भांगरभूंय | प्रतिनिधी
पणजीः दयानंद समाजीक सुरक्षा येवजणे खाला लाबार्थ्यां कडल्यान फटवणूक जावची न्हय हे खातीर समाज कल्याण खातें खर उपाय करीत आसा. हाचो एक भाग म्हूण आतां खात्यान नवे सुचोवण्यो जारी केल्यात. हाचे प्रमाण खात्यांतल्यान मेळिल्लो निधी स म्हयन्यां भितर बँकेंतल्यान काडलो ना जाल्यार, वा आयुश्य प्रमाणपत्र दिवंक ना जाल्यार लाबार्थ्यांक आतां बँक खात्यांतल्यान हो निधी काडपाक मेळचो ना. खात्याक लाबार्थ्याचें बँक खातें निश्क्रीय दिसलें जाल्यार निधी परतून समाज कल्याण खात्याक हस्तांतरीत जातलो. बँकांक हे संबंदी सुचोवण्योय दिल्यात.
खात्याच्या वरिश्ठ अधिकाऱ्यांच्या म्हणण्या प्रमाण, फाटल्या कांय म्हयन्यां सावन दयानंद समाजीक सुरक्षा येवजणे खाला बनावट, अपात्र लाबार्थ्यांची वळख करून तांचीं नांवां काडून उडोवपाची मोहीम खातें चलयता. अशा लाबार्थ्यां कडल्यान आतां मेरेन खात्यान कोटी रुपयांचो निधी वसूल केला. हातूंतले कांय लाबार्थी सध्या गोंया भायर काम करतात. कांय जाण देशा भायर काम करपी लेगीत सांपडल्यात. अशे लाबार्थी वर्साक एक फावट भारतांत येतात आनी हे येवजणे खाला बँक खात्यांत जमा केल्ले पयशे वर्साक एक फावट काडटात हें लक्षांत आयलां. अशा घडणुकांचेर आळाबंदा हाडपा खातीर खात्यान नवो आदेश जारी केला.
अशा खातेंधारकांचेर बँकांनी नदर दवरची अशें खात्यान सांगलां. सध्या राज्यांतल्या सुमार 1.29 लाख लोकांक हे येवजणे खाला निधी मेळटा. हे येवजणे खाला ज्येश्ठ नागरीक, विधवा, दिव्यांग, ज्येश्ठ नागरीक, आनी एच.आय.वी./एड्स दुयेंतींक निधी दितात. कांय प्रमाणांत दिव्यांग आशिल्ल्या भुरग्यांच्या पालकांक म्हयन्याक 2,500 रुपया, 90 ते 100 टक्के दिव्यांग आशिल्ल्या भुरग्यांच्या पालकांक म्हयन्याक 3,500 रुपया, भुरगीं नाशिल्ल्या विधवा बायलांक 2,500, 21 वर्सां सकयल्या भुरगीं आशिल्ल्या विधवा बायलांक 4,000 तशेंच 21 वर्सां परस उणी पिराय आशिल्ल्या विधवांक 4,000 रुपया, ल्हान भुरगें आनी 60 वर्सां वयर पिराय आशिल्ल्या विधवांक दर म्हयन्याक 2,500 रुपया मेळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
