भांगरभूंय | प्रतिनिधी
नवी दिल्ली, खबरां संस्था ः बँकींग कायदो दुरुस्ती विधेयक काल लोकसभेंत मंजूर जालें. बँकिंग दुरुस्ती विधेयक 2024 खाला जायते म्हत्वाचे बदल प्रस्तावीत केल्यात. तातूंत आतां भारतीय रिझर्व्ह बँक कायदो 1934, बँकिंग नियमन कायदो 1049, स्टेट बँक ऑफ इंडिया कायदो 1955 आनी हेर कायद्यांत दुरुस्ती जातली. विधेयका प्रमाण आतां एका बँक खात्यांत चार नॉमिनी जोडपाची तरतूद आसा. हाचे वांगडा नव्या बँकींग कायदो विधेयकांत ठेवीदारांक संरक्षण आनी खाजगी बँकांनी बरी सेवा दिवपाची तरतूद आसा.
कोवीड 19 महामारीक लागून जाल्ल्या समस्यां उपरांत बँकींग कायदे दुरुस्ती विधेयकांत हे व्हडले बदल केल्यात. म्हत्वाचें म्हणल्यार आतां एका नॉमिनीच्या जाग्यार चार नॉमिनी जोडपाक मेळटा. खातें धारकाक मरण आयल्यार ताचे वारसदारांक पयशे काडपाक सोंपें करप हो ताचो हेत आसा.
अर्थमंत्री निर्मला सीतारमण हांणी सांगलें, ह्या विधेयकांत आनीक एक म्हत्वाचो बदल जाला आतां मेरेन सात वर्सां खात्यांत वेव्हार जालो ना जाल्यार तो गुंतवणूकदार शिक्षण आनी संरक्षण निधींत हस्तांतरीत जातालो. हे दुरुस्ती उपरांत खातें धारक गुंतवणूकदार शिक्षण आनी संरक्षण निधींतल्यान परताव्याचो दावो करूंक शकता.
सहकारी बँकांतल्या संचालकांचो (अध्यक्ष आनी पुराय वेळ संचालक सोडून) कार्यकाळ आठ वर्सां वयल्यान धा वर्सां मेरेन वाडोवपाचो प्रस्ताव ह्या विधेयकांत केला. ही दुरुस्ती संविधान (97 वी दुरुस्ती) कायदो, 2011 खाला केल्या. बँकींग दुरुस्ती विधेयकांत बँकांक वैधानीक लेखा परीक्षकांचे मानधन थारावपाक चड स्वातंत्र्य दिवपाची तरतूद आसा. हातूंत नियामक अनुपालन करपा खातीर बँकांक अर्थीक डेटा अहवाल दिवपाच्यो तारखो दर म्हयन्याच्या 15 तारखेर आनी निमाण्या दिसा बदलपाक सांगल्यात. सध्या बँकांनी दर म्हयन्याच्या दुसऱ्या आनी चवथ्या शुक्रारा हो अहवाल धाडप सक्तीचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
