भांगरभूंय | प्रतिनिधी
भांगरभूंय । प्रतिनिधी
बेळगांवः बेळगांवांत फोर्ट लेक वाठारांत देशांतले सगल्यांत उंच सुवातेर तिरंगो मंगळाराक हुबयलो. बेळगांव उत्तर मतदारसंघाचे नवनिर्वाचीत काँग्रेस आमदार असिफ (राजू) सैत हाचे हस्तुकीं 5400 फूट उंचायेर व्हो तिरंगो वंदे मातरम आनी भारत माता की जय ह्या जयघोशांत हुबयलो.
आदले आमदार फिरोझ सैत हांणी 2018 वर्सा सगल्यांत उंच सुवातेर तिरंगो लावपाच्या कामाक सुरवात केल्ली. तिरंगो हुबावपाचे कार्यावळीक ते हाजीर आशिल्ले. तिरंगो ताचे 110 मीटर उंचायेर पावलो तेन्ना तांकां जाल्ली खोस तांच्या मुखामळार दिसताली. हाचे फुडें दर दिसा व्हो तिरंगो हुबयले अशें आमदार असिफ सैत हाणे सांगलें. राष्ट्र अभिमानाच्यो घोशणा दिल्यो म्हणून कांय जायना. राष्ट्र मोग आपले कृतींतल्यान दिसून येवपाक जाय. वेंचणूक प्रचारा वेळार व्हो तिरंगो दिसपट्टो हुबोवपाचें उतर हांवें दिल्लें. हवामान बरें ना तो दीस सोडल्यार तिरंगो हुबोवपाचें काम जातलें अशे ताणे सांगलें.
व्हो तिरंगो म्हणल्यार लोकां मदलो एकचार आनी शांतताय इबाडपाक पळोवपी लोकांक दिल्लो एक संदेश आसा. बेळगांव म्हानगरपालिकेक हांवें दिसपट्टो तिरंगो हुबोवपाक सांगला. तांकां तें जमचें ना जाल्यार हांव म्हज्या खर्चांतल्यान हें काम करतलों अशें असिफ सैतान सांगलें. आपल्या मतदारसंघांत सगले हायमास्ट दिवे सारके करपाक सांगल्यांत. कंत्राटदारान हें काम केलें ना जाल्यार ताचेर खर कारवाय करतले. काँग्रेस पक्षाचो चेंचणूक जाहिरनाम्यांत दिल्ल्या आस्वासनांक पाळो दिवपाचें काम रोखडेच हांतांत घेतले अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
