भांगरभूंय | प्रतिनिधी
पणजी: गोंयच्या मनोहर आंतरराष्ट्रीय विमानतळार (एमआयए) आधारीत फ्लाय ९१ ही प्रादेशीक विमान सेवा सध्या सप्तकभरांत १०० परस चड उड्डाण करतात. येवपी गिमाळ्यांत हो आंकडो १५० मेरेन वाडोवपाची येवजण विमान सेवेन आखल्या, अशें सेवेच्या अधिकार्यांनी सांगलें.
फ्लाय ९१ न मार्च २०२५ वर्सा विमानसेवेचें एक वर्स पुराय केलां. ह्या काळांत ३,५०० परस चड उड्डाण करीत, सुमार १.७ लाख प्रवाशांनी फ्लाय ९१ चो प्रवास अनुभवलो. सेवा सुरू जाल्ल्याक कंपनीन दरेका सप्तकांत नेमान १०० उड्डाणांची येसस्वी अंमलबजावणी केल्या, वेळापत्रकूय पाळ्ळें. आतां गिमाळ्या प्रवासाचे वाडपी मागणे खातीर १५०+ उड्डाणांची तयारीय केल्या.
फ्लाय ९१ चें तिसरें एटीआर ७२-६०० विमानाचो आतां अधिकृतपणान फ्लीटांत आसपाव जाला, जाल्यार चोवथें विमान रोखडेंच दाखल जातलें. एकाच वेळार दोन एटीआर ७२-६०० विमानां सरळ विकतीं घेवप हो भारताच्या प्रादेशीक विमान येरादारीच्या इतिहासांतलो एक म्हत्वाचो टप्पो.
एटीआर ७२-६०० हीं ७२ सिटां आशिल्लें इंधन कार्यक्षम विमानां ल्हान धांवपट्ट्यांवचेर सहज देंवपाचे तांकी खातीर वळखतात. फ्लाय ९१ च्या फ्लीटांत ह्या विमानांचो आसपाव जाल्लयान टियर २ आनी टियर ३ शारां सयत आड नदर जाल्ल्या वाठारां कडेन हवाई संपर्क प्रस्थापीत करपाचें कंपनीचें आशिल्लें उद्धीश्ट आदीक सुरळीत आनी प्रभावी थारतलें.
नव्या उपक्रमांच्या रूपान, फ्लाय ९१ न उड्डाणा मजगतीं गरम जेवण आनी कोल्डींक्सांची प्रीबुकिंग सेवा सुरू केलया. ही सेवा दिवपी मेजक्या प्रादेशीक एटीआर ऑपरेटर्स मदले एक जावपाचो मान फ्लाय ९१ क मेळ्ळा.
आमच्या तिसर्या एटीआर विमानाचें फ्लीटांत येवकार हीच आमच्या प्रवासांतली एक म्हत्वाची पायरी. एकाच वेळार दोन विमानां घेवप हें आमच्या स्थीर, विस्वासू आनी नियोजनबद्ध वाडीच्या धोरणाचो भाग. आमचें मुखेल लक्ष भारता कडेन आनी अर्थपूर्ण जोड निर्माण करपांतूच आसा, अशें फ्लाय ९१ चे वेवस्थापकीय संचालक आनी मुखेल कार्यकारी अधिकारी मनोज चको हांणी सांगलें.
उडाण ५.० खाला सध्या सुरू आशिल्ल्या सिंधुदुर्ग, जळगांव आनी अगत्ती ह्या केंद्रांक बंगळुरू, हैदराबाद, पुणे आनी गोंयां सारकिल्ल्या मुखेल शारांकडेन जोडपी सेवांचो आनीक विस्तार जातलो. फ्लाय ९१ चें लक्ष्य देशभरांतल्या ५० परस चड शारांक सेवा दिवप आसा. तशेंच येवपी पांच वर्सांनी ३० एटीआर विमानांचो आसपाव फ्लीटांत करपाचो हेत आसा. हाका लागून विवीध प्रादेशीक केंद्रांचेर आधारीत नवी विमानसेवा सुरू करपाची येवजण फ्लाय ९१ न राबयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
