फोंड्यां रितेश विरोधा विणें ?

भांगरभूंय | प्रतिनिधी

मगो कडल्यान रितेशाक तेंको जाहीर

फोंडेंच्या पोटवेंचणुकेची, उमेदवारांची चर्चा

विरोधकांनी उमेदवारां विशीं अजून थारावंक ना

भांगरभूंय । प्रतिनिधी

पणजी : लोक फुडारी आनी गोंयकारांचे पात्रांव रवी नायक संवसाराक अंतरिल्यान फोंडें मतदारसंघाची पोटवेंचणूक आनी उमेदवारांची चर्चा सुरू जाल्या. रवी नायक हांचो पूत रितेश नायक हाका भाजपान उमेदवारी दिली जाल्यार तांची बिनविरोध निवड जावपाची खूब शक्यताय आसा. विधानसभेचो एकूच वर्साचो कार्यकाळ उरिल्ल्यान रितेश नायक हांकां बिनविरोध वेंचून हाडपाचे यत्न भंडारी समाजाचे फुडारी करतले. पोटवेंचणुकेची प्रक्रिया सुरू जावपाची आसा. पोटवेंचणूक जाहीर जातकच उमेदवारा विशीं निर्णय जातलो, अशी म्हायती काँग्रेस, आरजी, आपच्या अध्यक्षांनी दिली.

आदले मुख्यमंत्री आनी शेतकी मंत्री रवी नायक हे मंगळारा राती संवसाराक अंतरले. बुधवारा तांचे कुडीचेर निमणे संस्कार जाले. सगळ्या पक्षांचे फुडारी आनी गोंभरांतल्या लोकांनी तांचे कुडीचें निमाणे दर्शन घेतलें.

आमदाराक मरण आयलें जाल्यार 6 म्हयन्यां भितर पोटवेंचणूक घेवची पडटा. हाका लागून फोंडें मतदारसंघांत 15 एप्रील 2026 पयली पोटवेंचणूक जातली. रवी नायक हांचे बरे मागपी सगळ्या पक्षांनी आशिल्ले. हाका लागून मगो, काँग्रेस आनी आतां भाजपाचे उमेदवारीचेर ते जैतिवंत जाले.

रितेश नायक हांकां उमेदवारी दिवची, अशी मागणी भंडारी समाजाचे फुडारी तशेंच रवी नायक हांच्या कार्यकर्त्यांची आसा. सरकारांत आशिल्ल्या मगो पक्षान लेगीत रितेश नायक हांचे उमेदवारीक तेंको जाहीर केला. हाका लागून भाजपा कडल्यान रितेश नायक हांकांच उमेदवारी दिवपाची खूब शक्यताय आसा. पोटवेंचणुकेचे उमेदवारी विशीं पक्ष निर्णय घेतलो. सध्या आपूण उमेदवारी विशीं कांयच सांगपाक शकना. उमेदवार निश्चीत करपाची पद्दत आनी चर्चा करून निर्णय जातलो, अशें प्रदेश भाजप अध्यक्ष दामू नायक हांणी सांगलें.

रितेश नायक हे फोंडेंचे नगरसेवक आसा. राजकारणांत येवपाक ते इत्सूक आसा. हाका लागून तांचे उमेदवारीचो विचार भाजपाक करचोच पडटलो, अशें बऱ्याच कार्यकर्त्यांचें मत आसा.

रवी नायक हांकां लागून भाजपाक पयलेच खेपे फोंडें मतदारसंघांत जैत मेळ्ळें. हाका लागून रितेश सोडून हेर उमेदवारांचो विचार पक्षाक करप शक्य जावचें ना, अशी चर्चा कार्यकर्त्यां मदीं आसा.

मगो पक्ष सरकारांत आसा. रितेश नायक हांकां उमेदवारी दिली जाल्यार मगोचो तेंको आसतलो. मगो पक्ष युतीच्या धर्माक पाळो दितलो, अशें मगोचे अध्यक्ष दीपक ढवळीकार हांणी म्हणलां. वीजमंत्री तशेंच मगोचे आमदार सुदिन ढवळीकार हांणी लेगीत रितेशाचे उमेदवारीक तेंको दिला.

काँग्रेस हो विरोधी पक्ष आसा. उमेदवार दवरचो काय ना, हे विशीं पक्ष निर्णय घेतलो. पक्षाचे बसकेंत निर्णय जातलो. पयली काँग्रेस धोरणात्मक निर्णय घेतलो आनी उपरांत हेर विरोधी पक्षां कडेन चर्चा जातली, अशें प्रदेश अध्यक्ष अमीत पाटकार हांणी सांगलें.

रवी नायक हे भोवजन समाजाचे फुडारी आशिल्ले. फोंडें मतदारसंघांत पोटवेंचणुकेंत उमेदवार दवरचो काय हेर कोणाक तेंको दिवचो, ताचो निर्णय बसकेंत जातलो. पोटवेंचणुकेक वेळ आसा. योग्य वेळार निर्णय जातलो, अशें आरजीचे अध्यक्ष मनोज परब हांणी सांगलें. आप हो विरोधी पक्ष आसा. भाजप उमेदवाराक तेंको दिवप कशें शक्य आसा? पोटवेंचणूक जाहीर जावपाची आसा. उमेदवारीच्या विशयाचेर अजून चर्चा जावपाची आसा, अशें आपाचे गोंयचे संयोजक अॅड. अमीत पालेकार हांणी सांगलें.