भांगरभूंय | प्रतिनिधी
देशांत सगल्यांत चड फोग तामीळनाडूंतल्या शिवकाशी ह्या गांवांत तयार जाता. सुमार 1,175 कारखाने हांगा फोगांचें उत्पादन करतात. सुमार तीन लाख लोक प्रत्यक्ष उत्पादनांत गुथल्यात. तशेंच पांच लाख लोकांक अप्रत्यक्ष रोजगार मेळटा. पंडीत जवाहरलाल नेहरू हांणी ह्या गांवचो उल्लेख कुट्टी जपान असो केल्लो. (ल्हान जपान) इतली नामना ह्या शिवकाशीची आसा. आतां फोगाक लागून हवेचे थर दुशीत जायत आसात. वेगळ्यावेगळ्या कारणाक लागून हवेंत प्रदुशण वाडत आसा. तातूंत ह्या फोगाची भर पडत आसा. दिल्ली सारक्या शारांत जाल्यार 1 जानेवारी 2025 मेरेन फोग लावपाक बंदी आसा. सर्वोच्च न्यायालयान 2017 वर्सा एका आदेशा वरवीं ही बंदी दिल्लींत हाडली.
2018 वर्सा फक्त हरीत फोगाची परवानगी दिल्ली. 2020 सावन मात सगल्याच फोगाचेर बंदी हाडली. दिल्ली प्रमाण हेर कांय शारांनी लेगीत बंदी आसा. कोरोना काळांत फोगाच्या धंद्याचेर व्हड संकश्ट आयलें. उपरांत मात उत्पादनांत उणाव दिसून आयलो. दिल्लींत घाल्ली फोगा वेली बंदी आनी हेर कडेन आशिल्ली फोगा वेली बंदी हाका लागून फोगाच्या उद्देगाचेर व्हड परिणाम जालो. ही म्हायती हालींच द इंडियन फायरवर्क्स मॅन्युफॅक्टर्स असोसिएशनाचे अध्यक्ष एस. श्रीराम अशोक हांणी दिली. फोग तयार करतना जे अल्युमिनियम, गंधक तशेंच कागदाचो वापर करतात, ह्या सगल्यांचे दर व्हड प्रमाणांत वाडत आसात. फोगाच्या बेरियमाचो वापर करपाक बंदी आशिल्ल्यान फुलवाती, नारंगा, जमीन चक्रां हांच्या वापराचेर परिणाम जाला. कोरोना पयलींच्या काळांत ह्या उद्देगांत सुमार तीन हजार कोटींची उलाढाल जाल्ली. ह्या उद्देगांतलो मोटो भाग असंघटीत आसा. चडशे कडेन लोक घरांनी वा शेडींनी काम करतात. ह्या उद्देगांत उत्पादन ल्हवू ल्हवू उणे जायत चल्लां. लोकां मदीं फोगा विशीं जागृताय वाडत आसा. ताका लागून ल्हवू ल्हवू ह्या धंद्याक देंवती कळा लागतली अशीं चिन्नां दिसूंक लागल्यांत.
हालीं भुरग्यांक लेगीत शाळांनी फोगा विशीं जागृताय करतात. ताचो बरो परिणाम दिसून येता. लोकांची मानसीकताय लेगीत फोग लावप ना अशी वाडत आसा. पर्यावरणाचे नदरेन हें योग्य आसा. पूण ह्या धंद्यांतल्या लोकांक लेगीत हेर रोजगार दिवप गरजेचें आसा. ताचे कडेन लेगीत सरकारान लक्ष दिवचें अशें दिसता.
सुणें चाबप शारांतली व्हड समस्या
बंगळुरू शारांत फाटल्या स म्हयन्यांत सुमार 13 हजार 748 जाणांक रस्ताद सुण्यांनी घांस मारिल्ल्याची खबर हालींच वाचली. ही आंकडेवारी फक्त स म्हयन्यांतली आसा. वर्सभर सर्वसादारणपणान 30 ते 35 हजार लोकांक सुणीं घांस मारीत आशिल्ल्याचें दिसून येता. आयज बंगळुरू सारक्या शारा सारकी समस्या हेर शारांनी आसा. हातूंत खूबशा लोकांक मरण लेगीत आयलां. बंगळुरूंत रस्ताद सुण्यांचे प्राणी जल्म नियंत्रण येवजणे खाला निर्बिजीकरण करपाी कार्यावळ सुरू केल्या आनी सुण्यांक रेबीज आनी हेर प्रकारची वासिनांय दितात. फावो ते अन्न मेळनाशिल्ल्यान हीं सुणीं आक्रमक जावन रातचीं वा सकाळचीं हल्ले करतना दिसून येतात. सुण्यांक फावो ते अन्न दिवन हो ताचे फाटलो एक उपाय आसा अशें खूबशा जाणांनी म्हणलां.
सुण्यांक अन्न मेळनाशिल्ल्यान तीं हल्ले करतात हें एक कारण आसा. पूण आयजूय खूबशा शारांनी उरिल्लें अन्न खूबशे जाण रस्त्या वेल्या फुटपाथांनी उडयत आसतात. ताका लागून थंय अन्नाची समस्या ना थंय लेगीत सुणीं घांस मारतात. एकूणच ही सुणीं घांस कित्याक मारतात हाचो अभ्यास करप गरजेचें आसा. आयज खूबशा शारांतलो हो एक ज्वलंत प्रस्न आसा.
शांताराम वाघ
9623452553
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
