भांगरभूंय | प्रतिनिधी
प्रेमेंद्र शेट: सांखळे एसीजीएल कंपनीन सुरू केल्ल्या फ्लिप्ड क्लासरुमाचें उक्तावण
दिवचल: टाटा कंपनी कडेन संलग्न आशिल्ल्या एसीजीएल कंपनीन रोजगारा बरोबरूच समाजीक सेवेंत म्हत्वाचें योगदान दिलां. नव्या शिक्षणीक धोरणाक अनुकूल थारपी आनी नाविन्य आनी तंत्रज्ञान, कुशळटाय हाची भर आशिल्ल्या शिक्षण फ्लिप्ड क्लासरूमच्या माध्यमांतल्यान उपलब्ध जावपाची आशिल्ल्यान ह्या येवजण्याचो हजारांनी भुरग्यांक फायदो जातलो, आनी शिक्षणीक क्रांतीक व्हड चालना मेळटली अशें आमदार प्रेमेंद्र शेट हांणी सांगलें.
एसीजीएल कंपनी वतीन समाजीक सेवा उपक्रमा खाला डिजिटल फ्लिप्ड क्लासरूमाचें उक्तावण प्रेमेंद्र शेट हस्तुकीं सांखळे रवींद्र भवनांत केलें.
ह्या वेळार माचयेर कंपनीचे चेअरमन तशेंच धेंपो उद्देग समुहाचे अध्यक्ष श्रीनिवास धेंपो, शिक्षण खात्याचे संचालक शैलेश झिंगडे, कंपनीची सेवा उपक्रम अधिकारी डॉ. वैजयंती पंडीत, वेवस्थापकी संचालक ओ.व्ही. अजय, यतीन काकोडकार, राघवेंद्र सिंग बुटेला, लेहर तावडे बी मानेस्त हाजीर आशिल्ले.
ह्या वेळार डॉ. पंडीत हांणी कंपनी सेवा उपक्रमाची म्हायती दिली. डिजिटल शिक्षणाचो लाव लाखांनी भुरग्यांक मेळटलो अशें तांणी म्हणलें.
श्रीनिवास धेंपो हांणी टाटा कंपनी खूबशा वर्सां सावन सेवा कार्यांत कार्यरत आसा. देशभरांत खूबश्यो सेवा येवजण्यो राबयतना विकासांत व्हड योगदान दिलां. देश आयज अर्थीक महासत्ताचे दिशेन वाटचाल करीत आसतना तरणाटे पिळगे खातीर डिजिटल शिक्षण क्रांत घडोवपी थारतलें. ई शिक्षणाक लागून शिक्षणीक मळार मोटो बदल दिसून येता. गोंयांतल्या हजारांनी भुरग्यांक डिजिटल शिक्षणीक येवजणेचो लाव घेवंक मेळटलो. सगल्या मळार हो पर्याय क्रांतीकारी थारतलो अशें धेंपो हांणी सांगलें.
मुख्यमंत्री डॉ. प्रमोद सावंत हांणी ई लर्निंगाक म्हत्व दितना खूबश्यो येवजण्यो आंखल्यांत. तांच्या फुडारपणा खाला शिक्षणीक मळार निश्चीतपणान नवे पर्याय, नव्यो संदी ह्या माध्यमांतल्यान उपलब्ध जातल्यो अशें तांणी सांगलें.
ह्या वेळार लहर तावडे हांचेंय उलोवप जालें. कार्यावळीचें सुत्रसंचालन प्रांजळ मराठे हांणी केलें. जाल्यार ओ.व्ही. अजय हांणी उपकार मानले. ह्या वेळार विवीध मानेस्तांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
