भांगरभूंय | प्रतिनिधी
फोंडें: फोंडें वाठारांत जून ते 15 ऑगस्ट ह्या काळांत डेंग्यूचे वट्ट 26 दुबावीत दुयेंती सांपडले. तातूंत शांतीनगर वाठारांतल्या 7 डेंग्यूच्या दुबावीत दुयेंतींचो आस्पाव आसा.
फाटल्या 4- 5 दिसांत पावस उणो जाला. ताका लागून दुबावीत दुयेंतींचो आंकडो वाडपाची शक्यताय आसा. हे खातीर लोकांनी सतर्क रावचें, असो उलो फोंडें मुळाव्या भलायकी केंद्रा वतीन मारला.
फोंडें मुळाव्या भलायकी केंद्रांत फक्त अडेज म्हयन्यांत डेंग्यूचे वट्ट 26 दुबावीत दुयेंती सांपडल्यात. तातूंतले जून आनी जुलयांत 23 जाल्यार ऑगस्टाचे पयले पंद्रशेंत 3 दुबावीत दुयेंती सांपडल्यात. भलायकी केंद्रा वतीन सगळ्या दुयेंतींच्या घरा लागसार वखदां मारल्यांत. तशेंच लोकांक डेंग्यू संबंदांत जागृत करपांत खात्याचे कर्मचारी व्यस्त आसात. कारण पावसाचें प्रमाण उणें जाले उपरांत डेंग्यूचे दुयेंती वाडपाची शक्यताय अदीक आसता.
भलायकी अधिकारी डॉ. स्मिता पार्सेकार आनी नितळसाण विभागाचे निरिक्षक मनोज नायक हांचे सयत भलायकी केंद्राचे हेर कर्मचारी विवीध वाठारांनी वचून लोकांक डेंग्यू विशींची म्हायती दितात. फुडल्या कांय दिसांनी दुयेंसींचे संख्येचेर नियंत्रण दवरचे खातीर लोकांनी 5- 6 दिसां परस अदीक दीस उदक सांठोवन दवरचे न्हय, अशेंय भलायकी केंद्रान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
