भांगरभूंय | प्रतिनिधी
पणजीः फोंतेन्हास आनी साओ तोमे वाठारांत चलिल्ल्या पर्यटकांच्या उपद्रवाची पर्यटन खात्यान गंभीर दखल घेतल्या. आमी हो विशय विधानसभेचें अधिवेशन सोंपले उपरांत हातांत घेतले. थळाव्यांचे मजती खातीर आमी 1360 हेल्पलायन क्रमांक जारी केला अशी म्हायती पर्यटन मंत्री रोहन खंवटे हांणी दिली.
पणजे शारांतल्या फोंतेन्हास आनी साओ तोमे वाठारांत पर्यटकांच्या उपद्रवाचो विशय फातोड्डेंचे आमदार विजय सरदेसाय हांणी सभाघरांत शुन्य प्रहारा वेळार मांडिल्लो.
फोंतेन्हास आनी साओ तोमे वाठारांत पर्यटक आनी व्लोगर येवन मस्ती करतात आनी हाचेर कसलेंच नियंत्रण ना. हे पर्यटक थळव्यांची शांतिकाय आनी एकांत भंग करतात. ह्या वाठारांत गर्दी करून पर्यटक हुयेली मारतात तशेच नव्यान रंग दिल्ल्या घरांचेर पांय दवरून घरां म्हेळी करतात. अशी कागाळ सरदेसाय हांणी केली.
हो उपद्रव बंद करपा खातीर पार्कींग सुवात आंखची, रस्त्यांचेर मार्कींग करचें, नो पार्कींग फलक लावचे, तशेंच वाहनां पाटो मल्टी लेव्हल पार्कींग सुवातेर दवरपाक सांगचीं. हे खातीर पर्यटन खात्यान हेर खात्यां मदीं समन्वय तयार करचो अशी मागणी सरदेसाय हांणी केली.
हे विशीं जाप दितना पर्यटन मंत्री रोहन खंवटे हांणी सांगलें की, फोंतेन्हास आनी सावो तोमे वाठार हें आगळें वेगळें दायज आनी रंगीत घरां खातीर फामाद आसा. हाची जाण आमकां आसा. पर्यटन खात्यान ह्या वाठारांक केन्नाच थेट प्रसिध्दी दिवंक ना. कोविडा उपरांत पर्यटकांनी आनी व्लोगर्सांनी हो वाठार लोकां मुखार हाडलाे. थळाव्यांक त्रास जावचे न्हय म्हूण आमी 1360 पर्यटन हेल्पलायन सुरू केल्या. जर कसलोय त्रास जाता आसत जाल्यार तांणी ह्या क्रमांकाचेर संपर्क सादचो. अधिवशेना उपरांत हो विशय हातांत घेवन आमी पुलीस आनी पणजी म्हानगरपालिके वांगडा बसका घेवन ह्या विशयाचेर उपाय काडटले अशें आश्वासन मंत्री रोहन खंवटे हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
