फोमेंतोच्या कालें खण ब्लॉकाक लोकांचो येवकार

भांगरभूंय | प्रतिनिधी

पणजी : फोमेंतो कंपनीच्या कालेंच्या खण ब्लॉकाक थळाव्या लोकांनी येवकार दिला. रोजगार तशेंच वेवसायीक मंदी पयस जावपा खातीर बेगिनांत बेगीन खण ब्लॉक सुरू जावपाची मागणी भौशीक सुनावणी वेळार लोकांनी केली.

फोमेंतो कंपनीच्या काले खण ब्लॉका खातीरची भौशीक सुनावणी सांवड्डेंतल्या सभाघरांत जाली. सांगेंचे उपजिल्होधिकारी मिलिंद वेळीप तशेंच प्रदुशण नियंत्रण मंडळाचे अधिकारी भौशीक सुनावणेक हाजीर आशिल्ले. भौशीक सुनावणे वेळार 70 परस चड लोकांची हाजेरी आशिल्ली. खण ब्लॉक बेगीन सुरू करपाची मागणी लोकांनी केली. रोजगार उपलब्ध जावपा खातीर खणी सुरू जावप गरजेचें आसा, अशें मत लोकांनी मांडिल्ल्याची म्हायती सांगेंचे उपजिल्होधिकारी मिलिंद वेळीप हांणी दिली. भौशीक सुनावणेचे इतिवृत्त आमी संबंधीत खात्यांक सादर करतले, अशें तांणी सांगलें.

सीएसआर कार्यावळी खाला फोमेंतो कंपनीन कश्टी कालें पंचायत वाठारात बरोच सामाजीक वावर केला, अशें मत थळाव्या लोकांनी उक्तायलें.