भांगरभूंय | प्रतिनिधी
पणजी : पावसांत पर्वरे फ्लायओव्हराचें काम करतना फावो ते सुरक्षेच्यो उपाय येवजण्यो करपाचे आदेश म्हामार्गाच्या अभियंत्यांक दिला. पर्वरेंतले रस्ते आनी भुंयगत वीज वाहिन्यांचीं कामां पुराय करपा खातीर 20 मे 2025 ही डेडलायन आसा. मंत्री आनी पर्वरेचे आमदार रोहन खंवटे हांणी बसके उपरांत पत्रकार परिशदेंत ही म्हायती दिली.
पर्यटन मंत्री आनी पर्वरेचे आमदार रोहन खंवटे हांणी पावसा पयलींचे तयारे खातीर मंत्रालयांत बसका घेतली. हे बसकेक उपजिल्होधिकाऱ्यां सयत खात्यांचे अभियंते आनी पर्वरी मतदारसंघातले सरपंच हाजीर आशिल्ले. पर्वरी मतदारसंघाचो संबंद पुराय गोंयच्या लोकां कडेन येता. पर्वरे फ्लायओव्हराचें काम सध्या नेटान सुरू आसा. फ्लायओव्हराच्या कामाक लागून पावसांत रस्त्याचेर माती व्हांवून येवपा सयत फोंडकुलां पडपाचो धोको आसा. रस्त्या कुशीक गटारां नितळ करपा सयत उदक व्हांवून वचपा खातीर वेवस्था करपाची गरज आसा. फोंडकुलां पडलीं जाल्यार ती बेगोबेग पुरोवपाची गरज आसा. फ्लायओव्हराच्या कामाक लागून रस्तो आनीक घातक जावपाची भिरांत आसा. सुचोवणी फलक लावपा सयत उपाय येवजण्यो करपाचे आदेश मंत्री रोहन खंवटे हांणी म्हामार्ग अभियंत्यांक दिले.
पर्वरे मुखेल रस्तो आनी मतदारसंघांत विजेचे भुंयगत केबल घालपाचीं कामां सुरू आसात. हाका लागून कांय रस्ते फोडल्यात. हीं सगलीं कामां 20 मे मेरेन पुराय करचीं पडटलीं. उदका पुरवण, रस्ते तशेंच हेर कामां पुराय करपा खातीर 20 मे ही डेडलायन दिल्या.
पर्वरे फ्लायओव्हराचें काम नेटान सुरू आसा. पावसांत फ्लायओव्हराक लागून येरादारीक आनीक धोको निर्माण जावपाची शक्यताय पंच आनी सरपंचांनी उक्तायली. बसकेंत हाचेर बरीच चर्चा जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
