भांगरभूंय | प्रतिनिधी
भावंडांनो,
नरकासुराक लासोवन आमी दिवाळी मनयली. सगळ्याक पण्ट्यो पेटोवन जिणेंत उजवाड फांकयलो आनी वर्सभरूय हो उजवाड देवान असोच दवरचो म्हूण प्रार्थना केली. ते उपरांत भाऊबीज मनयली. कितली मज्जा न्हय? हय आमी अशेच मजेन रावंक जाय आनी भाव जसो भंयणीची राखण करता तशी आमी सगळ्यांनी एकामेकाची करपाक जाय. हें नातें अशेंच तिगोवन दवरपाक जाय आनी आमची परंपरा मुखार व्हरपाक जाय.
आतां रोखडीच व्हडली दिवाळी येतली आनी तुळशीच्या लग्ना उपरांत तुमच्यो शाळा सुरू जातल्यो. ते खातीर अभ्यासाचेरय लक्ष दवरात.
भुरग्यांनो, दिवाळी जाली की गोंयांत रोखड्योच जात्रा सुरू जातात. फोंडें म्हालांतल्या बोरये, नागेशीं हांगच्यान जात्रांक सुरुवात जातात, त्यो गोंयभर मागीर जात्रा जातात. दिवाळेक आसता, तशेंच जात्रेकूय प्रसन्न वातावरण आसता. जात्राच्या फेरयांनी आमकां वेगवेगळे तरेचें खाजें, लाडू आनी खूब कितें मेळटा. जात्रांनीय आमकां उजवाड पळोवंक मेळटा. दिवाळेक जशे आमी पण्ट्यो पेटयतात, तशेंच जात्रेक दिवजां पेटोवन आमची परंपरा मुखार व्हरतात. आमचे सण आनी परब आमकां खोस दितात. ते खातीर आमी सगळ्यांनी तातूंत वांटो घेवप गरजेचें.
भावंडांनो, आमचे सण मनयतना आमी आमची आनी आमच्या पर्यावरणाची जतनाय घेवप गरजेचें. आमी फोग लायलो जाल्यार वातावरण प्रदुशीत जाता आनी ताचो आमकां आनी आमच्या पर्यावरणाकूय त्रास जाता. ते खातीर अशे तरेची मजा टाळप गरजेचें. हाचो प्रसार आमी करपाक जाय. तो कसो करतलीं? हय! असो प्रस्न कोणाकूय पडूं येता. आमच्या शाळांनी विंगड विंगड सर्ती जातात, तेन्ना असले विशय आमी घेवंक जाय आनी सगळ्यांक जागृत करूंक जाय. आमची भूंय बरी उरली जाल्यार आमी बरीं उरतलीं. तिका त्रास दिवपाचो यत्न केल्यार आमकांय त्रास जातले. हे खातीर हे विशीं बरयात आनी दुसऱ्यां कडेन उलयात. फोग पेट्टा आनी पालवता. मात कितलेंशेंच प्रदुशण करता. आमकां उजवाड जाय दिवलेचो, पण्टेचो आनी दिव्यांचो, न्हय फोगाचो हें आमी मतींत दवरूंक जाय. दवरतलीं न्हय तुमी?
सुटी सोंप मेरेन मजा करात, मात अभ्यास करपाक विसरनाकात हां…
तुमचो,
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
