भांगरभूंय | प्रतिनिधी
पणजी : थळाव्या माटोळी विक्रेत्यां कडल्यान सोपो वसूल करचे नात अशें आस्वासन मुख्यमंत्री डॉ. प्रमोद सावंत हांणी दिल्लें. अशें आसून लेगीत फोंडें बाजारांत थळाव्या माटोळी विक्रेत्यांक सोपो कर दिवचो पडटा हें मुखार आयलें. चवथी कडेन विक्रेत्यांक थाकाय दिवचे बदला प्रशासनाचे आडनदरेक लागून विक्रेत्यांचे तकलेवेलें वजें आनीक वाडलां.
थळाव्या माटोळी विक्रेत्यां कडल्यान सोपो कर घेवचे ना अशें आस्वासन मुख्यमंत्री डॉ. प्रमोद सावंत हांणी दिल्लें. हे विशीं पंचायत आनी पालिकांक आदेशीय दिल्ले. मात हे विशींची आधिसुचवणी आयज जारी जाल्या.
फोंडें बाजारांत माटोळी विक्रेत्यां कडल्यान सध्या सोपो कराची वसुली सुरू आसा, मुख्यमंत्र्यांच्या आस्वासना कडेन कोणाचेंच लक्ष ना. हे विशीं जाप विचारल्यार सोपो कर घेवपी कंत्राटदार वयलेवयर जापो दितना दिसतात, अशें थळाव्या माटोळी विक्रेत्यांनी सांगलें.
विक्रेते पयलींच वाडिल्ल्या खर्चाक लागून त्रासांत आसात. अशा वेळार ह्या कराक लागून तांच्या हातांत कितेंच उरना अशीय खंत विक्रेत्यांनी उक्तायली.
मजगतीं, म्हापश्या बाजारांतूय शेजारच्या राज्यांतल्यान चवथी खातीर भाजीपालो, माटोळी आनी हेर सामान घेवन येवपी वाहनां कडल्यान वट्ट १२०० रुपयांचो सोपो घेतात. कांय सुवातांचेर चार दिसांचो सोपो पयलींच वांगडाच घेतिल्ल्याचेंय उक्तें जालां. ह्यान पयलीं हो कर फकत १०० रुपया आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
