भांगरभूंय | प्रतिनिधी
फोंडें: सपना टावन कुर्टी वाठारांतले एके इमारतींत बेकायदो तरेन चालू आशिल्ल्या मिनी कॅसिनो आड फोंडें पुलिसांनी कारवाय केली. ह्या प्रकरणांत पुलिसांनी एका दुबाविताक चवकशे खातीर ताब्यांत घेतला. मिनी कॅसिनोचेर पुलिसांनी केल्ले कारवायेचेर थळाव्या लोकांनी समाधान उक्तायलां. थळावे पंच नीळकंठ नायक हांणी मिनी कॅसिनो आड कागाळ दिल्ली.
थळाव्या लोकांनी दिल्ले म्हायती प्रमाण फाटल्या कांय म्हयन्यां सावन ह्या मिनी कॅसिनोचेर कारवाय करची अशी थळाव्या लोकां कडल्यान मागणी जाताली. हे संबंदांत पंच वांगड्यान पुलीस स्टेशनाचेर रितसर कागाळ केले उपरांत बुधवारा सांजे उसरां कारवाय करून एका दुबाविताक ताब्यांत घेतला.
सुत्रां कडल्यान मेळिल्ले म्हायती प्रमाण ताब्यांत घेतिल्ल्या दुबावितान आनीक तीन वाठारांनी मिनी कॅसिनो चालू आशिल्ल्याचें सांगलां. ताका लागून पुलिसांनी ह्या प्रकरणांत खोलायेन चवकशी करून पंचायत वाठारांतले सगळे बेकायदो मिनी कॅसिनो बंद करपाची मागणी थळाव्या लोकांनी केल्या. फोंडें पुलीस स्टेशनाचे निरिक्षक तुषार लोटलीकार हांच्या मार्गदर्शना खाला उपनिरिक्षक नितेश काणकोणकार ह्या प्रकरणांत अदीक तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
