फ्रांन्सांत भारताची यूपीआय पद्दत
भांगरभूंय | प्रतिनिधी
प्रधानमंत्री मोदींचे भेटी वेळार कबलात जावपाची शक्यताय
भांगरभूंय । खबरां संस्था
नवी दिल्ली ः प्रधानमंत्री नरेंद्र मोदी हांच्या फ्रांन्स भोंवडे वेळार डिजिटल अर्थवेवस्था, उत्पादन क्षेत्र आनी हरित इंधन ह्या मळार दोनूय देशां मदीं सहकार्याचीं पावलां उबारतले. भारताचें युनिफायड पेमेंट्स इंटरफेस म्हळ्यार यूपीआय प्रणाली हे भोंवडे वेळार फ्रांसांत सुरू करपाची शक्यताय आसा.
सद्या भारता भायर सिंगापूरांत यूपीआय पद्दत वापरतात. ह्याच वर्सा यूपीआय पद्दत चलोवपी भारतीय नॅशनल पेमेंट्स कॉर्पोरेशन (एनपीसीआय) आनी सिंगापूरांतल्या पेनाऊ हांणी कबलात केली. ताका लागून सिंगापूरांत यूपीआय आनी भारतांत पेनाऊ वापरपाक शक्य जाले. एनपीसीआय आनी फ्रांन्साची लायरा कंपनी एक वर्स जालें ताचेर काम करतात. मोदीच्या भोंवडे वेळार युपीआयचो वापर सुरू करपी युरोपांतलो पयलो देश फ्रांस थारतलो.
नॅशनल पेमेंट्स कॉर्पोरेशन ऑफ इंडियान ‘यूपीआय’ पद्दत तयार केल्या. रिझर्व्ह बँक ताचेर नियंत्रण दवरता आनी सध्या देशांतल्या सुमार 400 बँकांक आनी बिगर बँकींग अर्थीक कंपनींचो ‘यूपीआय’ कडेन संबंद आसा.
भारत -फ्रांस उद्देजकांची बसका
भारत-फ्रांस मुखेल कार्यकारी अधिकारी परिशद परतून सुरू जाला. हे परिशदेची बसका आयज 14 जुलयाक पॅरिसांत जातली आनी तातूंत दोनूय कडल्यान 10 ते 12 उद्देजक हाजीर आसतले. भारतीय शिश्टमंडळाचें फुडारपण ज्युबिलंट गटाचे सह-अध्यक्ष हरि भाटिया आनी फ्रेंच शिश्टमंडळाचें फुडारपण कॅपजेमिनी एसईचे अध्यक्ष पॉल हर्मिलीन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
