच करून घेतात. आमी ह्या केव्हायसी भानगडीक सोंपेपणी बळी पडटात.
बँकेचीं केव्हायसीचीं कामा केन्नाच फोनाचेर जायनात, हें घट मतींत दवरचें. फोनाचेर कसलीय म्हायती दिवं नाकात. ताका कोंकणींतल्यान उलोवपाक सांगात. कारण 99 टक्के ठकसेनांक कोंकणी कळना, ते हिंदींत उलयतात. फोनाचेर उलोवपी व्यक्ती कोंकणी उलयलो तरी ताचेर सट करून विस्वास दवरूं नाकात. तशें केल्यार तुमकां फटवणुकीच्या प्रकारां पसून पयस रावपाक मजत जातली. जंय तुमकां दुबाव आसा, थंय कार्डाचो वापर करूं नाकात. बँकेंचें कसलेंय काम आसल्यार तें थंय वचून करात. कोणाकूच आपल्या बँक खात्याची म्हायती दिवची न्हय. ओटीपी, पासवर्ड दिवचो न्हय. तशें केल्यारुच तुमी फटवणुकी पसून स्वताक वाटावंक शकतले.
पवित्र स्वस्तीक
स्वस्तिकाक भारतीय संस्कृतायेचें प्रतिक मानतात. खंयच्याय मंगलकार्याच्या सुरवेक एक मंत्र म्हणटात, तो म्हणल्यार स्वस्तीमंत्र. ‘ॐ स्वस्ति न इन्द्रो वृद्धश्रवाः। स्वस्ति नः पूषा विश्ववेदाः। स्वस्ति नस्तार्क्ष्यो अरिष्टनेमिः। स्वस्ति नो बृहस्पतिर्दधातु’. हाचो अर्थ म्हान इंद्र आमचें कल्याण करुं. विश्वाचो ज्ञानरुप पूषादेव आमचें कल्याण करूं. जाचें शस्त्र अतुट आसा, असो गरुड आमचें कल्याण करूं. ‘स्वस्तीक’ हें मनशान तयार केल्लें प्राचीन प्रतिक. स्वस्तीक हें उतर ‘सु + अस’ ह्या धातू पसून तयार केला. ‘सु’ म्हणल्यार बरें, मंगल आनी ‘अस’ म्हणल्यार सत्ता. स्वस्ती म्हणजे मांगल्याचें अस्तित्व, बरी सत्ता आनी ताचें प्रतिक म्हणल्यार ‘स्वस्तिक’.
स्वस्तीक म्हणल्यार मंगलमय भावना आनी भावना ही अशी गजाल की, ताचेर सगल्यांची उदरगत अवलंबून आसता. देवाची शक्त आनी मनशाची परोपकारी भावना ह्या दोगांयच्या एकवटाचें प्रतिक म्हणल्यार स्वस्तीक. घराच्या हुंबऱ्याचेर, लग्ना वेळार, शुभकार्यांत रांगोळेच्या स्वरुपांत घालतात, त्या स्वस्तिकाक जैन, बौद्ध धर्मांतूय म्हत्व आसा. स्वस्तिकाचे चार खांदे म्हणल्यार श्रीगणेशाचे चार हात आनी मदलें + म्हणल्यार ताची कूड, असो ताचो अर्थ.
– गजानन बा. नायक भाटकार
शिवकृपा, आल्त पर्वरी (बार्देश)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
