भांगरभूंय | प्रतिनिधी
दिवचल: कुमयामळा हांगासरले फ्रान्सीस जेरॉन डिसोझा (38) हांची कूड शेता कुशीच्या व्हाळांत हुबतना सांपडली. एक शेतकार आपल्या गोरवांक घेवन शेतांत गेल्लो तेन्ना गोरवां तण खायत आसतना व्हाळा कुशीक गेली तेन्ना रोखडींच तीं फाटीं सरलीं. कितें तरी विचित्र आसा अशें समजून कितें आसा हें पळोवपाक सदर शेतकार व्हाळा कुशीक गेलो तेन्ना झोंपांत आडकल्ली कूड दिसली.
ताणें रोखडेंच आपल्या घरा येवन लोकांक सांगलें. थंयच्या ग्रामस्थांनी वचून पळोवणी केली आनी तांणी पंचायत वांगड्यांक हाची कल्पना दिवन रोखडेंच पुलिसांक हाची म्हायती दिली. पुलिसांनी येवन कूड व्हाळांतल्यान काडली आनी मरणा उपरांतचे तपासणे खातीर बांबोळ हॉस्पिटलांत धाडून दिल्या.
कूड व्हाळांतल्यान भायर काडले उपरांत थंय हाजीर आशिल्ल्या ताच्या भावान कूड आपल्या भावाची आशिल्ल्याचें सांगलें. ही कूड वळखुपाचे स्थितींन नाशिल्ली. नुस्त्यांनी कूड खाल्ल्यान ती वळखप कठीण आशिल्लें. पूण ताच्या भावान सांगलें की तो आयतारा 17 ऑगस्ट दिसा सकाळीं घरांतल्यान भायर सरिल्लो तो परतून आयलोच ना. आमी सोद घेतलो पूण ताचो सोद लागलो ना. फ्रान्सीस डिसोझा हो बेरोजगार आसून तो भावाच्या गोरवांची देखभाव करतालो. कुडीची तापसणी केले उपरांत आत्महत्या काय सैमीक मरण हें समजतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
