भांगरभूंय | प्रतिनिधी
बंगळुरू, खबरां संस्था ः नव्या वर्साक येवकार दिवपा खातीर देशभरांतल्या वेगवेगळ्या शारांनी व्हड प्रमाणांत गर्दी जाल्ली. सगळी कडेन उमेदीचे वातावरण पाताळ्ळें. एके वटेन ही उमेद चालू आसतना दुसरे वटेन एके तरणाटे चलयेन आपलें स्वताचें जिवीत सोंपयलें. फोटो शूट करपाक पालकांनी न्हयकार दिल्ल्यान तिणें आत्महत्या केल्ल्याचीं खबर मुखार आयलां.
बेंगळूरांत शरांत घडिल्ली ही घडणूक. वार्शिनी आर हे तरणाटे चली खाजगी कॉलेजींत बीबीएच्या निमाण्या वर्सात शिकताले. ताका फोटोग्राफीची खूब आवड आशिल्ली. हे खातीर तिणें फोटोग्राफीचेंय शिक्षण घेतिल्लें. शिक्षण घेतकच तिची आवड आजून वाडली. देखून ते खमय मेळटा थंय फोटो काडटाले. हे खातीर ते नव्या वर्साक येवकार दिवपाक भायर वचून फोटोग्राफी करपाचे आसले. पूण भायर गर्दी जातली म्हणून तिच्या आवय-बापायन तिका भायर वचपाक न्हयकार दिलो. आवय-बापायच्या न्हयकाराक लागून रागान वर्शिनी (21) आत्महत्या केली.
वर्शिनीच्या बापायन पुलिशेंत केल्ले कागाळींत म्हणलां, वार्शिनी म्हजी तिसरी धूव आशिल्ली. खाजगी संस्थेंतल्यान तिणें फोटोग्राफीचे शिक्षण घेतलें. आमच्या मोबायलात तिचें शेंकड्यांनी फोटो काडिल्ले आसा. तिका फोटोग्राफीची आवड आसा हे मतींत दवरून आमी तिका फोटोग्राफीचे शिक्षण घेवपाक दिलें. आयतारा वार्शिनीन नव्या वर्साक येवकार दिवपा खातीर भायर वचून फोटोशूट करपाची इत्सा उक्तायली. पूण, भायर खूब गर्दी आसतली. तशेंच इतल्या गर्दीच्या जाग्यार वचप धोक्याचे थारतलें म्हणून आमी तिका भायर वचपाक न्हयकार दिलो. ताका लागून ते आमचेर तिडकले आनी आपल्या कुडींत गेले. मध्यान राती हांव जागो जालो. तें जेवंक नाशिल्लें म्हणून हांव तिका जेवपाक जागोवपाक गेलो. पूण, तिणें कुडींतल्यान कसलीच जाप दिली ना. हांवेन भियेवन रोखडेंच कुडीचें दार तोडलें. जाल्यार कुडींत गोळ घेवन तिणें आत्महत्या केल्ले अवस्थेंत सापडलें. हांवें रोखडेच ताका किम्स हॉस्पिटलांत व्हेले पूण दोतोरान ते मेल्लेचें जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
